ރާއްޖޭގައި ޑޮކްޓަރަކުން ކިޔަވަން ފެށި ފުރަތަމަ ބެޗުން ހުރިހާ ދަރިވަރުން ރަނގަޅު ނަތީޖާއާ އެކު ފާސްވެ ކިޔެވުން ފުރިހަމަކޮށްފި އެވެ.

ފަސް އަހަރުގެ މި ކޯހުގެ އެންމެ ފަހު އިމްތިހާނު މިދިޔަ އަންގާރަ ދުވަހު އޮތް އިރު އެ ޓެސްޓުގައި ބައިވެރިވި 22 ދަރިވަރުންނަށް ނަތީޖާ ލިބުނު އިރު ހުރިހާ ދަރިވަރުން ވެސް ފާސްވެފައިވެއެވެ. އެހެންކަމުން، އަންނަ އޮކްޓޯބަރު މަހު އެމްއެންޔޫން ބާއްވާ ދަސްވެނިވުމުގައި މެޑިސިން ސްކޫލުގެ ފުރަތަމަ ބެޗްގެ ދަރިވަރުން ގްރެޖުއޭޓްވާނެ އެވެ.

މެޑިސިން ސްކޫލުގެ ޑީން، ޑރ. ޝީޒާ ވިދާޅުވީ އަލަށް ފެށި ކަމަކަށް ވުމުން އެމްބީބީއެސް ކޯސް ގެންދަން ވަރަށް ގިނަ ދަތިތަކާ ކުރިމަތިވި ކަމަށެވެ. ނަމަވެސް، ހުރިހާ ދަރިވަރުން ވެސް ރަނގަޅު ނަތީޖާއަކާ އެކު ކިޔެވުން ފުރިހަމަކުރުމަކީ ވަރަށް ބޮޑު އުފަލަކާއި ފަހުރެއް ކަމަށް އޭނާ ވިދާޅުވި އެވެ.

މެލޭޝިޔާގެ ކެބަންސާން ޔުނިވާސިޓީއާ ގުޅިގެން މޯލްޑިވްސް ނޭޝަނަލް ޔުނިވާސިޓީ (އެމްއެންޔޫ) ގައި ޑޮކްޓަރުކަން ކިޔަވައިދޭން ފެށީ ސެޕްޓެމްބަރު، 2018 ގަ އެވެ.