ގިނަ ބަޔަކު އެއް ގަލަކަށް އަރާ ނިންމާ ނިންމުންތަކާ އެކު ލިބޭ ފައިދާ ވަކި މީހަކު މުށު ތެރެއަށް ލާ ފޮރުވުމަކީ ދެން އެކަމުގައި ބައިވެރިވި އެހެން މީހުން ޔަގީނުންވެސް ހިތް ހަމަ ނެޖެހޭ ކަމެކެވެ. ޚާއްސަކޮށް ސިޔާސީ މަސްރަހުގައި މިއީ ވަރަށް އާންމު ކަމެކެވެ.

ދައްކަން މިއުޅެނީ ކޮން ވާހާކައެއްކަން ހުރިހާ ރައްޔިތުންނަށްވެސް މިހާރު އެނގޭނެ ހެން އަޅުގަޑަށް ވަރަށް ހީވެއެވެ. ދައްކަން މިއުޅެނީ އަދުގެ ރައީސުލްޖުމްހޫރިއްޔާ ޑރ މުއިއްޒުގެ ސްޕެޝަލް އެޑްވައިޒަރުގެ މަގާމުގައި ހުންނަވާ އަބްދުއްރަހީމް ( އަދުރޭ ) ގެ ވާހަކައެވެ. މި ވާހަކަ ފަށާނެ ހިސާބެއްވެސް ނޭނގެއެވެ. ފަށަންވީ ރޮމުންތޯ ހެމުންތޯ ނޫނީ ކަންބޮޑުވުމުންތޯ ވެސް ނުނިންމެނީ ވެސް މައްސަލައިގެ ބާވަތުންނެވެ.

އެގޮތުން ބަލާއިރު ރައީސް އަބްދުﷲ ޔާމީން، 2023 ވަނަ އަހަރު ރިޔާސީ އިންތިހާބުގައި ވާދަކުރައްވަން ނިންމަވާ އުފަން ކުރުވި ސްލޯގަން "ދިވެހީންގެ ރާއްޖެ" ވެރިކޮށް އެމަނިކުފާނަށް ވާދަކުރުމުގެ ފުރުސަތު މަކަރާ ހީލަތުން ގެއްލުވާލުމަށް ފަހު، ޖަހައިގަނެ އެމަނިކުފާނުގެ މެނިފެސްޓޯ ވަގަށް ނަގައިގެން ވެރިކަމަށް ޑރ. މުހައްމަދު މުއިއްޒު ގެނައުމުގައި އެންމެ ހިޔަޅުވެރިކަމެއް ގެންގުޅުނީ އަބްދުއްރަހީމުއެވެ. އޭގެ ސަބަބުތައް ބައިވަރެވެ.

އެގޮތުން ސިޔާސީ މައިދާނުގައި އުމުރު ހުސްވެ ނުރަ ޖަހާ މީހާ ބެޓެރިއެއްގެ އެހީގައި ދިރިއުޅޭން ޖެހޭ ހާލަތަށް އައިއިރުވެސް މާ ބޮޑު މަގްބޫލުކަމެއް ނުލިބި ހުރި އަބްދުއްރަހީމު، ގިނަ ބަޔަކު ކިޔާ ގޮތުން ނަމަ "ފޮނަދޫ އައްދުއްރަހީމު" އަށް ނިމި ދިޔަ ރިޔާސީ އިންތިހާބުގައި ލިބުނީ ރަނުގެ ފުރުސަތެކެވެ. ލައްގަޅޭ ލައްގަޅޭ ރަންފޮއްޓަށް ލައްގަޅޭ މައިން މަގަށް ރަން ފޮއްޓެއް ލައްގަޅޭ ކިޔާލަ ކިޔާލާ ހުއްޓާ ލިބުނު ފުރުސަތުގައި އަބްދުއްރަހީމު ފުރަތަމަވެސް ޑީމާންޑު ކުރީ ރާއްޖޭގެ ނައިބު ރައީސް ކަމަށެވެ.

މިކަމަށް އޭނާ ޑީމާންޑް ކުރީ އޭނާ ދިރިއުޅެމުން ދިޔަ ގޭގެ ޓެރަސްގައި ޑރ. މުއިއްޒުއާ އެކު އޭރު ކުރަމުން ދިޔަ މަޝްވަރާތަކުގެ ތެރެއިންނެވެ. ދަންވަރު 12. 1 ޖަހާއިރު ފަށާ އެ މަޝްވަރާތައް ބައެއް ރޭ ރޭ ފަތިސް ނަމާދު ބަންގިއަށްވެސް ނިންމާލާފައި އެބަހުއްޓެވެ.

ނަމަވެސް ޑރ. މުއިއްޒުއަށް އަބްދުއްރަހީމުއާ އެއްބަސް ނުވެވުނު ކަމަކީ ނައިބު ރައީސްކަން ނޫނީ އޭރުގެ ރަނިން މޭޓުކަން އޭނާއަށް ދިނުމެވެ. އެހާ ހިސާބުން ކުޑަކޮށް ކުނި ކޮޅުތައް ޖެހެން ފެށި ނަމަވެސް ދެ ވަނައަށް ހުށަހެޅި ހުށަހެޅުން، މަޖިލިސް ރައީސްކަން އޭނާއަށް ދިނުމަށް ޑރ. މުއިއްޒު އެއްބަސްވުމުން އަބްދުއްރަހީމު ޑރ. މުއިއްޒުއާ އެއް ފަޅިއަކަށް އަރާ ސެނެޓު ގަނެގެން ނެގި ވޯޓުން މުއިއްޒުއަށް ކާމިޔާބު ހޯދިއެވެ.

ތައްގަނޑު ވަގަށް ނަގައިގެން ޖެހި ތައްގަނޑުގެ ނިޝާންއާ އެކު ފެށިގެން އައީ ދިވެހީންގެ ރާއްޖެ އެއް ނޫނެވެ. އެހާ ހިސާބުން އެ ފެށުނީ ނަމުން ދިވެހީންގެ ރާއްޖެ ނަމަވެސް ކަމުން އަދުރޭގެ ރާއްޖެއެވެ.

އެންމެ ފަހުން އަޑުއިވިގެން ދިޔަ ވާހަކައަކީ ކުރިއަށް މިއޮތް ރައްޔިތުންގެ މަޖިލީސް އިންތިހާބުގެ ޕްރައިމަރީއާ ގުޅުވާ ސަރުކާރު ހިންގާ މައި ޕާޓީ ޕީޕަލް ނެޝަނަލް ކޮންގްރެސް އިން އަމަލުކުރަމުންދާ ގޮތުގެ ވާހަކައެވެ. އެގޮތުން އަދުރޭ ދިޔައީ ޕާޓީއަށް ހިދުމަތް ކޮށްދީފައި ނުވާކަމަށް ބުނެ ބައެއް މެމްބަރުންގެ ނަން އަނބުރާ ނެގުމަށް ސިޓީ ފޮނުވާ އަންގަމުންނެވެ. އެހެންތާ ވާނީ، އަބްދުއްރަހީމަށް މަޖިލީހުގެ ރައީސް ކަމަށް އާދެވެން އޮތް ހަމައެކަނި ގޮތަކީ އޭނާ ރުހޭ ބަޔަކަށް މަޖިލިސް ގޮނޑިތަކުގައި ވާދަކުރަން ފުރުސަތު ދީގެން ކަމަށް ވާތީއެވެ. މުޅިންވެސް އަދުރޭ އުޅުއްވަނީ އަމިއްލަ އެދުމައިގެންނެވެ.

ބޭފުޅާއާ އަޅުގަނޑު ކޮށްލަން ބޭނުންވާ ސުވާލެއް އެބަ އޮތެވެ. ބޭފުޅާއަށް ޕާޓީއެއް އުފެއްދުމުގެ ގާބިލުކަން ނެތީ ތޯ؟ އެހެންވެގެން ނޫންތޯ ރައީސް ޔާމީންގެ އަތުން ދެ ޕާޓީ ޖަހައިގަނެގެން ތި އުޅުއްވަނީ. ޕާޓީގެ ޗެއާޕާސަން ގެ މަގާމުގައި ހުރެ ބާރުގެ ބޭނުން ނަހަމަ ގޮތުން ބޭނުން ކުރަނީ ހަމަ ހަގީގަތުގައިވެސް ޕާޓީއެއްވެސް އުފެއްދުމުގެ ގާބިލްކަން ނެތީމަތާއެވެ.

ފޮނުވި ސިޓީ ތަކުގައި ނަން އަބުރާ ނެގުމަށް ބުނަމުން ދިޔަ ސަބަބެއްގެ ގޮތުގައި ބަޔާން ކޮށްފައި އޮތީ ޕާޓީ އަށް އެކަށީގެން ވާވަރަށް ހިދުމަތް ކޮށްދީފާ ނުވާތީ ކަމަށެވެ. މިހެން ބުނެފަ އޮއްވާ ދެން އަޑުއިވިިގެން ދިޔައީ ޑރ މުއިއްޒުގެ ކޮއްކޯފުޅު ފާތިމަތު ސައުދާއަށް ޕާޓީގެ ޓިކެޓު ޔަގީންވެގެން ދިޔަ ވާހަކައެވެ. އެކަމަނާއަކީ ޕާޓީއަށް ދުވަހަކުވެސް ހިދުމަތް ކޮށްދީފައިވާ ފަރާތެއް ނޫނެވެ. މީދެން ކިހާ ބޮޑު ޖޯކެއްތޯއެވެ. އަދުރޭ ހިތުން މި ދިވެހި ރާއްޖެއަކީ އޭނާގެ މުށުތެރޭގައި އޮތް ތަނެކެވެ. އަދުރޭއެވެ. މިއީ ލ.ފޮނަދޫ އަރާއިރު ގެއެއް ނޫނެވެ. މިއީ ރާއްޖެއެވެ. ޕާޓީ އަށް ވަފާތެރި އެތައް ބަޔަކު ފަހަތައް ޖައްސާ ޓިކެޓުތައް ތަބަކަށްލާ ބަހަމުން ދިޔަ ނަމަވެސް ހަގީގަތް ބަދަލެއް ނުވާނެއެވެ. ބޭފުޅާ އަމަލު ކުރަމުން ތި ދިޔަ ގޮތުން އެތައް ބަޔަކު އެދަނީ ޕީއެންސީ އިން ވަކިވަމުންނެވެ.

ކަމެއްގެ ދަހިވެތި ކަމުގައި ރައްޔިތުންގެ މޫނު މައްޗަށް އެތަކެއް އޮޅުވާލުންތަކެއް އޮޅުވާލާން އުޅުނަސް އެއީ ވާނެ ކަމެއް ނޫނެވެ. ދިވެހި ރައްޔިތުން އެއަށް ވުރެ މާ ހުށިޔާރެވެ. އެންމެ ފަހުން އަމާޒުވި ފާޑުކިޔުންތަކަށް ކެތްނުވެގެން ނަން ހުށަހެޅުއްވި ހުރިހައި ބޭފުޅުންނަށް ވާދަކުރެއްވޭގޮތަށް ޕްރައިމަރީ ބާއްވަން ޕާޓީގެ ރައީސް ރައީސް ޑރ މުއިއްޒު ނިންމެވީ ކަމަށް ބުނެ ނިންމަލީ ހޭވި ހަޑި ފަޅާއަރާ ރައްޔިތުން މޫނު މައްޗަށް ޖެހި ހައްޕުޅުގަނޑުގެ ރަތްކަން ބޮޑުކަމުންކަން އެއީ މިހާރު އެންމެނަސް އެނގޭ ބޮޑު ސިއްރެކެވެ.

ޕީއެންސީ ތެރޭގައި ވަކި ބައެއްގެ ނުފޫޒު ގަދަވެ ހިތްހަމަ ނުޖެހުން ފާޅުކުރަމުން ދާއިރު އަދި މި އުޅެނީ މި ސަރުކާރަށް މާގިނަ ދުވަސްތަކެއްވެސް ނުވެއެވެ. އެހާ އަވަހަށް ހުރިހާ ކަމެއް ވެސް މިދަނީ އަތަށް ގޮވަމުންނެވެ.

އަދުރޭ މިއުޅެނީ މި ދިވެހިންގެ ރާއްޖެވެސް އަދުރޭގެ ރާއްޖެއަށް ހަދަންތާއެވެ. ނާ ހަމަ ހިލާ އެހެނަކުން ނޫވާނެއެވެ. ދިވެހީންނަށް ދިވެހީންގެ ރާއްޖެ ރައީސް ޔާމީން ހޯއްދަވާ ދެއްވާނެއެވެ. ކިތަންމެ ވަރަކަށް ބަނދެ ހިފާ ހައްޔަރުކޮށްގެން އުޅުނަސް ހަމަ ހިލާ މިއި އަދުރޭގެ ރާއްޖެއަކަށް ވިޔަ އެމަނިކުފާނު ނުދެއްވާނެއެވެ.