ފޮތެއް އޮތަކަސް އެދުރެއް ނުވާނެއޭ އަތެއް އޮތަކަސް ބަތެއް ނުކެވޭނެއޭ، މެކުނު ފުމަކަސް ގާހަކައަކަށް ނުފުމެވޭނެއޭ، މިއީ ހައްތަހާވެސް އިހު ޒަމާނުގައި ބޭނުންކުރި ބޯދާ ބަސްތަކެވެ. މިއިން ކޮންމެ ބަހެއް އަމާޒުކުރަނީ ކަންކަން ކުރާނެ މަހު އޮތަސް އެކަމެއް ކުރަން ނޭނގެންޏާ އެކަމެއް ނުވާނެކަން ބުނެދިނުމުގެ ގޮތުންނެވެ.

މި ރިޕޯޓު، މި ބަސްތަކުގެ މަތިން ހަނދާން އައު ކުރަމުން މިފެށީ ސަބަބެއް ނެތިއެއް ނޫނެވެ. އެގޮތުން އަދުގެ ސަރުކާރުގެ ވެރިއަކަށް ހުންނެވީ ކިޔަވައިގެން ނިކަން އެންމެ މޮޅު ފަށް ނަންގަވައިގެން ހުންނެވި ބޭފުޅެއްކަމަށް ލިޔެކިޔުންތަކުން ދައްކައެވެ. ނަމަވެސް އެމަނިކުފާނާ ސަރުކާރާ ހަވާލުވެވަޑައިގެން 8 މަސް ދުވަސް ވެގެން ދިޔައިރުވެސް ގައުމަށާ ރައްޔިތުންނަށް ވީ ނަފާއެއް ފައިދާއެއް ނެތެވެ.

އާއިލީ ވެރިކަމަކާ ދިމާއަށް މިސްރާބު ޖަހާފައިއޮތް ވެރިކަމެއް ގައުމުގައި މިއަދު ހިނގަމުންދާއިރު ރާއްޖޭގެ ހާލަތާމެދު މިއަދު ދުނިޔޭގެ މާލީ އިދާރާތަކުން ގެންދަނީ ކަންބޮޑުވުން ފާޅުކުރަމުންނެވެ. އެ ނުރައްކާތެރި ރަނގަބީލުގެ އަޑު ރާއްޖޭގައި ހުންނެވި އެންމެ މޮޅު އިކޮނޮމިސްޓު ރައީސް އަބްދުﷲ ޔާމީން ވެސް ރައްޔިތުންނާ ހަމައަށް އިއްވާދެއްވާފައިވެއެވެ.

ފައިސާ ޗާޕުނުކުރި ނަމަވެސް އެމްއެމްއޭގައި ޗާޕުކޮށްފައި ހުރި ފައިސާ ބޮރޯ ކުރުން ނުވަތަ ދަރަންޏަށް ނެގުމަކީ ހަމަ ފައިސާ ޗާޕުކުރުމުގެ ގޮތުގައި ރައީސް ޔާމީން ވިދާޅުވެދެއްވުމުން އެކަމާ ސިޔާސީ ގޮތުން އަދި އެމަނިކުފާނު އަރިހު ތުއްތު ކުދިން ބޮޑާ ހާކަން ފެށިއެވެ. ތުން ދަމާ ދެފައި ހާކާ ކުސްތަޅަމުންނެވެ. އިގްތިސޯދު އެނގިވަޑައިގަންނަވާނީ ހަމައެެކަނި ރައީސް ޔާމީނަށް ނޫން ކަމަށް ބުނެ ރައީސް ޔާމީނަށް ރައްދު ދޭން މަސައްކަތް މިކުރަނީ 6 މަސް ދުވަހުގެ އެލް ބޯޑު އަޅުވައިގެން އިނގިރޭސި ބަހުން ދަރިވަރުވަމުންދާ މީހެކެވެ.

ކޮންމެ އަކަސް އިގްތިސޯދަކީ ނުހަނު އިލްމާ ހިލުމު ހުރެގެން ހަމަމަގަށް އެޅުވޭނެ ކަމަކަށްވާއިރު އެކަން ނޭނގޭ ބަޔަކު ތިމަންނާ މެން އެކަން ކުރާނަމޭ އިގްތިސޯދު އިނދަ ނުޖެހޭ ބުނާއިރު، އިނދަ ޖެހިގެން ގޮސް ޅިނދު ބިނދޭއިރުވެސް މިމީހުންނަށް މިވަނީ ކީއްކަން ރޭކާ ލާނެބާއޭ ހިތަށް އަރައެވެ.

ރާއްޖޭގެ މާލީ ހާލަތު ކަންބޮޑުވާ ދަރަޖައަކަށް ދަށަށް ދިޔުމާ ގުޅިގެން، މާލީ އިދާރާތަކުން ވަނީ ހަރަދު ކުޑަ ނުކޮށްފިނަމަ ރާއްޖެ ދަރަނިވެރިވާނެ ކަމުގެ އިންޒާރު ދީފައިވާއިރު ރާއްޖެ ބަނގުރޫޓު ނުވާނެ ކަމަށާ ރާއްޖެއަށް މިހާރު ބޭނުންވެފައި ހުރި ފައިސާ ރާއްޖެއަށް ގެނެސް، ބޭރާއި އެތެރޭގައި ހުރި ދަރަނިތައް ދައްކައި ނިންމާނެ ކަމަށް ހަ މަސް ދުވަހުގެ ކޯޙުގައި އުޅޭ ވަޒީރަކު ވިދާޅުވި ވާހަކަ ރަށުތެރޭގައި އެބަ ކިޔައެވެ.

މިހެން މި އަޑު އިވުމުން ހަނދާނަށް އައީ ރިޔާސީ އިންތިހާބުގައި ރައީސް މުހައްމަދު މުއިއްޒުވެސް މި ބީދައިން ދެއްކެވި ވާހަކަފުޅެކެވެ. އާދޭހެވެ. ރާއްޖޭގެ ދަރަނި ދައްކަން ބޭނުންވާ ފައިސާ ހަމަޖެހިފައިވާކަމުގެ ގްރީން ސިގްނަލް ލިބިފައި އޮތް ވާހަކަފުޅު އެމަނިކުފާނު ވިދާޅުވިއެވެ. ނަމަވެސް ވެރިކަމަށް 8 މަސް ވެގެން ދިޔައިރު މިއޮތީ ޚަރަދުތައް ދެކޮޅު ނުޖެހިގެން ޚަރަދުކުޑަކުރުމުގެ ސިޔާސަތެއް އިއުލާންކޮށްފައެވެ. އެއަށް އަދި އަމަލުނުކުރި ނަމަވެސްވެއެވެ.

ކޮންމެ އަކަސް ގައުމުގެ އިގްތިސޯދީ ހާލަތާ މެދު އެ ދާއިރާއިން ދަސްވެނިވެގެން ތިއްބެވި ބޭފުޅުން ވާހަކަފުޅު ދެއްކެވުމުން އެކަމަށް ރައްދު ދޭން ގޭގައި އަލިފު ބާ ޖަހާ އެންމެ ތުއްތު ކުއްޖާ ނެރުނީމާ ދެން ބުނެލަން ޖެހޭނީ ނުފޯރާ ފޮތިން ފޫގަޅަން އުޅުނީމާ ފެންނާނެ ލަދުވެތި މަންޒަރުކަމަށެވެ.

އިގްތިސޯދީ ހާލަތު ރަގަޅު ކުރަން ފައިސާގެ އެހީތެރިކަން ގެންނަނީ ގެންނަނީގައެވެ. އެހެންކަމުން އިބްރާހިމުގެ ސަރުކާރެކޭ މުހައްމަދުގެ ސަރުކާރެކޭ ތަފާތެއް ނެތެއްނުންތޯއެވެ. އިބްރާހިމު 5 އަހަރު ނިންމާލީ އަންނަނީ އަންނަނީގައި ވިއްޔާއެވެ. މުހައްމަދު ދައުރު މި ދުއްވާލަނި ގެންނަނީ ގެންނަނީގައި ވިއްޔާއެވެ.

އިގްތިސޯދު ތިމަންނާ މެންނަށްވެސް އެނގެޔޭ ކިޔާ މޭ ފުއްޕާ ކަރުން ނާރުއް ފުއްޕާ ހަޅޭއްލެވިޔަކަސް އަދި ކަމަކު ނުދާނެއެވެ. ނިކަން އަމަލުންވެސް އެކަން ދައްކަބަލާށެވެ. ގެންނާނަމޭ ގެންނާނަމޭ ބަންޖެއްހެން ނުކިޔާ ބޭނުންވާ ފައިސާ ނިކަން ގެނެސްބަލާށެވެ. މޮޅޭ އަހަރުމެން ބުނާނަމެވެ.