ހިޖުރީ އާ ފެށިގެންދާއިރު ކީރިތި ރަސޫލާ ﷺ މައްކާއިން މަދީނާއަށް ކުރެއްވި ހިޖުރައާއި މެދު ފުންކޮށް ވިސްނާލެއްވުމަށް މިއަދުގެ ހުކުރު ޚުތުބާގައި ގޮވާލައްވާފިއެވެ. މިގޮތުން ހިޖުރައިގެ މާނައަކީ އަމިއްލަ ވަޒަން ދޫކޮށް އެހެން ތަނަކަށް ދިޔުމަށްވުރެ މާ ފުޅާ މާނައެއް އޮތް ކަމެއް ކަމަށާއި އެއީ ނުބައި ކަންތައް ދޫކޮށް ހެޔޮކަންތައްތަކުގެ މަގަށް ރުޖޫޢަވުން ކަމުގައި ޚުތުބާގައި ފާހަގަކޮށްފައިވެއެވެ.

މީގެ އިތުރުން، ހިޖުރައިން ލިބިދޭ ފިލާވަޅުތަކަށް މިއަދުގެ ޚުތުބާގައި އަލިއަޅުއްވާފާވާއިރު، މިކަމުން ލިބޭ އެންމެ އަގުހުރި ފިލާވަޅަކީ ދީނަށްޓަކައި ގުރުބާންވުމުގެ މަތިވެރިކަން ކަމަށް ބުނެފައިވެއެވެ. ރަސޫލާ ﷺ އިސްލާމީ އުއްމަތަށްޓަކައި ވެވަޑައިގެންނެވި ގުރުބާނީ ހަނދާންކޮށް އެއިން އިބުރަތް ހާސިލުކުރުމަށް ނަސޭހަތްތެރިވެފައިވެއެވެ. މިއާއި އެކު ކަމެއް ކާމިޔާބުވުމުގެ އެންމެ މުހިއްމު ކަމަކީ އެކަމަކަށް ދުރާލާ ރާވާ ތައްޔާރުވުންކަމުގައިވެސް ޚުތުބާގައި ފާހަގަކުރައްވާފައިވެއެވެ. އަދި ދަތި އުނދަގޫ ހާލަތްތަކުގައިވެސް އީމާންކަން ހިފަހައްޓައި ޘާބިތުވެ ތިއްބެވުމުގެ މާތްކަންވެސް ބަޔާންކޮށްފައިވެއެވެ.ކަންކަމުގައި މާތްﷲ އަށް ވަކީލުކުރުމަކީ ހިޖުރައިން ލިބިގެންދާ ވަރަށް އަގުހުރި ފިލާވަޅެއް ކަމުގައި ޚުތުބާގައި ފާހަގަކުރެއްވިއެވެ.

މާތްﷲ އެކަލާނގެ އަޅުތަކުންނަށް ހެޔޮ އަމަލުތައް ކުރުމުގެ ޚާއްސަ ދުވަސްތަކެއް ލައްވާފައިވާއިރު، އާޝޫރާ ދުވަހަކީ މީގެ ތެރެއިން މަތިވެރިވެގެންވާ ދުވަހެއް ކަމާއި މިދުވަހު ރޯދަ ހިފުމަކީ ގަދަވެގެންވާ ސުންނަތެއް ކަމުގައި ޚުތުބާގައި ބަޔާންކޮށްފައިވެއެވެ. އަދި ރަސޫލާ ﷺ މަދީނާއަށް ހިޖުރަކުރެއްވުމަށްފަހު އާޝޫރާ ދުވަހު ރޯދަ ހިފުމަށް މުސްލިމުންނަށް އަމުރުކުރެއްވިކަމަށްވެސް ފާހަގަކުރައްވާފައިވެއެވެ.

އެހެންކަމުން މުހައްރަމު މަހުގެ ދިހަ ވަނަ ދުވަހު އާޝުރާ ދުވަހުގެ ދަރުމައާއި ޘަވާމު ހޯދުމަށް މަސައްކަތް ކުރުމަށް ޚުތުބާގައި ނަސޭހަތްތެރިވެވަޑައިގެންފައިވެއެވެ.