މަޖިލީހުގައި ބޭކާރު ވާހަކަ ނުދެއްކޭނެ ކަމަށް ވިދާޅުވެ، މަޖިލީސް ރައީސް އަބްދުއްރަހީމް އަބްދުްﷲ (އަދުރޭ9، ވިލިމާލޭ ދާއިރާ މެމްބަރު މުހައްމަދު އިސްމާއިލްގެ މައިކުން އަޑު ކަނޑާލާ އިންޒާރުދީފިއެވެ.

މަޖިލީހުގައި ކޮންސްޓްރަކްޝަން އެންޑް އިންފްރާސްޓްރަކްޗާ މިނިސްޓަރު ޑރ. އަބަދުالله މުއްތަލިބުއާ ސުވާލު ކުރުން ކުރިއަށް ގެންދިޔައިރު މެމްބަރު މުހައްމަދު އިސްމާއިލްއަށް ލިބިވަޑައިގެންނެވި ފުރުސަތުގައި 45 ސިކުންތުވީއިރު ވެސް ވިލިމާލޭ ދާއިރާ ރަައްޔިތުންގެ ކަންބޮޑުވުންތައް ހިއްސާކުރަމުން ގެންދިއުމުން އެކަމާ ނުރުހުންވެ އަދުރޭ ވަނީ މުހައްމަދުގެ މައިކުން އަޑު ކަނޑާލާފައެވެ.

އެ މަންޒަރު ފެންނަ ވީޑިއޯ ކްލިޕެއް ޚުދު މުހައްމަދުވެސް ހިއްސާކޮށްފައިވެއެވެ.

މެންބަރު އިސްމާއިލް ވަނީ ބްރިޖުގެ މަސައްކަތަށް ވިލިމާލޭގެ މަގުތައް ބޭނުންކޮށްގެން، އެ މަގުތައް ފުނޑުފުނޑުވެގެންދާތީ ރައްޔިތުން ވަރަށް ކަންބޮޑުވާ ކަމަށެވެ.

ނަމަވެސް އެހިސާބުން ވަގުތު ހަމަވެ، މައިކުން އަޑު ކަނޑާލުމުން ވެސް މެމްބަރު މުހައްމަދު އިސްމާއިލް ދިޔައީ ވާހަކަ ދައްކަވަމުންނެވެ.

އެއާއެކު މުހައްމަދުގެ މައިކުން އަޑު ކަނޑާލާ އަދުރޭ ވަނީ އިއްޒަތްތެރި ވަޒީރުންނާ ސުވާލު ކުރުމަށް މަޖިލީހުގެ ތަޅުމަށް ގެނެސް ވަޒީރާ އެ ދުވަހު ކުރެވޭ ސުވާލާ އެއްގޮތަކަށް ވެސް މެމްބަރު ދައްކަވާ ވާހަކަ ދިމާނުވާ ހިސާބުން، މަޖިލީހުގެ ފުރުސަތު ނަންގަވައިގެން ބޭނުންހާ ވާހަކައެއް ދައްކަން ރިޔާސަތުން ފުރުސަތު ނުދޭނެކަމަށް ބުނެފައެވެ.

އަބްދުއްރަހީމް އެގޮތަށް ވިދާޅުވުމުން، ކެންދޫ ދާއިރާގެ އެމްޑީޕީ މެންބަރު މައުރޫފް ޝާކިރު ނިޒާމީ ނުކުތާއެއް ނަންގަވައި ވިދާޅުވީ މައްޗަންގޯޅި އުތުރު ދާއިރާގެ މެންބަރު އިބްރާހިމް މުހައްމަދުއަށް ވާހަކަ ނިންމާލަން ފުރުސަތު ދިނުމަށްފަހު، އެ ފުރުސަތު މެންބަރު އިސްމާއިލްއަށް ނުދިނުމުން އެކަން ފާހަގަކުރައްވާ ކަމަށެވެ.