ދަރަންޏާ ބެހޭ ބިލް އަވަސް ކުރުމަށްޓަކައި އާދިއްތަ ދުވަހު ރައްޔިތުންގެ މަޖިލީހުގެ ޖަލްސާއެއް ބޭއްވުމަށް ތާވަލްކޮށްފިއެވެ.

އެ ދުވަހު ޖަލްސާ ބޭއްވުމަށް ހަމަޖެހިފައިވަނީ ހެނދުނު 9:00 ގައެވެ. އަދި ޖަލްސާގެ އެޖެންޑާގައި އޮތީ ދަރަންޏާ ބެހޭ ބިލާއި ގުޅޭގޮތުން ބަހުސް ކުރުން ކަން ފާހަގަކޮށްލެވެއެވެ.

މި ބިލް ހުށަހަޅާފައި ވަނީ ފުނަދޫ ދާއިރާގެ ޕީއެންސީގެ މެމްބަރު މުހައްމަދު މަމްދޫހް އެވެ.

މާލީ ވުޒާރާގެ ދަށުން މިހާރު ހިންގާ ޑެޓް މެނޭޖްމެންޓުގެ ހުރިހާ ޒިންމާތަކާއި މުވައްޒަފުންނާއި މުދަލާއި ވަސީލަތްތަކާއި އިމްތިޔާޒުތައް ޑެޓް މެނޭޖްމެންޓް އޮފީހަށް ބަދަލުވާނެ ކަމަށް ވެސް އެ ބިލްގައިވެއެވެ.

ދައުލަތުގެ ދަރަންޏާ ބެހޭ ބިލުގައި ވަނީ ސޮވްރިން ގެރެންޓީ ދޭގެ ގޮތްތަކާއި ލޯކަލް ކައުންސިލްތަކާއި ސަރުކާރު ހިއްސާވާ ކުންފުނިތަކުން ދަރަނި ނެގުމުގައި އަމަލުކުރާނެ ގޮތްތައް ވެސް ބަޔާން ކޮށްފައިވެއެވެ.