ރައީސް ޑރ. މުހައްމަދު މުއިއްޒުގެ ސަރުކާރަކީ ސިޔާދަތީ ބާރު ފުރިހަމނުވެ އޮތް ސަރުކާރެއް ކަމަށް ރައީސް އަބްދުﷲ ޔާމީން ވިދާޅުވެއްޖެއެވެ.

ދަ ފްރޮންޓު އޮފީހުގައި ބޭއްވި ޖަގަހަ ޖަލްސާއެއްގައި ވާހަކަ ދައްކަވަމުން ރައީސް ޔާމީން ވަނީ މި ސަރުކާރުން އިންޑިއާ އައުޓު ވަމުން ވެރިކަމަށް އައިސް އިންޑިއާ ކައިރިއަށް ސަލާމުގެ ނާށިގަނޑު ހިފައިގެން ދިއުމަކީ ދިވެހިން ލަދު ގަންނުވާލުން ކަމަށާ ރާއްޖޭގެ އަގު ބައިނަލްއަގްވާމީ މަސްރަހުގައި ވައްޓާލުން ކަމަށެވެ.

މީގެ އިތުރުން ރާއްޖޭގައި އިންޑިއާ ސިފައިން ތިބިކަމަށް އިންތިހާބުގެ ކުރިން ބުނަމުން އައިސް އިންތިހާބަށް ފަހު އިންޑިއާއަށް ގޮސް އިންޑިއާ ޓީވީއަކަށް އިންޓަރވިއު ދެމުން ރާއްޖޭގައި އިންޑިއާ ސިފައިންތިބިކަން ވެސް އެނގޭ ކަމަށް ނުހެދިކަން ރައީސް ޔާމީން ފާހަގަކުރެއްވިއެވެ.

އެފަދަ ކަންކަން އެހެން ކުރުމުން މި ގައުމުގެ މިނިވަންކަމާ ސިޔާދަތާ މެދު ވެސް ސުވާލު އުފެދޭކަމަށް ރައީސް ޔާމީން ވިދާޅުވިއެވެ.

އަދުގެ ސަރުކާރުގެ ވެރިންގެ ގޮތް އެންމެ ރަގަޅަށް އެނގިވަޑައިގަންނަވާނީ އެމަނިކުފާނަށް ކަމަށާ އެގޮތުން އިންޑިއާ އައުޓު ގަރާރުތައް ފަދަ ކަންކަމާ މެދު ސަރުކާރުން ގެންގުޅޭ އުސޫލަށް ރައީސް ޔާމީން ފާޑުވިދާޅުވިއެވެ.