ހުޅުމާލޭ ފުރަތަމަ ފިޔަވަހީގައި ޤަވައިދާ ހިލާފަށް ކޮފީ ޝޮޕް ހިންގަމުންދިޔަ 8 ބިދޭސީއަކު ހައްޔަރުކޮށްފި ކަމަށް މޯލްޑިވްސް އިމިގްރޭޝަނުން ހާމަކޮށްފިއެވެ.

ފުލުހުންނާއި ގުޅިގެން އިއްޔެ ހަވީރު ހުޅުމާލޭ ފޭސް 1ގައި ހިންގި ޚާއްސަ އޮޕަރޭޝަންގައި ޤަވައިދާ ހިލާފަށް ޓޭކްއަވޭ ކޮފީ ޝޮޕް ހިންގި ބަޔަކު ވަނީ އަތުލައިގެންފައެވެ. ބިދޭސީންނަށް އަމާޒުކޮށްގެން ހިންގި ރޭޑް އޮޕަރޭޝަނުގައި 8 ބިދޭސީން ފުލުހުންގެ ބެލުމުގެ ދަށަށް ގެނެސް އިމިގްރޭޝަނާއި ވަނީ ހަވާލުކޮށްފައެވެ.

ބިދޭސީން ރާއްޖޭގައި ވިޔަފާރި ކުރުން މަނާ ދާއިރާތައް ކަނޑައަޅާ އިގުތިސާދީ ތަރައްޤީ އާއި ވިޔަފާރިއާ ބެހޭ ވުޒާރާއިން މިދިޔަ ބުރާސްފަތި ދުވަހު ވަނީ އިއުލާންކޮށްފައެވެ. އެ ލިސްޓުގައި 25 ދާއިރާއެއް ހިމެނޭއިރު، އޭގެ ތެރެއިން ބައެއް ދާއިރާތަކަކީ މިހާރު ވެސް ބިދޭސީން ހަރަކާތްތެރިވަމުން އަންނަ ދާއިރާތަކެވެ.

ޤަވާއިދާ ހިލާފަށް އުޅޭ ބިދޭސީން ހޯދުމަށް ކުރިއަށް ގެންދިޔަ އޮޕަރޭޝަނުގެ ތެރެއިން މިހާތަނަށް 83 އަށް ވުރެ ގިނަ ބިދޭސީން އިމިގްރޭޝަނުގެ ބެލުމުގެ ދަށަށް ގެންގޮސްފައިވާއިރު، މާލެ ސަރަހައްދުގެ 4 ތަނެއް ވަނީ ބަލައިފާސްކޮށްފައެވެ. އަދި އިމިގްރޭޝަންގެ ބެލުމުގެ ދަށަށް ގެންދިޔަ ހުރިހާ ބިދޭސީންގެ ބަޔާން ނަގަމުންދާ ކަމަށް އެއިދާރާއިން ވަނީ ހާމަކޮށްފައެވެ.