ރާއްޖޭގައި ހިންގާ ކޮލެޖުތަކަށް، ޔުނިވާސިޓީގެ ދަރަޖަ ދިނުމުގެ ޝަރުތުލުއިވާ ގޮތަށް މަތީ ތައުލީމްގެ ގާނޫނަށް ހުށަހެޅި އިސްލާހަކީ އޭގެ މަންފާ މާމިގިލީ ދާއިރާގެ މެމްބަރު އަދި ވިޅާ ކޮލެޖުގެ ވެރިޔާ ގާސިމް އިބްރާހިމަށް ލިބޭނެހެން ފަރުމާކޮށްފައިވާ ބިލެއްގެ ގޮތުގައި ގިނަ ބަޔަކު ސިފަކޮށްފިއެވެ.

އެގޮތުން އަންގާރަ ދުވަހު ބޭއްވި ޖަލްސާގައި ބައެއް މެމްބަރުންގެ ފާޑުކިޔުމާ ނުރުހުން ވެސް ގާސިމަށް އަމާޒުކޮށްފައިވެއެވެ. ބިލަށް ބަހުސް ކުރައްވަމުން ވައިކަރަދޫ ދާއިރާގެ މެންބަރު ހުސެއިން ޒިޔާދު (ފިއްޓޭ) ވިދާޅުވީ މިއީ ގާނޫނަށް ގެނައި އިސްލާހަކަށް ވުރެ ބޮޑަށް ވައްތަރީ "ވަކި ބޭފުޅަކަށް ފަހާފައި އޮތް ކޯޓަކާ" ކަމަށެވެ.

ކުރީގެ މަޖިލީހުން މުއްދަތު ކުރު ނުކޮށް އޮތީ ޔުނިވާސިޓީގެ ހައިބަތު ހިފެހެއްޓުމުގެ ގޮތުން ކަމަށާއި ދެ ތިން ފަހަރަކަށް މި އިސްލާހު ހުށަހެޅުމުން ވެސް މެންބަރުންގެ ވިސްނުން ހުރީ އެގޮތަށް ކަމަށް ޒިޔާދު ވިދާޅުވިއެވެ.

ގަލޮޅު ދެކުނު ދާއިރާގެ މެންބަރު މީކާއިލް ނަސީމް ވިދާޅުވީ، މި ބިލު ފަރުމާކޮށް، މަޖިލީހަށް މިހާ އަވަހަށް ހުށަހެޅި އަވަސް ސްޕީޑުގައި މި ދަނީ ވަކިވަކި ފަރުދުންގެ ވިޔަފާރީގެ މަސްލަހަތު ކުރިއެރުވުމުގެ ނިޔަތުގައި ކަމަށެވެ.

މަޖިލިސް މެމްބަރުންގެ އިތުރުން މީސް މީޑީޔާގައިވެސް ވަނީ މި ބިލާ ގުޅިގެން ގާސިމަށް ރައްދުވާހެން ތުހުމަތުތަކެއް ކޮށްފައެވެ.

އެގޮތުން މީސް މީޑިޔާގައި އާންމު ފަރާތަކުން ކުރި ޕޯސްޓެއްގައި ވިދާޅުވެފައިވަނީ، ސީދާ ވަކި ކޮލެޖަކަށް ފަރުމާކޮށްފައިވާ ބިލެއް ކަމަށެވެ. އެގޮތުން ރާއްޖޭގައި 2 ޔުނިވަސިޓީއެއް ސަރުކާރުންވެސް އުފައްދާފައިވާ ކަން ފާހަގަކޮށް އެމީހާގެ ޕޯސްޓުގައި ވަނީ، މިއީ ދިވެހި ސަރުކާރަކުން ވަކި މީހަކު މަޑުމަޑުން ބޮޑުކުރަމުންގޮސް އެންމެ ފަހަކަށް ގާނޫނަށް ގެންނަ އިސްލާހެއް ކަމަށެވެ. އެގޮތުން ގާނޫނަށް އިސްލާހު ގެންނައިރު ދުނިޔޭގެ އެއްވެސް ގައުމެއްގައި ޝަރުތު ނުކުރާކަންކަން ޝަރުތުކޮށް މިހާރު މިރާއްޖޭގައި ހިންގާ ވަކި ކޮލެޖެއްގައި އެމީހުން އަމިއްލައަށް ހިންގާ ކަންކަމުގެ މައްޗަށް ޝަރުތުކޮށް ގާނޫނަށް ގެންނަ އިސްލާހަކީ އެހެން ކޮލެޖުތަކަށް ދޮރު ބަންދުވާގޮތަށް، މީގެ ކުރިން އެމްޑީޕިއިން މުހައްމަދު ނަޝީދުއާ އިބްރާހިމު މުހައްމަދު ސޯލިހު ބޮޑު ކޮށްދިން ޓެކުސް ފައިސާއިން ކޮންމެ މަހަކު 2 މިލިއަނާ ކައިރި އަދަދަކުން ފައިސާދީ، ހިލޭ އިމާރާތާއި ބިން މާލެއިންނާއި ހުޅުމާލެއިންދިނުމަށްފަހު، ރައީސް މުހައްމަދު މުއިއްޒުގެ ސަރުކާރުން މަހުޖަނު ނޫން އެހެން އެއްވެސް މީހަކަށް އެމީހަކު ހިންގާ ކޮލެޖެއް ޔުނިވަސިޓީއަކަށް ބަދަލު ނުވެވޭގޮތަށް ޝަރުތުކޮށް ފަރުމާކޮށްފައިވާ ބިލެއް ކަމަށެވެ.

މާފަންނު އުތުރު ދާއިރާގެ ޕީއެންސީގެ މެންބަރު އަބްދުﷲ ރިފާއު (ބޮޗޭ) ހުށަހެޅުއްވި އެ އިސްލާހުގައި މައިގަނޑު ގޮތެއްގައި ބުނަނީ ކޮލެޖެއްގެ ގޮތުގައި މެދުނުކެނޑި ހިންގަމުން އަންނަތާ 15 އަހަރުވެފައިވާ ނަމަ ޔުނިވާސިޓީއެއްގެ ދަރަޖަ އަށް ބަދަލު ކުރެވޭނެއެވެ. އެ ގާނޫނުގައި މިހާރު އޮންނަނީ 20 އަހަރު ވާން ޖެހޭ ގޮތަށެވެ.