މާފުށި ޖަލުގެ، އަށް ޔުނިޓެއް ބަލައި ފާސްކުރުމަށް ފުލުހުން ހިންގި އޮޕަރޭޝަނެއްގައި 29 މޯބައިލް ފޯނާއި ހަތަރު ބަނގުރާ އަތުލައިގަނެވުނު ކަމަށް ފުލުހުން ހާމަކޮށްފިއެވެ.

މިކަން ހާމަކޮށްފައިވަނީ ފުލުހުން ނެރުނު ނޫސް ބަޔާނެއްގައެވެ.

ފުލުހުން ހާމަކޮށްފައިވާ ގޮތުގައި މި އޮޕަރޭޝަނަކީ މާފުށި ޖަލަށް ގަވައިދާ ހިލާފަށް އެތެރެކުރަމުންދާ ތަކެތި އަތުލައި، ޖަލުގައި ގާނޫނާއި ގަވައިދާ ހިލާފަށް ހިންގާ ހަރަކާތްތައް ހުއްޓުވުމަށް ހޯމް މިނިސްޓްރީގެ އެދުމުގެ މަތިން ކުރިއަށްގެންދާ އޮޕަރޭޝަނެއް ކަމަށެވެ.

އެގޮތުން ބަލައިފާސްކުރި ޔުނިޓުތަކުން 29 މޯބައިލް ފޯނާއި، 17 ޗާޖަރާއި، 12 ހެޑްސެޓާއި، 3 ޕެންޑްރައިވާއި، 3 އިއާ ޕޮޑާއި 3 ކޭބަލް އަދި ދެ ސިމް ކާޑުގެ އިތުރުން ހަތަރު ބޮގަރު ފުޅި ފެނިފައިވާކަމަށް ބަޔާނުގައިވެއެވެ.

މި އޮޕަރޭޝަންގައި 183 ފުލުހަކާއި، އެމްއެންޑީއެފްގެ 81 ސިފައިންނާއި، ކަރެކްޝަންސްގެ 40 އޮފިސަރުން ހިމެނޭ ގޮތަށް 304 އޮފިސަރުން ބައިވެރިވީ ކަމަށް ފުލުހުން ބުނެފައިވެ އެވެ. އަދި ޖަލުން ފެނުނު ތަކެތި ފުލުހުންގެ ބެލުމުގެ ދަށަށް ގެންގޮސް، މައްސަލަތައް ތަހުގީގު ކުރަން ފަށާފައިވާ ކަމަށް ފުލުހުން ބުންޏެވެ.

ފުލުހުން މި އޮޕަރޭޝަން ކުރިއަށްގެންދާއިރު، ޖަލު އޮފިސަރުންނާ ގުޅިގެން ކުށްވެރިން ޖަލަށް ތަކެތި އެތެރެކުރާ މައްސަލައިގައި ބޮޑު ތަހުގީގެއް ވަނީ ފަށާ 12 އޮފިސަރުން މައްސަލައިގައި މިހާތަނަށް ވަނީ ހައްޔަރުކޮށްފައެވެ.