އިންޑިއާ އެކު ސިއްރު ގުޅުންތަކެއް ބާއްވަމުން ކުރީ ސަރުކާރުން ދިޔަ ކަމުގެ ތުހުމަތު ކުރި މީހުން ވެރިކަމަށް އައިސް އެ ފަދަ ސިއްރުތަކެއް ގެންގުޅެމުން ދާކަމުގެ ތުހުމަތު ރައީސް އަބްދުﷲ ޔާމީން ކުރައްވައިފިއެވެ.

ރައީސް ޔާމީން މިފަދަ ތުހުމަތުތަކެއް އަމާޒުކުރެއްވީ ދަ ފްރޮންޓު އޮފީހުގައި މިރޭ ކުރިއަށްދާ ޖަލްސާގައި ވާހަކަފުޅު ދައްކަވަމުންނެވެ.

އެމަނިކުފާނު ވިދާޅުވީ އިންޑިއާ އާ އަބަދުވެސް ރާއްޖެއާ ގާތް ގުޅުން އޮންނަ ކަމަށާ ނަމަވެސް އިބްރާހިމް މުހައްމަދު ސޯލިހުގެ ސަރުކާރުން އިންޑިއާއެކު ވަރަށް ގާތްވެ ރާއްޖެ ނުރައްކަލަށް ވައްޓާލި ކަމަށެވެ.

އެކަމާ ދެކޮޅަށް ވަކާލާތު ކުރީ މީހުންނަށް ވެރިކަން ލިބުމުން ދިވެހި ހުރިހާ ރައްޔިތުން ވެސް އުއްމީދުކުރީ އިންޑިއާއާ އެކު އޮތް ސިއްރު ގާތް ގުޅުން ނިމުމަކަށް އަންނާނެކަމަށް ނަމަވެސް އެކަން އެހެން ނުވި ކަމަށާ އެއީ ހިތާމަ ހުރި ކަމެއް ކަމަށްވެސް ރައީސް ޔާމީން ވިދާޅުވިއެވެ.

ރައީސް ޔާމީން މިފަދައިން ވިދާޅުވެފައިވާއިރު އިންޑިއާ އެކު އެތައް އެއްބަސްވުމެއް ހަދާފައިވާ ކަމަށް ކުރީ ސަރުކާރުގެ ދުވަސްވަރު އަޑުއުފުލި ބޭފުޅުން މިއަދު ޑިފެންސް މިނިސްޓްރީގެ ވެރިންނަށް ތިއްބެވި އިރުވެސް އެ ވިދާޅުވި އެއްބަސްވުންތައް ހާމަކުރުމުގައި ވަނީ ފަހަތު ފަޔަށް ބުރަވެފައެވެ.