ރައީސް އަބްދުﷲ ޔާމީން ގެންގުޅުއްވި ސިޔާސަތުގެ ދަށުން ފުށިދިއްގަރު ފަޅު ހިއްކުން ރަސްމާލެއަށް ނަން ބަދަލުކޮށް މި ސަރުކާރުން ބަޖެޓު ފާސްކުރުމަކާ ނުލާ ފެށި މަޝްރޫއަށް އަނެއްކާވެސް 77 މިލިއަން ރުފިޔާ ޚަރަދުކޮށްފިއެވެ.

އެގޮތުން "އަދަދު" ނޫހުގައި ރިޕޯޓުކޮށްފައިވާ ގޮތުގައި، ދައުލަތުގެ ބަޖެޓުން އެންމެ ފައިސާ ފޮއްޗެއް ވެސް ހަރަދުނުކޮށް ހިއްކާނެ ކަމަށް ރައީސް ޑރ. މުހައްމަދު މުއިއްޒު ވައުދުވެވަޑައިގެންނެވި "ރަސްމާލެ" ހިއްކުމަށް ހަވާލުކުރި ކުންފުންޏަށް ފައިސާ ނުހޯދިގެން ކޮންޓްރެކްޓު ބާތިލު ކުރުމަށް ފަހު، އެ މަޝްްރޫއުގެ ދަށުން ހިއްކާ ފުރަތަމަ 27 ހެކްޓަރުގެ ބާކީ ބައި ހިއްކުމަށް 77 މިލިއަން ރުފިޔާ ހައުސިން ޑިވެލޮޕްމަންޓު ކޯޕަރޭޝަން (އެޗްޑީސީ) އިން ވަނީ ދޫކޮށްފައެވެ.

ފެބްރުއަރީ މަހުން ފެށިގެން ފުށިދިއްގަރުފަޅު ހިއްކުމުގެ އެއްވެސް މަސައްކަތެއް ކުރިއަށް ނުގެންގޮސް، އޮތުމަށް ފަހު އަލުން މަސައްކަތް ފެށީ، 77 މިލިއަން އަށް ވުރެ ގިނަ ރުފިޔާ ދިނުމުން މި ޖުލައި 1 ގައި ކަމަށްވެސް ރިޕޯޓުކޮށްފައިވެއެވެ. އަދި މިހާރު އަނެއްކާ ފުށިދިއްގަރުފަޅު އަލުން ހިއްކަން ފެށީ ރާޖޫއަށް ގަނޑުކޮށް ގިނަ އަދަދެއްގެ ފައިސާ ދީގެންނެވެ.

އެގޮތުން ރާޖޫއަށް 77 މިލިއަން ރުފިޔާ ދިނީ ސައިޓް ޖޭ ހިއްކައި ނިންމައި، އެތަނުގެ ރިވެޓްމަންޓު ޖަހައި ގޮނޑުދޮށް ހިމާޔަތް ކުރުމަށެވެ. ނަމަވެސް، ރާޖޫއަށް ފައިސާ ދިންކަން އެޗްޑީސީން ވެސް އަދި ސަރުކާރުން ވެސް ހާމައެއް ނުކުރެއެވެ.

ފުށިދިއްގަރު ފަޅު ހިއްކަން ފެށީ އެތަން ހިއްކާ ކުންފުންޏަށް ހުޅުމާލެއިން 10 ހެކްޓަރު އަދި ރަސްމާލެއިން 60 ހެކްޓަރު ލިބޭ ގޮތަށެވެ.

ފުށިދިއްގަރުފަޅު ހިއްކަން 77 މިލިއަން ރުފިޔާ ދައްކާފައިވާކަން ހާމަވެފައި މިވަނީ، ދައުލަތުގެ ބަޖެޓުގެ ތާށިކަން އިންތިހާއަށް ބޮޑުވެ ހަރަދު ކުޑަކުރަން ވަރުގަދަ ފިޔަވަޅުތަކެއް ތަންފީޒުކުރަން ފަށާފައި ވަނިކޮށެވެ.