މިސަރުކާރުން މިހާތަނަށް މަސްވެރިންނަށް 998.8 މިލިޔަން ރުފިޔާ ދޫކޮށްފައިވާކަމަށް މަސްވެރިކަމާއި ކަނޑުގެ ވަސީލަތްތަކާއި ބެހޭ ވުޒާރާއިން ވިދާޅުވުމާއިއެކު ގިނަ ބަޔެއްގެ ފާޑުކިޔުން ސަރުކާރަށް އަމާޒުވެއްޖެއެވެ.

މީސް މީޑިޔާގެ އެކި މަންސަތަކުގައި މި ކަމާއި ގުޅިގެން އާންމުން ސަރުކާރަށް ނުރުހުން ފާޅުކުރަމުން އަންނަކަން ފާހަގަކުރެވިފައިވެއެވެ. މިގޮތުން އާ ސަރުކާރު ހުވާ ކުރެއްވިތާ 7 މަސް ފާއިތުވި އިރު މަސްވެރިންގެ ފައިސާ ދިނުމުގެ ފުރުސަތު އޮވެމެ އެކަން ގަސްދުގައި ލަސްކޮށްފައިވާ ކަމަށް ގިނަ ފަރާތްތަކުން އަންނަނީ ތުހުމަތު ކުރަމުންނެވެ.

މަސްވެރިންެގެ ދޭންޖެހޭ ފައިސާ ނުދީ ހިފަހައްޓަމުން ދިޔުމާއި ގުޅިގެން ރާއްޖޭގެ އެކި ސަރަހައްދުތަކުގައި މަސްވެރިން ވަނީ އެކި ފަހަރުމަތިން މުޒާހަރާކޮށްފައެވެ. ނަމަވެސް އިންތިޚާބުތަކާއި ދިމާކޮށް ކުޑަ އެތިކޮޅުން ފައިސާ ދޫކޮށް ސަރުކާރުން ވަނީ މައްސަލަ އޮއްބާލަން މަސައްކަތްކޮށްފައެވެ. އަދި ފައިސާ ނުދީ ލަސްވަނީ ކުރީ ސަރުކާރުގެ ސިޔާސަތުތަކާއި ހުރެ ކަމަށްވެސް ބުނެ އޮޅުވާލާފައިވާކަން ފެނިގެންގޮސްފައިވެއެވެ.

މީގެ އިތުރުން، މަސް ގަންނަ އަގު 20ރ އަށް ވުރެ ކުޑަ ނުކުރައްވާނެކަމަށް ރައީސް ޑރ މުއިއްޒު ވައުދު ވެވަޑައިގެންފައިވީނަމަވެސް ޚަރަދު ކުޑަ ކުރުމުގެ ނަމުގައި ވަނީ މި އަގުތަކަށްވެސް ބޮޑެތި ބަދަލުތަކެއް ގެންނަވާ މަސްވެރިން އިތުރަށް ނިކަމެތިކޮށްލާފައެވެ.

މަސްވެރިންނަށް ދޭން ޖެހޭ ހުރިހާ ފައިސާއެއް ދީ ޚަލާސްކޮށްފައިވާ ކަމަށް ފިޝަރީޒް މިނިސްޓްރީން ބޮޑެތި ހެޑްލައިންތައް ހަދާފައިވީނަމަވެސް، މަސްވެރިންނަށް ދެން ފައިސާ ޖަމާވާނީ އަނެއްކާވެސް 07-08 މަސް ފަހުންތޯ މަސްވެރިން އަންނަނީ ސުވާލު އުފައްދަވަމުންނެވެ.