ސަސްޕެންޝަންގައި ތިއްބެވި ޔޫތް މިނިސްޓްރީގެ ތިން ނައިބުން ކަމަށްވާ މަލްޝާ ޝަރީފް، މަރިޔަމް ޝިއުނާ އަދި މަހުޒޫމް މަޖީދުގެ ސަސްޕެންޝަނާ ބެހޭގޮތުން ސުވާލު ކުރާ ކޮންމެ ފަހަރަކު ރައީސް އޮފީހުގެ އިސް ތަރުޖަމާނު ހީނާ ވަލީދު ހަނު ހުންނަވާކަން ފާހަގަވެެއްޖެއެވެ.

އިންޑިޔާގެ ބޮޑު ވަޒީރު ނަރެންދްރަ މޯދީއަށް ޝޯޝަލް މީޑިޔާގައި ފުރައްސާރަކުރި މައްސަލައިގައި މި ތިން ނައިބު ވަޒީރުން ސަސްޕެންޑްކޮށްފައިވަނީ މި އަހަރުގެ ޖެނުއަރީ މަހުގެ 7 ވަނަ ދުވަހުއެވެ.

ސަސްޕެންޝަންގައި ތިބި ކަމުގައި ވީނަމަވެސް އެ ފަރާތްތަކަށް ރައްޔިތުންގެެ ފައިސާއިން މުސާރައާއި އެލަވަންސް ދެމުންގެންދަވާތީ ގިނަ ބަޔަކު އަންނަނީ ކަންބޮޑުވުން ފާޅުކުރަމުންނެވެ.

އެހެންކަމުން އެ ބޭފުޅުންގެ ސަސްޕެންޝަނަށް ގޮތެއް ނިންމަވާނީ ކޮންދުވަހަކުންތޯ "ތޭރަ އޮންލައިން" ގެ ފަރާތުން ހީނާ އާ ސުވާލު ކުރީ މެއި މަހުގެ 18 ވަނަ ދުވަހުއެވެ.

އެ ސުވާލަށް ހީނާ ޖަވާބު ދެއްވީ މެއި މަހުގެ 19 ވަނަ ދުވަހުއެވެ. ޖަވާބުގައި ހީނާ ވިދާޅުވީ " އެ މީހުންގެ ސަސްޕެންޝަނަށް ގޮތެއް ނިންމަވާނެ" ކަމަށެވެ.

އޭގެފަހުން ވެސް 3 ނައިބުންގެ ސަސްޕެންޝަނަށް ގޮތެއް ނުނިންމަވައިގެން އަނެއްކާވެސް "ތޭރަ އޮންލައިން" ގެ ފަރާތުން ހީނާ އާ ސުވާލުކޮށްފައިވަނީ ޖޫން މަހުގެ 1 ވަނަ ދުވަހުއެވެ.

އެ ދުވަހު އެ ސުވާލަށް ހީނާ އެއްވެސް ޖަވާބެއް ދެއްވާފައިނުވެއެވެ.

އެޔަށްފަހު މައުލޫމާތު ހޯދައި ލިބިގަތުމުގެ ދަށުން "ތޭރަ އޮންލައިން" ގެ ފަރާތުން ޔޫތް މިނިސްޓްރީގައި މި ތިން ނައިބުންގެ މުސާރައާއި އެލަވަންސްގެ ތަފްސީލް ހޯދުމަށް އެދުމުން އެ މައުލޫމާތު އެ ވުޒާރާއިން ހިއްސާކުރުމުން އަނެއްކާވެސް އިއްޔެ ހީނާ އާ "ތޭރަ އޮންލައިން" ގެ ފަރާތުން ވާނީ މި ނައިބު ވަޒީރުންގެ ސަސްޕެންޝަން އާއި މެދު ގޮތެއް ނުނިންމަވާ ސަބަބު ހޯދުމަށް މެސެޖް ކޮށްފައެވެ.

ނަމަވެސް ހީނާ އެއްވެސް ޖަވާބެއް ދީފައިނުވާތަ "ތޭރަ އޮންލައިން" ގެ ފަރާތުން ގުޅުމުން ފޯނުވެސް ނަންގަވާފައި ނުވާކަން ފާހަގަކޮށްލެވެއެވެ.

ހީނާ ފަދަ ފަރާތެއް ސަރުކާރުގެ އިސް ތަރުޖަމާނުގެ މަގާމަށް އައްޔަން ކުރުމުން ގިނަ ނޫސްވެރިން ތިބީ ނޫސްވެރިންްނަަށް ދާއިރާގައި މަސައްކަތް ކުރަން ފަސޭހަ ވާނެ ފަދަގޮތަކަށް ހީނާ ކަންތައް ކުރައްވާނެ ކަމުގެ އުންމީދުގައެވެ.

ނަމަވެސް ފެނިގެންދަނީ ހީނާއަށް ހީނާގެ ޒިންމާ ފުރިހަމަ ގޮތުގައި އަދާނުކުރެވޭ މަންޒަރެވެ.