"ވާނުވާ" ބަންދުގައި ހުއްޓާ މާފުށީ ޖަލުގައި ނިޔާވި އިއްޔެ ހެނދުނު ނިޔާވި ށ. ފުނަދޫ ޒަމާނީ ވިލާ މުޙައްމަދު ޖަމީލް (45 އަހަރު) ނިޔާވެފައިވާކަން އެނގުނީ އޭނާ ކޮބައިތޯ ބަލާނުލާ ހަތަރު ގަޑިއިރު ހޭދަވީ ފަހުން ކަމަށް ދިވެހި ފުލުހުން ހާމަކޮށްފިއެވެ.

ޖަމީލުގެ މަރާ ގުޅިގެން ގިނަ ތުހުމަތުތަކެއް ދައުލަތަށް އަމާޒުވަމުން ދަނިކޮށް ފުލުހުންގެ ފަރާތުން ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން ކަރެކްޝަނަލް ސާވިސްއިން ވިދާޅުވީ، ޖަމީލުގެ ޚަބަރެއް ބަލާނުލާ ހަތަރު ގަޑިއިރު ހޭދަވެގެން ދިޔަ ކަމަށާ އެހެން އެކަންވީ އޭނާގެ އަމަލުތަކުން އަޅުކަމާ މަޝްއޫލުވެގެން އުޅޭ ފަދަ މަންޒަރުތަކެއް ފެންނަމުންދިއުމުން ކަމަށެވެ. ނަމަވެސް އެއީ އެކަން ވެގެން ވާނެ ގޮތެއް ނޫން ކަމަށް ގަބޫލުކުރާ ކަމަށާ އަދި އެފަދަ ކަންކަން ކުރިއަށް އޮތްތަނުގައި ރަގަޅުކުރުމަށް މަސައްކަތްކުރާނެ ކަމަށް ވެސް ވިދާޅުވިއެވެ.

ކަރެކްޝަނުން ބުނީ އާންމު ގޮތެއްގައި ގަޑިއަކުން އެއް ފަހަރު ގައިދީންގެ ހާލު ބަލަން ޖަލު އޮފިސަރުން ގޮޅިތަކަށް ދާ ކަމަށެވެ.

ކަރެކްޝަނަލް ސާވިސްގެ ބެލުމުގެ ދަށުގައި ހުރި މީހަކު ހަރަކާތެއް ނެތި ހަތަރު ގަޑިއިރު އެހެން އޮތުމަކީ އެއީ ވެގެން ވާނެ ކަމެއް ނޫންކަމަށް ހޯމް މިނިސްޓަރު އަލީ އިހުސާންވެސް ވަނި އިއުތިރާފުވެވަޑައިގެންފައެވެ. އަދި އެކަން އެއީ ރަގަޅު ކުރަން ޖެހޭ ކަމެއްކަމަށް ވެސް ވިދާޅުވިއެވެ.

އެހެންކަމުން ގޮޅި ހުޅުވާފައި ހުއްޓަސް އަދި ސުޖޫދުގައި ގައިދީ އޮތަސް ގިނަ އިރުވާ ނަމަ ބަލާނެ ކަމަށް ވެސް އިހުސާން ވިދާޅުވިއެވެ.

ޖަމީލު ޖަލުގައި "ވާނުވާ" ބަންދުގައި ބަހައްޓާފައި ހުރިއިރު އޭނާއަކީ ނަފްސާނީ ބަލީގެ މީހެއްކަން ފާހަގަކޮށްލެވެއެވެ. އަދި އޭނާ ގެންދިޔައީ ބޭސްވެސް ކަމުންކަން ފާހަގަކޮށްލެވެއެވެ.

ޖަމީލު ބަންދުކޮށްފައި ހުރީ، ކުރީގެ ސްޓޭޓު މިނިސްޓަރު އަލީ ސޯލިހަށް ހަމަލާދިން މައްސަލައެއް ގައެވެ. އެގޮތުން ޖަމީލުގެ މައްޗަށް އުފުލާފައި ވަނީ ނުރައްކާތެރި އަދި ތޫނު ހަތިޔާރު ބޭނުންކޮށްގެން މާރާމާރީ ހިންގުމުގެ ދައުވާއެވެ.