‎ރިޔާސީ އިންތިހާބުގެ ކެމްޕޭނުގައި މިހާރުގެ ރައީސް ޑރ. މުހައްމަދު މުއިއްޒު ވެވަޑައިގެންނެވި ވައުދާއި ޚިލާފުވެ މަސް ގަންނަ އަގު 20ރ އަށްވުރެ ދަށްކޮށްފިއެވެ.

މި ސަރުކާރު ވެރިކަމާ ހަވާލުވެވަޑައިގެންނެވިއިރު މިފްކޯއަށް ރޯމަސް ގަންނަމުން ދިޔައީ ކިލޯއެއް 25ރ. އަށެވެ.

ނަމަވެސް ވެރިކަމަށް ވަޑައިގެން މަހުގެ އަގު 20ރ ބަދަލުކުރަނީ މަސްވެރިންނަށް ދޭން ޖެހޭ ފައިސާ ބަރާބަރަށް ދިނުމަށް ކަމަށް ފިޝަރީޒް މިނިސްޓަރ އޭރު ބުނެފައިވެއެވެ.

ނަމަވެސް މި ސަރުކާރުން ވެސް ދައުލަތުގެ ހިންގުމުގެ ހަރަދު ބޮޑުކޮށް، ކުންފުނިތަކަށާއި ސަރުކާރަށް ސިޔާސީ ބޭނުމަށް މުވައްޒަފުން ގިނަކުރުމުގެ ސަބަބުން މާލީ ހާލަތު ސޮއްސާލައިގެން ދިޔުމާ ގުޅިގެން މަސްވެރިންނަށް ދޭންޖެހޭ ފައިސާ ދިނުމަށް ދަތިތައް ކުރިމަތިވެ، އެތައް މިލިއަން ރުފިޔާ އަށް ވަނީ ދަރައިފަ އެވެ.

މިކަމަށް ހައްލެއް ގެނައުމަށް ސަރުކާރުން ވަނީ ރޭ މަސް ގަންނަ އަގުތައް ހާމަކޮށްފައެވެ.

ގަނޑުކުރި މަސް ގަންނަ އަގު

* 1.5 ކިލޯއަށް ވުރެ ބަރު މަސް - ކިލޯއަކަށް 16ރ.

* 1.5 ކިލޯ ހަމަނުވާ މަސް - ކިލޯއަކަށް 7ރ.

ގަނޑު ނުކުރާ މަސް ގަންނަ އަގު

* 1.5 ކިލޯއަށް ވުރެ ބަރު މަސް - ކިލޯއަކަށް 14ރ.

* 1.5 ކިލޯ ހަމަނުވާ މަސް - ކިލޯއަކަށް 5ރ

މަސްވެރިން މިވީ 7 މަސްވީއިރު ނިކަމެތިކޮށްފައިވާއިރު، އެ ފަރާތްތަކަށް ފައިސާ ދޭން ކަމަށް ބުނެ ގެނައި ބަދަލުން ދޭން ޖެހޭ ހުރިހާ ފައިސާއެއް ދޭން އަދި 7 މަސް ބޭނުންތޯ މަސްވެރިން ވަނީ ސުވާލު އުފައްދާފައެވެ.