"ވާނުވާ" ބަންދުގައި ހުއްޓާ، މާފުށީ ޖަލުގައި ނިޔާވި މުހައްމަދް ޖަމީލްގެ މަރުގެ މައްސަލަ ހިއުމަން ރައިޓްސް ކޮމިޝަން އޮފް ދަ މޯލްޑިވްސް (އެޗްއާރްސީއެމް) އިން ބަލަމުންދާ ކަމަށް އެ ކޮމިޝަނުން ބުނެފިއެވެ.

އެ ކޮމިޝަނުން ބުނީ މިނިވަންކަން ގެއްލޭ ގޮތަށް ދަޢުލަތުގެ ބެލުމުގެ ދަށުގައި ހުރި ފަރާތެއް މަރުވެއްޖެ ޙާލަތެއްގައި އެކަން ހިނގާދިޔަ ގޮތް ބަލައި، މަރުވި ފަރާތުގެ ހަށިގަނޑު ބެލުމަށް ކޮމިޝަނުގެ ރެޕިޑް ރެސްޕޮންސް ޓީމު (އާރު.އާރު.ޓީ) ވަގުތުން ހަރަކާތްތެރިވާން ފަށާނެ ކަމަށެވެ.

އެ އުސޫލުގެ ދަށުން ޖަމީލުގެ މައްސަލާގައި ވެސް ރެޕިޑް ރެސްޕޮންސް ޓީމް ހަރަކާތްތެރިވެ، ޖަމީލުގެ ހަށިގަނޑު ބަލައި ފޮޓޯ ނަގައި ކަރެކްޝަންސް ސާވިސްގެ އޮފިސަރުންނާއި އާއިލާގެ ފަރާތުން މައުލޫމާތު ސާފުކޮށް އޭނާގެ މެޑިކަލް ފައިލް ބަލާފައިވާ ކަމަށް އެޗްއާރުސީއެމުން ބުންޏެވެ.

މީގެ އިތުރުން މާފުށީ ޖަލަށް ޒިޔާރަތްކޮށް، އެ ހާދިސާގެ ސީސީޓީވީ ފުޓޭޖާއި ޖަމީލު ހުރި ގޮޅި ބެލުމުގެ އިތުރުން އެ ޔުނިޓުގައި ތިބި މީހުންނާއި ޖަމީލު ކުރިން ހުރި ގޮޅީގައި ތިބި މީހުންގެ ފަރާތުން މައުލޫމާތު ސާފުކޮށްފައިވާނެ ކަމަށް އެޗްއާރުސީއެމުން ބުނެފައިވެއެވެ.

މުޙައްމަދު ޖަމީލުގެ ހަށިގަނޑު ބަލާ، ފޮޓޯ ނަގާ، މޯލްޑިވްސް ކަރެކްޝަނަލް ސަރވިސްގެ އޮފިސަރުންގެ ފަރާތުންނާއި، އާއިލާގެ ފަރާތުން މަޢުލޫމާތު ސާފުކޮށް، މުޙައްމަދު ޖަމީލްގެ މެޑިކަލް ފައިލް ބަލާފައިވާނެ ކަމަށް އެ ކޮމިޝަނުން ހާމަކުރި މައުލޫމާތުގައިވެއެވެ.

މި މައްސަލައިގައި ބަލަންޖެހޭ އިތުރުކަންކަން ކޮމިޝަނުން ބަލަމުންދާ ކަމަށް އެޗްއާރްސީއެމްގެ އިއުލާނުގައިވެއެވެ.

ޖަމީލް ނިޔާވި ޖަލުގައި ލިބުނު އަނިޔާތަކަށް އެއްވެސް ފަރުވާއެއް ނުލިބިކަމަށް އާއިލާއާ އަދި އާންމު ވެސް ބުނެފައިވެއެވެ. ނަމަވެސް އެ ވާހަކަތައް ފުލުހުންނާއި ކަރެކްޝަންސްއިން ވެސް ވަނީ ދޮގުކޮށްފައެވެ. ހިނެވުމުގެ ނަމަވެސް ތެރޭގައި ނަގާފައިވާ ޖަމީލްގެ ހަށިގަނޑުގެ ފޮޓޯތަކާއި، ކަފުންކޮށްފައި ވަނިކޮށް ނަގާފައިވާ ފޮޓޯތަކުން ފެންނަ ގޮތުގައި އޭނާގެ ގައިގައި ނޫފައިގެންފައި ހުރި ތަންތަން ފެންނަން ހުއްޓެވެ.