ނުކުޅެދުންތެރިކަން ހުންނަ ފަރާތްތަކުގެ ގައުމީ ދަފްތަރު ތައާރަފްކުރީ މިސަރުކާރުން ނޫންކަން ހާމަވެއްޖެއެވެ.

މިކަން ހާމަވެފައިވަނީ ނިމިދިޔަ ސަރުކާރުގެ ސްޓޭޓު މިނިސްޓަރު އިފްހާމު ހުސެއިން ކުރެއްވި އެކްސް ޕޯސްޓެއްގައި އޭނާ އެކަމުގެ ތަފްސީލު ދެއްވުމުންނެވެ.

އެގޮތުން އިފްހާމު އޭނާގެ އެކްސްގައި ވިދާޅުވެފައިވަނީ ނުކުޅެދުންތެރިކަން ހުންނަ ފަރާތްތަކުގެ ގައުމީ ދަފްތަރެއް ކުރިންވެސް އޮއްވާ އެކަމުގެ މެޑަލް މި ސަރުކާރުން ޖެހުން ކަމަކު ނުދަ ކަމަށާ މި ސަރުކާރުން އެކަމާ ގުޅިގެން ވަނީ އޮޅުވާލާފައިކަމަށެވެ.

މި ސަރުކާރުން ކަންކަން އޮޅުވާލަން މަސައްކަތްކުރަމުން ދާކަމުގެ ތުހުމަތާ އެކު ޖެންޑަރ މިނިސްޓްރީގެ ކުރީގެ ސްޓޭޓު މިނިސްޓަރު އިފްހާމް ނުރުހުން އަމާޒުކޮށް ވިދާޅުވެފައިވަނީ ނިމިދިޔަ ސަރުކާރުން ވަނީ ނުކުޅެދުންތެރިކަން ހުންނަ ފަރާތްތަކުގެ ގައުމީ ދަފްތަރެއް އެކުލަވާލައިފައި އަދި އެ ދަފަތްރުވަނީ 5 ޖަނަވަރީ 2023 ގައި އިފްތިތާޙުކޮށްފައި ކަމަށެވެ. މި ސަރުކާރުން އަލަށް ކުރާ ކަމެއް ކަމަށް މިކަން ދައްކުވައިދޭން މަސައްކަތް ކުރާތީ އަޖައިބުވާ ކަމަށްވެސް އިފްހާމު ވަނީ ވިދާޅުވެފައެވެ.

އިފްހާމުގެ ނުރުހުން މި ސަރުކާރަށް އަމާޒުކޮށްފައި މިވަނީ ނުކުޅެދުންތެރިކަން ހުންނަ މީހުންގެ ޑޭޓާ ބޭސްއެއް ހަދަން މަސައްކަތްކުރަމުންދާ ކަމަށް މިނިސްޓަރު އައިޝަތު ޝިހާމް ވިދާޅުވެފައިވާތީ އެވެ.

އިފްހާމް ވިދާޅުވި ފަދައިން 2023 ޖަނަވަރީ 5 ގައި އޭރުގެ ފަރސްޓް ލޭޑީ ފަޒްނާ އަހުމަދު ވަނީ އެ ދަފްތަރު އިފްތިތާހުކޮށްދެއްވާފައެވެ. އަދި މިހާރުވެސް އެ ދަފްތަރުގައި 12920 މީހުން ތިބި ކަމަށް ދައްކައެވެ. އަލަށް 8224 އެޕްލިކޭޝަން ލިބިފައިވާ ކަމަށާ އަދި އެކި ހާލަތްތަކުގައި ހުރި 3421 ފޯމް ހުރި ކަމަށްވެސް ދަފްތަރުން ދައްކައެވެ.