ރައްޔިތުންގެ މަޖިލީހުގެ ސަލާމަތީ ހިދުމަތްތަކާ ބެހޭ ކޮމިޓީ (241 ކޮމިޓީ) އިން ފުލުހުންނާއި ހޯމް މިނިސްޓަރު އަލީ އިހުސާންއާއެކު ބޭއްވި ބައްދަލުވުން ސިއްރުކޮށްފި އެވެ.

މިއަދުގެ ކޮމިޓީ ބައްދަލުވުން ފައްޓަވަމުން މުގައްރިރު އަދި އޭދަފުށީ ދާއިރާގެ މެމްބަރު އަހްމަދު ސަލީމް ވިދާޅުވީ މިއަދުގެ ކޮމިޓީގައި ސިއްރިއްޔާތުގައި އިތުރު މައުލޫމާތުތަކެއް ދެއްވާނެ ކަމަށް ހޯމް މިނިސްޓަރު ވިދާޅުވެފައިވާ ކަމަށެވެ.


ކޮމިޓީ ސިއްރުކުރަން ކެލާ ދާއިރާގެ މެމްބަރު އަބްދުالله ޝަރީފް ހުށަހެޅުއްވުމުން ތާއީދު ކުރެއްވީ ހުޅުދޫ ދާއިރާގެ މެމްބަރު މުހައްމަދު ޝާހިދެވެ.

އެއަށްފަހު ނެގި ވޯޓު ފާސްކުރީ ހާޒިރުވި ހުރިހާ މެމްބަރުންގެ އިއްތިފާގުންކަން ފާހަގަކޮށްލެވެއެވެ.

މަޖިލީހުގެ 241 ކޮމިޓީއަކީ ގާނޫނު އަސާސީގެ 241 ވަނަ މާއްދާއިން ބާރުދީފައިވާ ކޮމިޓީ އެވެ.

އެ ކޮމިޓީގެ މައިގަނޑު މަސްއޫލިއްޔަތަކީ ސަލާމަތީ ހިދުމަތްތައް ހިނގާ ނުހިނގާ ގޮތް ބެލުމާއި ގައުމީ ސަލާމަތުގެ ކަންކަން ދިރާސާކުރުމާއި ގައުމީ ސަލާމަތުގެ ސިޔާސަތުތަކަށް ގެންނަންޖެހޭ ބަދަލެއް އޮތްނަމަ، އެކަމެއް ފާހަގަކޮށް އެކަމެއް މަޖިލީހަށް ހުށަހެޅުންކަން ފާހަގަކޮށްލެވެއެވެ.