މަޖިލިސްކުރާގެ ކައިރީގައި އޮންނަ ޕާކިންގައި ހުރި ސައިކަލުތަކުގައި ރޯކޮށްލި މީހާ ޝަރީއަތް ނިމެންދެން ބަންދުކޮށްފިއެވެ.

މިދިޔަ މަހުގެ ތިން ވަނަ ދުވަހުގެ ރޭ ތިން ސައިކަލެއްގައި ރޯކޮށްލި މައްސަލައާ ގުޅިގެން މިދިޔަ މަހުގެ ފަހެއްގައި ހައްޔަރުކުރީ 36 އަހަރުގެ ދިވެހި ފިރިހެނެކެވެ. އޭނާގެ ބަންދަށް ފުރަތަމަ ޖެހީ 30 ދުވަހެވެ.

އެ މުއްދަތު ހަމަވެ އިއްޔެ އޭނާ ކްރިމިނަލް ކޯޓަށް ބަންދާމެދު ގޮތެއް ނިންމުމަށް ހާޒިރުކުރުމުން އޭނާ ޝަރީއަތް ނިމެންދެން ބަންދު ކުރުމަށް ކޯޓުން ވަނީ އަމުރު ނެރެދީފައެވެ.

ކޯޓު އަމުރުގައިވާގޮތުން، ދައުލަތުން އެދުނީ، އޭނާގެ މައްޗަށް ދައުވާ ކުރުމަށް ތައްޔާރުވަމުން ދާތީ، ޝަރީއަތް ނިމެންދެން އޭނާ ބަންދު ކޮށްދިނުމަށް ކަމަށެވެ.

އެ ކުށުގެ އަމަލު ހިންގައިފައިވާ ގޮތުން އެކަމަކީ ނުރައްކާތެރި ކަމެއްގެ ގޮތުގައި ގަބޫލުކުރެވޭ ކަމަށާއި އޭނާ ކުރިކަމަށް ތުހުމަތު ކުރާ ކުށުގެ އަމަލު ހިންގާފައިވާ ގޮތުން އެތައް ބައެއްގެ މުދަލަށް އަދި ފުރާނައަށް ގެއްލުންވުމުގެ ފުރުސަތު ވެސް އޮތް ކަމަށް ގަބޫލުކުރެވޭ ކަމަށް އަމުރުގައިވެއެވެ.

އެ މައްސަލައިގައި ހުށަހަޅައިފައިވާ ފުޓެޖްގެ ސްނެޕްޝޮޓާއި ޕްރޮސިކިއުޝަނުން ހުށަހަޅައިވާ އެހެނިހެން ލިޔުންތަކަށް ބަލާއިރު، އޭނާއާ ދެކޮޅަށް އެކަށީގެންވާ ހެކި ހުށަހަޅައިފައިވާ ކަމަށް ކްރިމިނަލް ކޯޓުން ފާހަގަކޮށްފައިވެއެވެ.

އެ މީހާއަކީ ހައްޔަރާއި ބަންދުގެ ރެކޯޑު އޮތް މީހެކެވެ.

މަޖިލިސް ކައިރީ ހުރި ސައިކަލްތަކުގައި ރޯކޮށްލީ ޖޫން މަހުގެ 3 ވަނަ ދުވަހުގެ ރޭ ދަންވަރުގެ ވަގުތެއްގައެވެ.

މި ހާދިސާގައި ދެ ސައިކަލު ބޭނުން ނުކުރެވޭ ވަރަށް އަނދާފައިވާއިރު، ފަސް ސައިކަލާއި ދެ ވޭނަށް ވަނީ އަލިފާނުގެ ސަބަބުން އެކިވަރުގެ ގެއްލުންތައް ލިބިފައެވެ. މި ހާދިސާގައި އެއްވެސް މީހަކަށް އަނިޔާއެއް ލިބިފައި ނުވެއެވެ.

މިއީ ފަހަކަށް އައިސް ސައިކަލުތަކެއްގައި ރޯކޮށްލައިގެން ހިނގި އެންމެ ބޮޑު އެއް ހާދިސާއެވެ.