2023 ވަނަ އަހަރުގެ ޕީޕީއެމް/ޕީއެންސީ ގެ ރިޔާސީ ކެންޑިޑޭޓަކީ ރައީސް އަބްދުﷲ ޔާމީން އަބްދުލްގައްޔޫމެވެ. އެމަނިކުފާނުގެ ކެންޑިޑަސީ ދިވެހިރާއްޖޭގެ ސުޕްރީމް ކޯޓުން ބާތިލް ކުރުމާ ހަމަޔަށް އެކަން އޮތީ އެގޮތަށެވެ. އެ ކޯލިޝަނުން ކެމްޕެއިން ކުރެއްވީ ވެސް އެމަނިކުފާނަށެވެ. އެގޮތުން އެމަނިކުފާނުގެ ސްލޯގަން އަކަށްވީ "ދިވެހީންގެރާއްޖެ" އެވެ. ސަބަބެެއްވެސް ނެތި ނޫނެވެ. ރާއްޖޭގައި ގާއިމްވެފައި ތިބި އިންޑިޔާގެ އަސްކަރިއްޔާ މިގައުމުން ބާލާ ދިވެހީންނަށް ދިވެހި ފަސްގަނޑު ހޯދައިދެއްވުމުގެ ނިޔަތުގައެވެ. ނަމަވެސް ކަންތައް ވެގެންދިޔައީ ދިމާއިދިކޮޅަށެވެ. އެމަނިކުފާނުގެ ކެންޑިޑަސީ ބަޔަކު ނުހައްގުން ފޭރިގަތީއެވެ.

އެމަނިކުފާނަށް ވާދަނުކުރެވުނު ހިސާބުން އެ ކޯލިޝަންގެ ފަރާތުން ކެންޑިޑޭޓެއްގެ ގޮތުގައި ދެން ނެރުނީ އަދުގެ ރައީސުލްޖުމްހޫރިއްޔާ ޑރ މުހައްމަދު މުއިއްޒެވެ. އާދެ، މި ވާހަކައަކީ ތިބޭފުޅުންނަށް އެއްވެސް އައު ވާހަކައެއް ނޫނެވެ. އެހެންތާވާނީ، މި ވާހަކަ އަކީ އަދި ވެސް މި ރާއްޖޭގައި "ހޫނު"ކޮށް ދެކެވޭ ވާހަކައެކެވެ. ރައީސް މުއިއްޒު ކެންޑިޑޭޓެއްގެ ގޮތުގައި ނިކުމެވަޑައިގެން ނަމަވެސް 2023 ވަނަ އަހަރުގެ މެނިފެސްޓޯ އަކީ ވެސް ރައީސް ޔާމީންގެ ބުރަ މަސައްކަތްޕުޅެވެ. "ދިވެހީންރާއްޖެ" ސްލޯގަނަކީ ވެސް މަގުސަދެއްގައި ރައީސް ޔާމީން ހެއްދެވި ސްލޯގަނެކެވެ. އަދި ކެމްޕެއިންގައި ބެހެއްޓެވި ޕޯސްޓަރުތަކުގައި ރައީސް މުއިއްޒު އަދި އަދުގެ ނައިބު ރައީސް ހުސައިން މުހައްމަދު ލަތީފް (ސެމްބެ) ގެ ފޮޓޯ ހުރި ނަމަވެސް އެންމެ ބޮޑުކޮށް ފެނިގެންދިޔައީ ރައީސް ޔާމީންގެ ފޮޓޯ ފުޅެވެ. ދައްކަން މިއުޅޭ ވާހަކަ ވަރަށް ވެސް ސާފެވެ. ހުރިހާ އެއްޗަކީ ވެސް ރައީސް ޔާމިންގެ މިންނެތް ބުރަ މަސައްކަތެވެ.

ކަންކަން މިހެންއޮވެ، ރިޔާސީ އިންތިޚާބްގެ ކެމްޕެއިން ދުވަސްވަރު ރަށްރަަށަަށް ވަަޑައިގެން ރައްޔިތުންނާ ވާހަކަދައްކަވަމުން ރައީސް މުއިއްޒު ވެސް އަދި މިއަދު ސަރުކާރުގެ އިސްފަޑީގައި ތިއްބެވި ޕީޕިއެމް/ޕީއެންސީގެ ލީޑާރޝިޕް ބޭފުޅުންވެސް ވިދާޅުވަމުން ގެންދެވީ ދިވެހީން ގޮވައިގެން "ދިވެހީންގެރާއްޖެ" އަކަށް މިސްރާބު ބަހައްޓަވައިގެން އުޅޭ ވާހަކައެވެ. ދިވެހީންނަށް ދިވެހީންގެރާއްޖެއެއް ހޯދަައިދެއްވާނެ ކަމުގެ ވައުދުތައްވެ އަހުދުތައްވެސް ވިއެވެ.

ދިވެހީންގެ ނިންމުން 2023 ވަނަ އަހަރުގެ ސެޕްޓެމްބަރު މަހުގެ 30 ވަނަ ދުވަހު ވަރަށްވެސް ސާފުވިއެވެ. އާދެ، ދިވެހީންވެސް "ދިވެހީންގެރާއްޖެ" އަކަށް މިސްރާބު ޖަހާފައިވާ ނައުކޮޅަށް އުންމީދުތަކަކާއެކު އަރައިގަތެވެ. އެ ނައުކޮޅު ދަތުރުކުރާނީ "ދިވެހީންގެރާއްޖެ" އަށް ކަމަށް ހީކޮށެވެ. ނަމަވެސް ދެން ފެނުނީ ނައުކޮޅުގެ މިސްރާބު ބަދަލުވި މަންޒަރެވެ. ވަގުތު ފާއިތުވެއްޖެއެވެ. ރައްޔިތުންނަށް ބޮޑު އޮޅުވާލުމެއް އޮޅުވާލާ މިސްރާބު މިހުރީ އަވައްޓެރި ގައުމު އިންޑިޔާ އަށް ބަނދަރުކުރާށެވެ. އިންޑިޔާގެ އަޅުވެތިކަމަށް ދިޔުމަށެވެ. އިންޑިޔާގެ ބޮޑު ވަޒީރު ނަރެންދްރާ މޯދީ އާއެކު ބޮޑެތި މޮޅެތި ޑީލްތައް ހެދުމަށެވެ. ނާށިގަނޑު ހިއްޕަވައިގެން ސަލާން ޖަހާށެވެ. ކަންތައްވީ ވެސް ހަމަ އެފަދައިންނެވެ. ސަލާން ޖަހަން ފަށާ ފޮނުވާލަން ބުނި އެ ގައުމުގެ ސިފައިން އެ ގައުމަށް ފޮނުވާލުމަށް ފަސްޖެހިވަޑައިގަތެވެ.

"އިންޑިޔާ އައުޓް" ކެމްޕެއިންގައި ރައީސް މުއިއްޒު އުޅުއްވީ އެއްވެސް ހާލަތެއްގައި އިންޑިޔާ އާ ދެކޮޅަށް ނޫންކަމަށް ބުނަން ފަށައިފިއެވެ. ވާހަކަތައް ބަދަލުވެއްޖެއެވެ. އިންޑިޔާ ވަރެއް މިއަދަކު ނެތެވެ. މައްސަލައަކީ އިންޑިޔާ އާއެކު ގާތްގުޅުމެއް ބާއްވާތީ ނޫނެވެ. ހަގީގީ މައްސަލައަކީ އިންޑިޔާގެ ދަށުވުމެވެ. މިކަން މިވެރިންނަށް ހެވެއެވެ.

އެހެންތާވާނީ މިސްރާބު "ދިވެހީންގެރާއްޖެ" އަށް ކަމަށް ބުނެ، ނައު ކޮޅުގައި ބަނދަރު މިކުރީ އިންޑިޔާއަށެވެ.