ރާއްޖެއިން ބޭރުގައި ސަރުކާރުގެ ސްކޮލާޝިޕްތަކުގައި ކިޔަވަމުންދާ ދަރިވަރުންނަށް ދޭންޖެހޭ ފައިސާ ނުފޮނުވާތީ ކޯސް ފީ ދެއްކުމާއި ޓިއުޝަން ފީތައް ދެއްކުމަށް ދަތިތަކާއި ކުރިމަތިލަމުން އަންނަކަމަށް މައުލޫމާތު ލިބިއްޖެއެވެ.
މިގޮތުން މިދިޔަ ޖޫން މަހުން ފެށިގެން ހަޔާ އެޑިއުކޭޝަނުން ބައެއް ދަރިވަރުންނަށް ފައިސާ ފޮނުވުން ވަނީ ހުއްޓާލައިފައިވާ ކަމަށްވެސް ޗެނަލް 13 އަށް މައުލޫމާތު ލިބިފައިވެއެވެ.
ދަރިވަރުންނަށް ދިމާވެފައިވާ މި މައްސަލައާއި ގުޅުގެން ހަޔަރ އެޑިއުކޭޝަން މިނިސްޓްރީން ބުނެފައިވަނީ ޑޮލަރުގެ ތާށިކަމާހެދި ކުދިންނަށް ފައިސާ ޖަމާ ކުރުމުގައި ލަސްތަކެއް އެބަ ހުރި ކަމަށާއި ނަމަވެސް ވީ އެންމެ އަވަހަށް ފައިސާ ޖަމާ ކުރުމަށް ފިނޭންސް މިނިސްޓްރީއާ ގުޅިގެން މަސައްކަތް ކުރަމުންދާ ކަމަށެވެ.
ގިނަ އަދަދެއްގެ ދަރިވަރުން ސްޓޫޑެންޓް ލޯން އަދި ސްކޮލަޝިޕްގައި ރާއްޖެއިން ބޭރުން ތައުލީމު ހާސިލުކުރަމުން އަންނައިރު ސަރުކާރުގެ މިފަދަ ޒިންމާދާރުކަން ކުޑަ އަމަލުތަކުން އުފުލަމުންދާ ދަތިތައް ގިނަގުނައެވެ. ސަރުކާރުގެ ވުޒާރާތަކުގެ ނާގާބިލުކަމާއި ހުރެ ހުރިހާ ދެރައެއް ލިބެނީ ނިކަމެތި ދިވެހި ރައްޔިތުންނަށެވެ. ކޮންމެ ދަރިވަރަކީ އަމިއްލައަށް ސެލްފް ފައިނޭންސް ކުރެވޭ ވަރުގެ ކުއްޖަކަށްނުވެ ސަރުކާރުގެ މިފަދަ ސިޔާސަތުތަކާއި ހުރެ ކޯސް މެދުކަޑާލައި ދަރިވަރުން އެނބުރި އައުމުގެ ފުރުސަތުވެސް ބޮޑެވެ.
