2018 ވަނަ އަހަރުގެ ވެރިކަން ބަދަލުވުމާއެކު ރައީސް ޔާމީނާއި ދެކޮޅަށް އެކި އެކި ތުހުމަތުތައް ކުރަން ފެށިއެވެ. ނަމަވެސް ކެނޑިނޭޅި އެއީ ދޮގު ތުހުމަތުތަކެއް ކަމަށް ފުރަތަމަ ދުވަހުން ފެށިގެން ވެސް ރައީސް ޔާމީނާއި އެމަނިކުފާނުގެ ސަޕޯޓަރުން ބުނަމުން ދިޔައެވެ. އޭރު ވެރިކަން ކުރަމުން ދިޔަ ރައީސް އިބުރާހިމް މުހައްމަދު ސޯލިހުގެ އެމްޑީޕީ ސަރުކާރުން، ރައީސް ޔާމިނަށް ޒާތީ ހަސަދަ ފިލުވާލުމަށްޓަކައި، ނުފުރޮޅާ އެންމެ ގާކޮޅެއް ވެސް ނުބާއްވައެވެ. އެންމެ ފަހުން އެމީހުންގެ މަގުސަދު ހާސިލް ކުރީ ވެރިކަން ނިމެން ކައިރިވެފައިވަނިކޮށް 2022 ވަނަ އަހަރު ޑިސެންބަރު މަހު، 25 ވަނަ ދުވަހު ނުހައްގުން 11 އަހަރު ދުވަހުގެ ޖަލު ހުކުމެއް ކޮށްގެންނެެވެ.

ވ.އާރަށު މައްސަލައާއި ގުޅިގެން ކޮށްފައިވާ މި ހުކުމް އިސްތިއުނާފް ކުރަން ރައީސް ޔާމީންގެ ފަރާތްޕުޅުން ހުށައަޅައި އެތައްފަހަރެއް މަތިން ހައި ކޯޓަށް އެމަނިކުފާނުގެ ފަރާތްޕުޅުން ވަޑައިގެން، އެތައް ފަހަރަކު ކަންބޮޑުވުން ފާޅުކުރުމަށް ފަހު އަޑުއެހުންތައް ތާވަލްކޮށް، މިހާރުވަނީ ހުކުމަކާއި ހަމައަށް އިސްތިއުނާފްގެ އަޑުއެހުންތައް ގޮސްފައެވެ. ނަމަވެސް ރައީސް ޔާމީންގެ ދިފާއުގައި ކުރިން އަޑުއުފުލާފައިވާ ބޭފުޅަކު، ރައީސް ޔާމީން މިނިވަން ކޮށްދޭނެ ކަމަށް ވައުދުވެ، އެމަނިކުފާނުގެ ފޮޓޯ ވިއްކައި ހުސްގޮނޑި ދައްކައިގެން ވެރިކަމަށް އައި ބޭފުޅަކު މިހާރު މިވަނި އެމަނިކުފާނު މުޅިން އެކަހެރި ކޮށްލާފައެވެ.

ކެމްޕެއިންގެ ތެރޭގައި ވެސް ދެއްކި ވާހަކައަކީ އެންމެ ފުރަތަމަ ވެސް ކުރައްވާނެ ކަމަކީ، ރައީސް ޔާމީން މިނިވަންކުރުން ކަމަށެވެ. ރައީސް ޔާމީން އެންޑޯސްކުރައްވައިގެން ވެރިކަމަށް އައިސް ހުންނެވި ރައީސް މުއިއްޒު އަމިއްލަފުޅަށް ކެމްޕެއިން ތެރޭގައި ވިދާޅުވީ، އެމަނިކުފާނުގެ ވެރިކަމެއްގައި ރައީސް ޔާމީން ޔަގިނުން ވެސް މިނިވަން ވާނެ ކަމަށެވެ. ރައީސް ޔާމީން މިނިވަން ނުވެއްޖެ ނަމަ، އެއީ ރައީސް މުއިއްޒުގެ ސަރުކާރުން ވެސް ރާއްޖޭގެ ޖުޑިޝަރީއަށް ނުފޫޒު ފޯރުވާތީ ކަމަށެެވެ. މިފަދައިން ވދާޅުވީ ހުދު އެމަނިކުފާނު އަމިއްލަ ފުޅަށެވެ. މިކަމާއި ގުޅުވައި އަދި އެއްކަމެއް ފާހަގަކޮށްލާނަމެވެ. ވެރިކަމުގެ ހުވާކުރުމަށްފަހު ރައްޔިތުންނަށް ދެއްވި ފުރަތަމަ ހިޠާބުގައި އޭ މިހިރަ ފެންނަ ދިދަޔާއޭ ކިޔައި ވާހަކަ ދެއްކުމަށް ފަހު ވިދާޅުވީ، މި ވަގުތުން ފެށިގެން ރާއްޖޭގެ ޖުޑިޝަރީ މިނިވަން ވީ ކަމަށެވެ.

ނަމަވެސް މިހުރިހާ ކަމަކާއި ގުޅުވައި ބުނެލަން އޮތީ ޖުޑިޝަރީ މިނިވަންވެފައިވާ ކަމަށް ބުނާއިރު ރައީސް ޔާމީން މިނިވަން ނުވީމާ ރައީސް މުއިއްޒުގެ ސަރުކާރުން ޖުޑިޝަރީއަށް ނުފޫޒު ފޯރުވާކަމަށް ރައްޔިތުން ގަބޫލުކުރިޔަސް ހެޔޮ ކަމަށް ވިދާޅުވި ވިދާޅުވުމަކީ ތެދެއް ކަމަށް ގަބޫލުކުރަން ދޮރުތަކެއް ހުޅުވިގެން ދާކަމެވެ. އެއީ އެމަނިކުފާނު ވިދާޅުވީ ރައީސް ޔާމީން މިނިވަން ނުވާނީ ނުފޫޒު ފޯރުވާތީ ކަމަށެވެ. އަދިވެސް ރައީސް ޔާމީން ހަމަ ހުންނެވީ ނިމިދިޔަ ސަރުކާރުން ދިން ލުޔެއްގައެވެ. އިތުރު އެއްވެސް ލުޔެއް ރައީސް މުއިއްޒުގެ ފަރާތުން ނުލިބެއެވެ. ކުޑަމިނުން އެމަނިކުފާނުގެ އަޑުއެހުން އަވަސްކުރުމަށް ވެސް އެއްވެސް މަސައްކަތެއް ނުކުރެއެވެ. މިއީ އެ ހުންނެވި މަގާމަށް ގެނެސްދެއްވި ބޭފުޅާއަށް އޮތް ގޮތެވެ.