ޚަރަދު ކުޑަކުރުމުގެ ސިޔާސަތެއް ފެށުމަށްފަހު ރައީސް ޑރ. މުހައްމަދު މުއިއްޒު އަންނަ މަހުގެ ފުރަތަމަ ހަފްތާގައި ރަސްމީ ދަތުރުފުޅެއްގައި ސްރީލަންކާއަށް ވަޑައިގަންނަވާ ކަމަށް އެ ގައުމުގެ ނޫސްތަކުން ހާމަވެއްޖެއެވެ.
ސްރީލަންކާ ގާޑިއަންއިން ބުނީ ރައީސް މުއިއްޒު ލަންކާއަށް ވަޑައިގަންނަވާކަން ކަށަވަރުކޮށްދީފައިވާ ކަމަށެވެ.
ރައީސް މުއިއްޒުގެ މި ދަތުރުފުޅުގައި ލަންކާއާ ދެމެދު އެއްބަސްވުންތަކެއްގައި ސޮއިކުރުމަށް ރައްޔިތުންގެ މަޖިލީހަށް އެޕްރޫވަލް ހޯދަން ހުށަހަޅާފައިވާ ކަމަށް ވެސް އެ ނޫހުން ވަނީ ރިޕޯޓްކޮށްފައެވެ.
ދަތުރުފުޅާ ގުޅޭގޮތުން ރަސްމީކޮށް ރައީސް އޮފީހުން އެއްޗެއް އަދި ހާމަކޮށްފައިނުވެއެވެ.
މި ސަރުކާރުން ބޭރުގެ ގައުމުތަކަށް ވެސް ރަސްމީ ދަތުރުފުޅުގެ ނަމުގައި ވަޑައިގެންނަވާއިރު ދައުލަތުގެ ބަޖެޓުން މިލިއަނެއް ވަރު އަބަދުވެސް ޚަރަދުވާކަން ފާހަގަކޮށްލެވެއެވެ.
