މާފުށީ ޖަލުގައި "ވާނުވާ" ބަންދުގައި ހުއްޓާ އިއްޔެ ހެނދުނު ނިޔާވި ށ. ފުނަދޫ ޒަމާނީ ވިލާ މުޙައްމަދު ޖަމީލް (45 އަހަރު)ގެ ހަށިގަނޑު ވަޅުލައިފިއެވެ.

ވާނުވާ ބަންދުގައި ޖަމީލު ބަހައްޓަފައި ހުރީ ކުރީގެ ސްޓޭޓު މިނިސްޓަރު އަލީ ސޯލިހަށް ހަމަލާދިން މައްސަލައެއް ގައެވެ. އެގޮތުން ޖަމީލުގެ މައްޗަށް އުފުލާފައި ވަނީ ނުރައްކާތެރި އަދި ތޫނު ހަތިޔާރު ބޭނުންކޮށްގެން މާރާމާރީ ހިންގުމުގެ ދައުވާއެވެ.

އޭނާ ނިޔާވީ ޖަލު އޮފިސަރުން އަނިޔާކޮށްގެން ކަމަށާއި ފަރުވާ ދިނުމުގައި އިހުމާލުވެގެން ކަމަށް ތުހުމަތުކޮށް ސޯޝަލް މީޑިއާގައި ގިނަ ބަޔަކު ކަންބޮޑުވުން ފާޅުކޮށްފައިވެއެވެ. މި ތުހުމަތު އަމާޒުވެފައިވާއިރު ޖަމީލުގެ މޫނުމައްޗާއި ބުރަކަށީގެ އެކި ތަންތަނުގައި ނޫފައިގެންފައިވާ ތަންތަން ހުރި ކަމާ އެއީ އަނިޔާގެ ނިޝާންތަކެއްގެ ގޮތުގައި ފޮޓޯތަކުން ހާމަވެއެވެ.

ޖަމީލުގެ މަރާ ގުޅިގެން ކަރެކްޝަނަލް ސާވިސްއިން ބުނެފައިވަނީ، ޖަމީލް ގޮޅިން ބޭރަށް ނުނިކުމެ، ހަރަކާތް ނުކޮތް ގިނައިރު އޮތްކަން ފާހަގަ ކުރެވިގެން މާފުށީ ޖަލުގެ މެޑިކަލް ސެންޓަރަށް ގެންގޮސް ސީޕީއާރް ދީފައިވާ ކަމަށާއި އެއްވެސް ބަދަލެއް ނައުމާ ގުޅިގެން، 12:13 ހާއިރު މާފުށީ ސިއްޙީ މަރުކަޒަށް ގެންގޮސް އޭނާއަށް ފަރުވާ ދޭން ފަށާފައިވާ ކަމަށް އެ އިދާރާއިން ހާމަކޮށްފައިވެއެވެ. އަދި 12:45 ގައި ޑޮކްޓަރު ވަނީ މުޙައްމަދު ޖަމީލްގެ ހިތް ހުއްޓިގެން ނިޔާވިކަމަށް ކަނޑައަޅާފައެވެ.

ނަމަވެސް ޖަމީލުގެ މަރުގައި އިހުމާލުތަކެއް ވާކަމުގެ ރިޕޯޓު ލިބި މިހާރު ފުލުހުންނާ ބައެއް މިނިވަން މުއައްސަސާތަކުން އެކަން ތަހުގީގުކުރަމުން ގެންދާކަމަށް ފުލުހުން ހާމަކޮށްފައިވެއެވެ. އެގޮތުން ތަހުގީގަށް ކަމަށް ބުނެ ޖަމީލުގެ ހަށިގަނޑު ޕޯސްޓު މޯޓަމް ހަދަން ފުލުހުން ގެންދަން މަސައްކަތްކުރުމުން އާއިލާގެ ހުއްދަ ނުލިބުމުން އެކަން ވަނީ ނުވެފައެވެ. އަދި ޕޯސްމޯޓަމް ނުހަދާ ވަނީ ޖަމީލުގެ ހަށިގަނޑު ވަޅުލާފައެވެ.

ޖަމީލު ވާނުވާ ބަންދުގައި ބަހައްޓާފައިވާއިރު އޭނާއަކީ ނަފްސާނީ ބަލި ތަހައްމަލުކުރަމުން ދިޔަ ފަރާތެއްކަން ފާހަގަކޮށްލެވެއެވެ.