ބޮޑު ފިލްމެއް ކުޅިގެން އެ ފިލްމެއް ކާމިޔާބުވެ، އެ ފިލްމަށް "އޮސްކާރ" އެވޯޑެއް ލިބުމުން އެ ފިލްމުގެ ވާހަކަ ކިތަންމެހާ ވެސް ބަޔަކު ދައްކާނެއެވެ. ނަމަވެސް އެ ކާމިޔާބީއަކީ އެއީ ކޮޕީ ފިލުމަކަށް ލިބޭނެ ފަޚްރެއް ނޫނެވެ.

އެގޮތުން މިސަރުކާރުން ވަރަށް ވަރުގަދަ ކާމިޔާބީއެއް ލިބިގެން ގެންދަނީ އުފާ ފާޅުކުރަމުންނެވެ. ގަސްތުގައި ކަމެއް ނުވަތަ ބޭއިހްތިޔާރުގައި ކަމެއް ދެން އަޅުގަނޑަކަށް ނޭނގެއެވެ.

އަވައްޓެރި ގައުމު އިންޑިޔާގެ ބޮޑު ވަޒީރަށް ރާއްޖޭގެ 3 ނައިބުން ފުރައްސާރަ ކުރި މައްސަލައިގައި އެ ގައުމުން ރާއްޖެ ބޮއިކޮޓް ކުރަން ގޮވާލި ދުވަސްވަރު، ރައީސް މުއިއްޒު ޗައިނާއަށް ކުރެއްވި ރަސްމީ ދަތުރުފުޅު ނިންމަވާލެއްވުމަށްފަހު އެއާޕޯޓްގައި ވާހަކަ ދައްކަވަމުން ވިދާޅުވީ އިންޑިޔާއަށް ބަރޯސާނުވެ ކާޑުގެ ބާވަތްތައް ތުރުކީ ވިލާތުން ރާއްޖެ ގެންނާނެކަމަށެވެ.

ތުރުކީ ވިލާތުން ކާޑު ހިފައިގެން ފުރި ބޯޓު ރާއްޖެ ބަނދަރު ނުކޮށްގެން ހުރިހާ އެންމެން އެވާހަކަ ދައްކަން ފެށީ ސަބަބެއް ވެސް ނެތި ނޫނެވެ. ވެރިޔާ އެފަދަ މޭރަމަކުން ވާހަކަފުޅު ދައްކަވައިގެން ރައްޔިތުންނަށް ހުވަފެން ދެއްކީމާ ވާނީވެސް އެހެންތާއެވެ.

ކާޑު ނައިސްގެން ހުރިހާ އެންމެން ރައީސް މުއިއްޒު ވައުދު ނުފުއްދާކަން ހާމަވެއްޖެ ކަމަށް ކިޔަން ފެށުމުން ދެން ކުއްލިއަކަށް ތުރުކީން ފުށް ގެނެސް ކެވުނު އިރުވެސް ނޭނގުނޭ ކިޔާފައި ސަރުކާރުގެ އިސް އޮފިޝަލުން މީސްމީޑިޔާގައި ޕޯސްޓްތައް ކުރަން ފަށައިފިއެވެ. ދިފާއުގައި ސްޓޭޓް ޓްރޭޑިން އޯގަނައިޒޭޝަން (އެސްޓީއޯ) ވެސް ނިކުތެއެވެ.

އެސްޓީއޯ އިން ބުނާގޮތުގައި "ތުރުކީ އިން، ފުށް ގެނެސްފައިވަނީ މި އަހަރުގެ އޭޕްރިލް މަހު"ގައިއެވެ. ސުވާލަކީ އޭޕްރިލް މަހުގައި ތުރުކީ އިން ފުށް ގެނެސްފައިވާއިރު މިކަން ސަރުކާރުން ހާމަނުކުރީ ކީއްވެތޯ؟ ސަރުކާރަށް ސަނާ ކިޔަން ތިއްބަވާ ސިޔާސީ މުވައްޒަފުން އެވާހަކަ ސޯޝަލް މީޑިޔާގައި ނުގޮވީ ކީއްވެބާ؟ ސަރުކާރުގެ މެމްބަރުންތައް މަޖިލިސް ކުރާ ތަޅުމުގައި އެވާހަކަ ނުދެއްކެވީ ކީއްވެބާ؟

ރައީސް މުއިއްޒު ވަނީ ތުރުކީން ރާއްޖެއަށް އެއް އަހަރު ދުވަހު ބޭނުންވާ ވަރަށް ވުރެެ 10 އިންސައްތަ އިތުރަށް ކާޑުގެ ބާވަތްތަށް އެތެރެކުރުމަށް އެއްބަސްވެފައިވާ ކަމަށް ވިދާޅުވި ނަމަވެސް ހަގީގަތަކީ ތުރުކީ އަކީ ރާއްޖެއަށް އަބަދުވެސް ފުށް ވިއްކާ ގައުމެއްކަމެވެ. އެގޮތުން ރާއްޖެއަށް ތުރުކީ އިން ފުށް ގެންނަތާ މިހާރު 10 ވަރަަކަށް އަހަރުވެއްޖެއެވެ. މިއީ ރައީސް މުއިއްޒު ކުރެއްވި ނުވަތަ އެމަނިކުފާނު ކުރައްވަން ފެއްޓެވި ކަމެއް ނޫނެވެ.

ތުރުކީ އިން ފުށް ގެނެވިގެން، ހަގީގަތުގައި ގަނެގެން ގެނެސްފައި ސަރުކާރަށް ކުރެވުނު މޮޅުކަމެއް ކަމަށް ހަދައިގެން އެވާހަކަ ދައްކާއިރު، މި ސަރުކާރު އައި ފަހުން ސަރުކާރަށް ކުރެވުނު އެއްވެސް ކަމެއް ނެތެވެ. މި ސަރުކާރު އައި ފަހުން ފެނުނީ ހަގީގަތުގައި ވެސް ތުރުކީ ފުށެވެ. ސަރުކާރުގެ އެތެރެފުށެެއް ނުފެނުނެވެ. ވެރިކަމަށް 7 މަސްވެގެން ދިޔައިރު ފުއްދާނެކަމަށް ވިދާޅުވި އެެއްވެސް ވައުދެއް ރައީސް މުއިއްޒަކަށް ފުއްދިފައި ނެތެވެ.

ތުރުކީ ފުށް ގެނެސް އޭގެން ރޮށި ފިހެގެން ކައި ހުސްވިއިރު ނޭނގޭއޭ ނޫނީ ފުށުން ފުށް ޖަހަން ބޭނުން ބަޔަކު ފުށުން ފުށް ޖަހާށޭ ނޫނީ ކުރިގެ މެމްބަރު ވައްޑެއަށް ކޮންމެ ވެސް މީހަކު ރޮށި ފިހެފައި ކާންދާށޭ ސަރުކާރުންގެ ސަސްޕެންޑެންޑް ނައިބުން ބުނަމުންދާިއރު މިއުޅެނީ އައު ކުކުޅަކަށް ގައު ބިހެއް އެޅިގެން ކަން މުޖައްރިބު ޔަގީނެވެ.