ކުރީގެ ރައީސް އިބްރާހިމް މުހައްމަދު ޞާލިހު"އިންޑިއާ އައުޓް" ކެމްޕޭނާ ގުޅިގެން ނެރުއްވި ގަރާރު މި ސަރުކާރުން ބާތިލު ނުކުރެވިގެން އުޅެނީ ކީއްވެގެންތޯ ވިދާޅުވެ ރައީސް އަބްދުﷲ ޔާމީން އަބްދުލްގައްޔޫމް ސަރުކާރަށް ސުވާލު އަމާޒުކުރައްވައިފިއެވެ.

އެމަނިކުފާނު އެގޮތައް ސުވާލު އުފައްދާފައިވަނީ ޕީއެންއެފްގެ ފަރާތުން ބޭއްވި ފްރޮންޓް އޮފީސް ޖަލްސާގައި ވާހަކަ ދައްކަވަމުންނެވެ.

އެގޮތުން އެމަނިކުފާނު ވިދާޅުވީ "އިންޑިއާ އައުޓް" ކެމްޕޭނުގެ ސަބަބުން ގައުމީ ސަލާމަތަށް ނުރައްކާވާ ކަމަށް ނިންމަވައި އެ ސަރުކާރުން ގަރާރު ނެރުއްވި އިރު އަދުގެ ސަރުކާރުގެ އިސް ފަރާތްތަކުން ވެސް އިދިކޮޅުގައި ހުންނަވާ އެ ކެމްޕެއިންގައި ބައިވެރިވެފައިވާކަމަށެވެ. އެހެން ކަމުން މިއަދު އެ ގަރާރު އުވާ ނުލެވޭ ސަބަބެއް ނޭނގޭ ކަމަށްވެސް އެމަނިކުފާނު ވަނީ ވިދާޅުވެފައެވެ.

އޭގެއިތުރުންވެސް އެމަނިކުފާނު ވިދާޅުވީ އެ ހަރަކާތް ކިތަންމެ ކުރިއަށް ގެންދަން ބޭނުންފުޅުވި ނަމަވެސް އެމަނިކުފާނަށް އެ ހަރަކާތް ހުއްޓާލަން ޖެހިވަޑައިގަތީ ސަލާމަތީ ހިދުމަތްތަކާ ކުރިމަތިލައްވަން ބޭނުންފުޅު ނުވާތީ ކަމަށެވެ.

އޭގެއިތުރުން ރައީސް ޔާމީން ވަނީ ގާނޫނާއި ޚިލާފް ކަމަށް ބުނެ، "ގޮވެލިފަތި ގޮވަމުން އައި ސަރުކާރަކަށް"ގަރާރު ބާތިލުނުކުރެވިގެން އުޅެނީ ކީއްވެތޯ ތަކުރާރުކޮށް ސުވާލު ކުރައްވާފައެވެ.

ރާއްޖޭގައި ގާއިމްވެ ތިބި އިންޑިޔާ ސިފައިން ބޭލުމުގެ މަސައްކަތަކީ ރައީސް ޔާމީން އިސްވެ ހުންނަވައި ރާއްޖޭގެ އެކި ކަންކޮޅުތަކުގައި ފެށި މަސައްކަތެއްކަން ފާހަގަކޮށްލެވެއެވެ.