ރާއްޖޭގައި ހަރަކާތްތެރިވާ ހިއުމަން ރައިޓްސް ޑިޓެއިނީ ވޮޗް އާއި ސަލަފު ޖަމިއްޔާ އާއި މައުމޫން ފައުންޑޭޝަން ފަދަ ވަރުގަދަ ޖަމްއިއްޔާތައް ނުހިމަނާ ޖަމްއިއްޔާތަކުގެ ލިސްޓް ޔޫތު މިނިސްޓްރީން އާންމުކޮށްފިއެވެ.

ޔޫތު މިނިސްޓްރީން ވަނީ "މަދަނީ ޖަމްއިއްޔާތަކުގެ ލިސްޓް 2024" ނެރެފައެވެ. އެ ލިސްޓްގައި 642 ޖަމިއްޔާއެއް ހިމެނެއެވެ.  ނަމަވެސް ލިސްޓު ނެރުނުއިރު ބައެއް ޖަމިއްޔާތަކުގެ ނަން ހިމަނާފައި ނުވާތީ އެ ޖަމްއިއްޔާތަކުންވަނީ ކަންބޮޑުވުން ފާޅުކޮށްފައެވެ.

އޭގެ ތެރޭގައި ރާއްޖޭގައި ދީނީ ހޭލުންތެރިކަމަށް އެންމެ ފުޅާ ދާއިރާއެއްގައި މަސައްކަތް ކުރާ ޖަމިއްޔަތުއް ސަލަފާ ގައުމީ އެކި މުނާސަބަތުތަކާއި ދީނީ މުހިންމު ދުވަސްތަކާއި އެ ނޫން ވެސް ފާހަގަކޮށްލެވޭ މުހިންމު މުނާސަބުތަކާއި ގުޅިގެން އިލްމީ ޖަލްސާތަކާއި ބައްދަލްވުންތައް ބާއްވާ އަދި އެނޫން އެކި ދާއިރާތަކުން މުހިންމު މަސައްކަތްތަކެއް ކުރަމުން އަންނަ ކުރީގެ ރައީސް / އިލްމުވެރިޔާ މައުމޫން އަބްދުލްގައްޔޫމްގެ މައުމޫން ފައުންޑޭޝަނާ އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދު އިސްވެ އުފެއްދެވި ޖަމިއްޔަތުއް "ރަހްމާ"އާ ރާއްޖޭގައި ހަރަކާތްތެރިވާ ހިއުމަން ރައިޓްސް ޑިޓެއިނީ ވޮޗް ފަދަ މުހިއްމު ޖަމްއިއްޔާތައް ހިމެނެއެވެ.

މިކަމާ ގުޅިގެން ޔޫތު މިނިސްޓްރީގެ ބަހެއް ވަނީ އަދި ލިބޭ ގޮތް ނުވެފައެވެ.