ޓޫރިޒަމް ޕްރޮމޯޓް ކުރުމަށް މަސައްކަތްކުރާ ސަރުކާރުގެ ކުންފުނި އެމްއެމްޕީއާރުސީގެ ޑެޕިޔުޓީ މެނޭޖިން ޑިރެކްޓަރު މުހައްމަދު ބައްސާމް އާދަމް މަގާމުން ވަކިކޮށްފިއެވެ.

މިކަން ތޭރައޮންލައިން އަށް ވަނީ ކަށަވަރުވެފައެވެ.

ބައްސާމް މަގާމުން ވަކިކޮށްފައި ވަނީ އިއްޔެ އެ ކުންފުނިން ބޭެއްވި ބޯޑު ބައްދަލުވުމުގައެވެ.

ސީދާ ސަބަބު ކުންފުނިން ހާމަކޮށްފައިނުވީ ނަމަވެސް ބައްސާމް ވަކިކޮށްފައިވަނީ އޭނާގެ މައްޗައް ޖިންސީ ފުރައްސާރައިގެ ތުހުމަތު ކުރެވިފައިވަނިކޮށެވެ.

ބައްސާމް މަގާމުން ވަކި ކުރުމުގެ ކުރިން އޭނާއާ އެ ކުންފުނި ހިންގުމަށް ވެސް ވަނީ ވަގުތީ ގޮތުން ހަވާލުކޮށްފައެވެ.

އެކަން ޕީސީބީ އިން އިއުލާން ކުރީ އެ ކުންފުނީގެ ކުރީގެ އެމްޑީ ފާތިމަތު ތައުފީގް މަގާމުން ވަކި ކުރުމަށްފަހުގައެވެ.

ބައްސާމް ކުންފުންޏާ ވަގުތީ ގޮތުން ހަވާލުވިތާ 3 ވަރަކަށް ހަފްތާ ތެރޭގައި އެ ކުންފުނީގެ މެނޭޖިންގ ޑިރެކްޓަރުކަމަށް އިބްރާހިމް ޝިއުރީ ވަނީ އައްޔަންކޮށްފައެވެ.

ޝިއުރީ އެ މަގާމަށް އައްޔަން ކުރުމާއެކު ގިނަ ބަޔަކު ބުނަމުންދިޔައީ ބައްސާމްގެ މައްޗައް ތުހުމަތު ކުރެވިފައިވާ މައްސަލަ ބެލުމަށެވެ.

މަގާމުން ވަކިކޮށްފައިވަނީ ބައްސާމްގެ އިތުރުން އެ ކުންފުނީގެ އެންމެ ދުވަސްވީ މުވައްޒަފުގެ ގޮތުގައި ހުރި އިބްރާހިމް އާސިމް (އައިބީ) އެވެ.

އާސިމް މަގާމުން ވަކި ކުރި ސަބަބެއް ވެސް އެމްއެމްޕީއާރްސީ އިން ހާމަކޮށްފައިނުވެއެވެ.