އަލް މަދީނާ އިންވެސްޓްމެންޓް ޕްރައިވެޓް ލިމިޓެޑުން ހުޅުމާޅޭގައި ސްކޫލް އަޅާ ބިން ހޯދާފައިވަނީ ނުހައްގުން ކަމަށް ބުނެ ސޯޝަލް މީޑިއާގައި ފަތުރަމުންދާ ވާހަކަތައް އިސްލާމީ ކަންކަމާ ބެހޭ ވަޒީރު ޑރ. މުހައްމަދު ޝަހީމް އަލީ ސައީދު ދޮގުކުރައްވައިފި އެވެ.
މި މަޝްރޫއު ހަވާލުކޮށްފައިވަނީ ޑރ. ޝަހީމްގެ އާއިލީ ކުންފުންޏަކަށް ކަމަށް ބުނެ ސޯޝަލް މީޑިއާގައި ދަނީ އަޑު ފަތުރަމުންނެވެ. އަދި މިއީ އޮޅުވާލައިގެން ނުފޫޒުގެ ބޭނުން ކޮށްގެން ހޯދި މަޝްރޫއެއްކަމަށްވެސް ވަނީ އަޑު ފެތުރިފަ އެވެ.
އެހެންނަމަވެސް މިކަމާ ގުޅޭގޮތުން ވަޒީރު ވިދާޅުވީ ސްކޫލް އަޅާ ބިމަކީ އޮންނަ އުސޫލުން ހުރިހާ އިޖްރާއާތުތައް ފުރިހަމަކޮށް ކުރީގެ ސަރުކާރުން އެވޯޑު ކުރި މަޝްރޫއެއް ކަމަށެވެ.
އަދި ސަރުކާރު ބަދަލުވުމަށްފަހު އެގްރީމެންޓަށް އެއްވެސް ބަދަލެއް ގެނެސްފައިނުވާ ކަމަށާއި ބިމަކީ ކުލި ދައްކާގޮތައް އޮތް ބިމެއް ކަމަށް ވަޒީރު ވިދާޅުވި އެވެ. ބިމުގެ އަރިމަތީގައި ބިނާކުރާ މިސްކިތަކީ ދެ ހާހެއްހާ މީހުންނަށް ނަމާދު ކުރެވޭ ގޮތައް ލައިބްރަރީއަކާއެކު ދެ ބުރިއަށް އަޅާ މިސްކިތެއް ކަމަށްވެސް ވިދާޅުވެފައި ވެއެވެ.
