މާފުށީ ޖަލުގައި "ވާނުވާ" ބަންދުގައި ހުއްޓާ އިއްޔެ ހެނދުނު ނިޔާވި ށ. ފުނަދޫ ޒަމާނީ ވިލާ މުޙައްމަދު ޖަމީލް (45 އަހަރު)ގެ މަރުގެ މައްސަލަ ތަހުގީގުކުރަމުން ގެންދާކަމަށް ހޯމް މިނިސްޓަރު އަލީ އިހުސާން ވިދާޅުވެއްޖެއެވެ.

ޖަމީލުގެ މަރުގައި އިހުމާލު އެބައޮތް ކަމަށާ ފޮޓޯތަކުން ފެންނަ މަންޒަރުތަކުން، އޭނާއަށް އަނިޔާކޮށްފައިވާކަން ހާމަވާކަމަށް ބުނެ ގިނަ ބަޔަކު ވަނީ ސޯޝަލް މީޑިޔާގައި ކަންބޮޑުވުން ފާޅުކޮށްފައެވެ. އެ ކަންބޮޑުވުންތަކަށް އިޝާރާތްކުރައްވާ އިހުސާން ކުރެއްވި އެކްސް ޕޯސްޓެއްގައި ވިދާޅުވީ، އިއްޔެ ހެނދުނު މާފުށީ ޖަލުގައި ގައިދީއަކު މަރުވުމާ ގުޅޭ ގޮތުން ދަންނަވާލަން ބޭނުންވަނީ ޖަލުގައި މަރުވާ ކޮންމެ މައްސަލައަކީ އިންސްޕެކްޓަރ އޮފް ކަރެކްޝަނަލް ސަރވިސްއިން މިނިވަންކަމާއެކު ބަލަމުންދާ މައްސަލައެއް ކަމުގައެވެ.

ގައިދީއަކު މަރުވުމުގައި ހިމެނޭ ހާލަތާ މެދު ޝައްކު އުފެދިއްޖެ ނަމަ، ހިއުމަން ރައިޓްސް ކޮމިޝަނުން މިނިވަން ތަހުގީގެއް ހިންގާނެ ކަމަށްވެސް އިހުސާން ވިދާޅުވިއެވެ.

މި މަރާއި ގުޅޭ ފުރިހަމަ ތަހުގީގެއް ހިންގުމަށާ، އާއިލާގެ ހުއްދައާއެކު ޖަމީލުގެ ހަށިގަނޑުގެ ޕޯސްޓްމޯޓަމް ހެދުމަށްވެސް މިހާރު ފުލުހުންނަށް އެންގިކަމަށްވެސް އިހުސާން ވިދާޅުވެފައިވެއެވެ. އިހުސާން ވިދާޅުވެފައިވަނީ ކަރެކްޝަންސްއިން މި މައްސަލައިގެ ތަހުގީގަށް ހުރިހާ އިދާރާތަކަކަށް ފުރިހަމައަށް އެއްބާރުލުން ދޭނެ ކަމުގައެވެ

އިހުސާން ވިދާޅުވެފައިވާ ގޮތުގައި ޖަމީލު މަރުވި ސަބަބެއްގެ ގޮތުގައި ޑޮކްޓަރުން ވިދާޅުވެފައިވަނީ  "ކާޑިއޯޕަލްމޮނަރީ އެރެސްޓް" (ހިތް ހުއްޓިގެން) ކަމަށެވެ.

އިތުރަށް އިހުސާންގެ އެކްސް ޕޯސްޓުގައި ވިދާޅުވެފައިވަނީ އެ ގޮޅީގެ ސީސީޓީވީ ފުޓޭޖުން ފެންނަ ގޮތުގައި ގައިދީ އޭނާގެ އެންމެ ފަހު ވަގުތުތަކުގައި ނަމާދުކުރާ ތަން ފެނުނު އިރު، އޭނާގެ ހަށިގަޑު ފެނިފައިވަނީ ސަޖިދައަށް އޮއްވާ ކަމުގައެވެ. އަދި ކަރެކްޝަންސްއިން ސީސީޓީވީ ފުޓޭޖް ހުރިހާ ތަހުގީގީ އިދާރާތަކާ ވެސް ހިއްސާ ކުރާނެ ކަމަށްވެސް އިހުސާން ވިދާޅުވެފައި ވެއެވެ.

ޖަމީލުގެ މަރާއި ގުޅޭގޮތުން ކަރެކްޝަންސްއިން ބުނެފައިވަނީ އޭނާގެ މަރާއި ގުޅުންހުރި ކަންކަން ސާފުވާނީ ކުރެވެމުންދާ ތަހުގީގުތައް ނިމުމުންކަމަށެވެ.

ޖަމީލުގެ ޕޯސްޓް މޯޓަމް ހަދަން ފުލުހުންނަށް ވަޒީރު އަމުރުކުރި ނަމަވެސް އާއިލާއިން އެކަމަށް އެއްބަސްނުވމުން މިހަރު ވަނި ހަށިގަނޑު ވަޅުލާފައެވެ.