އާދިއްތަ ދުވަހުގެރޭ މުޅި ގައުމު ގުޑުވާލީ ރައީސް އޮފީހުގެ މިނިސްޓަރު އަލީ އާރިފުގެ ވަރުގަދަ އިގްތިސޯދީ ވާހަކައަކުންނެވެ. މި ވާހަކަ މިހާރު ރައްޔިތުންނަށް އަލެއްވެސް ނުވާނެކަން ޔަގީނެވެ.

ކޮންމެއަކަސް އަލީ އާރިފުގެ އިގްތިސޯދީ ވިސްނުމުން މުޅި ގައުމުގެ ރައްޔިތުންގެ ދިރިއުޅުން ފަށް ފަންތިއަކަށް ތިރިކުރަން ޖެހިއްޖެއެވެ. ބަތާ ގަރުދިޔައާ ކައިގެންނެވެ. މިހާ ހިސާބުން ދެން ބަަލާލަން ޖެހެނީ ހަގީގަތުގައިވެސް ބަތާ ގަރުދިޔަ ގޭގައި ކެއްކީމާ އަގު ހެޔޮވޭ ތޯއެވެ؟

ގިނަ ގޭބިސީތަކުގައި ޚާއްސަކޮށް މާލެ ކަހަލަ ދިރިއުޅުމުގެ އަގު ބޮޑު ސިޓީތަކުގައި އާއިލާތައް ދިރިއުޅެމުްނ ދަނ ގިނައިން ވަކިން ކުދި ކުދި ތަންތަންކޮޅު ބޮޑޫ އަގުގައި ކުލި ދައްކައިގެންނެވެ. އެއިން ރައްޔިތެއް މުސާރަ އަކީ ނަމަވެސް ކިރިޔާ ކުލި ހަމަ ކޮށްލެވޭ ވަރުކަމަށް ގިނަ ފަހަރު އޮންނަނީ ވެފައެވެ. އަދި ދިރިއުޅުމުގެ އެހެން ޒަރޫރީ ބޭނުންތައް ފުއްދައިގެން އުޅޭ ނިކަމެތި ރައްޔިތުން މިހާރު ވަރަށް މަދުވެސް މެއެވެ.

ކަނޑުމަހުގެ އަގަށް ބަލާއިރު އެއީ ރަން ކަމަށް މިހާރު ގިނަ ބަޔަކު ސިފަކުރެއެވެ. 900 ގްރާމުގެ ކުކުޅެއް -/60އަށް ލިބޭއިރު ކަނޑުމަސް ކިބައެއް ވެސް ގިނަ ފަހަރު ލިބޭނީ -/70 ވަރަކަށް ރުފިޔާއަށެވެ. އެއީ އަދި ކުޑަ މަހެއްގެއެވެ.

އެހެންކަމުން ހަނޑުވެސް އަގު ބޮޑުވެފައިވާ މި ދުވަސްވަރު ގިނަ މީހުން ދިރިއުޅޭ ގެއަކަށް ދެއިރަށް ބަނޑުފުރާ މުއްތިކުރުމަށް ރަގަޅު ވާނީ ހުސް ގަރުދިޔަ ކޮޅެއް އެ އަގުގައި ހޭދަކުރުންތޯ ނުވަތަ އެ އަގުގައި ކުކުޅެއް ގަނެގެން އަނގަޔަށް މީރު އެއްޗެއް ކެއުންތޯ މިއީ މިއަދު ގިނަ ބަޔަކު ކުރަމުން އަންނަ ސުވާލެކެވެ.

ދެން މީގައި އޮތް އަނެއް ކަމަކީ އިގްތިސޯދީ ހާލަތު ދަށްވެގެން އެ ވާހަކަ ވެރިން ދައްކަމުންދާއިރު ވެރިންގެ އިސްނެގުން އެކަމުގައި ނުފެންނަކަމެވެ. ގައުމުގެ އިގްތިސޯދީ ހާލަތު މިހާ ނުކިސިޔާރުވެގެން އުޅޭ އަމިއްލަ ވިޔަފާރިންވެސް މަންފާ ލިބޭ ރައީސަކު ގައުމުގައި ހުންނެވިއިރު މުސާރައިން އެންމެ ފައިސާ ފޮއްޗެއްވެސް ނެންގެވުމުގައި މަދު ކުރެއްވިއްޔާ ވާނީ އަޅެފަހެ ކިއެއްތޯއެވެ؟ ސިޔާސީ ދަށް މަގާމުތަކުގައި ތިބި މީހުންނަށް ރޯޅި ބޭލުމުގެ ބަދަލުގައި މަތިފަޑީގައި އެއް ދަރަޖައިގައި ތިބި ސިޔާސީ މަގާމުތައް މަދުކޮށް މުސާރައިގެ ގިންތީގެ ފަރަގު ކުޑަކުރިއްޔާ ވާނީ ކިއެއްތޯއެވެ؟ އަމިއްލަ ބަފައިބެއާ ކޮއްކޮ ވެސް ހިިމެނޭހެން ދެމުންދާ ވަޒީފާތައް ހުއްޓާލިއްޔާ ވާނީ ކިއެއްތޯއެވެ؟

އޭގެ ބަދަލުގައި ރަޑޭ ރަޑޭ ކިޔާލަ ކިޔާލާ ރައްޔިތުންނާ ހުރިހާކަމެއް ޖާމިނުކުރަމުން ސެޕްޓިމުންނާ އެޓޮމިކްސްފަދަ ރެސްޓޯރެންޓުތަކުން ކަމުން މި ދުވަނީ ރައްޔިތުން ދޭ ފައިސާއިންނެވެ. އެކަމަކު ރައްޔިތުންނަށް އެމީހުން ބޭނުން އެއްޗެއް ކެއުމުގެ ހައްގުވެސް ނުދިން މި ސަރުކާރުގެ ވެރިން ލަދެއްވެސް ނުގަނެއެވެ. ރައްޔިތުންގެ ޓެކްސް ފައިސާއިން ބޮޑު މުސާރައިގައި ތިބެގެން އައްޔާޝީކުރަމުން ބޭކާރު ކަރަދުކުރަމުން ނިފާގަތުގެ އަމަލުތައް ހިންގަމުން، ރައްޔިތުން ކައިރީ ގަރުދިޔައާ ބަތާ ކައިގެން ދަށް ފަންތީގެ ދިރިއުޅުމަކަށް ތިރިވާށޭ ބުނަން ކެރޭނީ ހާދަހާ އަސްލުވެސް ލަދު ކުޑަވީމައެވެ. ކަނީ އަހަރުމެން ރައްޔިތުންގެ ލާރިއެވެ. ލަނީ އަހަރުމެން ރައްޔިތުންގެ ލާރިން ގަންނަ އަންނައުނެވެ. ދުއްވަނި އަހަރުމެން ރައްޔިތުންގެ ފައިސާއިން ގަންނަ ވެހިކަލްތަކެވެ. އެކަމަކު އަހަރުމެން ރައްޔިތުން ދަށްކޮށްލުމުގެ ނިޔަތުގައި މިކިޔަނީ ބޮޑެތި ލޯނުތައް ނަގައިގެން އައިފޯނާ ސައިކަލާ އަގުބޮޑޫ ދިރިއުޅުން އުޅެނީ ކީއްކުރަން ހެއްޔެވެ. ބަލަ އާރިފޫއެވެ. ރައްޔިތުން ނަގާ ލޯނު އާރިފު ދައްކަން ދުވަހަކުވެސް ޖެހުނީހެއްޔެވެ. ރައްޔިތުން ނަގާ ލޯނެއް ދައްކަން ބީއެމްއެލްއަކުން ސިޔާސީ މީހަކަށް ނުގުޅާނެއެވެ. ތިޔަ ކަހަލ ކޯލެއް އައި ނަމަ އެއީ ސްކޭމްއެކެވެ.

ކޮންމެ އަކަސް ހިތި ބޭސްވެސް ބޯންވީ ރައްޔިތުންނެވެ. ގަރުދިޔަ އާ ބަތް ކައިގެން ދިރިއުޅުން ދަށް ފަންތިއަކަށް ތިރި ކުރަންވީ ވެސް ރައްޔިތުންނެވެ. ބޮޑޫ ކުރި ޓެކްސްވެސް ދައްކަން ވީ ރައްޔިތުންނެވެ. ވެރިންނަށް އޮތީ ރައްޔިތުންގެ ފައިސާއިން ބޮޑު މުސާރަ ނަގައިގެން އައްޔާޝީކުރުމެވެ. މިއީ ދިވެހީންގެ ރާއްޖޭގެ ހުކުމްހެއްޔެވެ؟