މޯލްޑިވްސް އެއާރޕޯޓްސް ކޮމްޕެނީ ލިމިޓެޑްގެ އެކްސް އެކައުންޓުން ޗެނަލް13ގެ އެކްސް އެކައުންޓު ބްލޮކުކޮށްފިއެވެ.

އެމްއޭސީއެލްގެ އެކްސް އެކައުންޓުން ޗެނަލް13 ބްލޮކުކޮށްފައިވަނީ އެ ކުންފުނީގެ އެކްސް އެކައުންޓުން ޚަބަރެއް ރިވިއުކުރިތާ މާގިނަ އިރުތަކެއް ނުވަނީސްއެވެ. އެގޮތުން ޗެނަލް13ގެ ސްޓޭޝަން މެނޭޖަރު ތޭރަ އޮންލައިނަށް މައުލޫމާތު ދެއްވަމުން ވިދާޅުވީ، ޗެނަލް13ގެ އޮފިޝަލް އެކައުންޓުން އެމްއޭސީއެލްގެ ޚަބަރެއް ރިވިއު ކުރިތާ އިރުކޮޅެއް ނުވެ އެމްއޭސީއެލްގެ އެކްސް އެކައުންޓުން ޗެނަލް13 ބްލޮކް ކޮށްފައިވާ ކަމަށެވެ.

މިކަމާ ގުޅިގެން އެކުންފުނީގެ ބަހެއް ހޯދާލުމަށް ކުންފުނީގެ ޑެޕިއުޓީ މެނޭޖިން ޑިރެކްޓަރ މުހައްމަދު ލަމްއާންއަށް ގުޅާލުމުން ފޯނަށް ޖަވާބު ދެއްވާފައިނުވެއެވެ. ލަމްއާން މިފަހަކަށް އައިސް ފާހަގަވެފައިވަނީ ޗެނަލް13ގެ ޚަބަރުތަކަށް ފާޑުކިޔާ ރައީސް އަބްދުﷲ ޔާމީނަށް ނިސްބަތްކޮށްވެސް މީސް މީޑިޔާގައި އެކި ވާހަކަ ފަތުރުއްވާ ބޭފުޅެއްގެ ގޮތުގައެވެ.

ނަމަވެސް ލަމްއާންއަކީ މީގެ ކުރިން ޚަބަރާ މައުލޫމާތު ފެތުރުމުގައި ހަރަކާތްތެރިވެ އަދި ރާއްޖޭގެ އެންމެ ބޮޑު އެއް ޓީވީ ސްޓޭޝަނާ ހަވާލުވެ ހުރި ބޭފުޅެއްކަން ވެސް ފާހަގަކޮށްލެވެއެވެ.

މިފަދަ ކަމެއް ހިނގާފައިވާއިރު ރައީސް އޮފީހުގެ މިނިސްޓަރު އިބްރާހިމު ހަލީލު އަދި ރައީސް ޑރ. މުހައްމަދު މުއިއްޒު ވެސް ތަކުރާރުކޮށް ވިދާޅުވެފައިވަނީ މީޑިޔާތަކަށް ހަމަހަމަ ފުރުސަތު މި ސަރުކާރުގައި އޮންނާނެ ކަމަށާ ފާޑުކިޔުންތައް ބަލައިގަންނާނެ ހާ ހިތްވަރު ހުންނާނެ ކަމަށެވެ.

ނަމަވެސް މީޑިޔާތަކުން ސަރުކާރުގެ ދޯހަޅި ވާހަކަ ގެނެސްދިނުމުން އެ ނޫހަކަށް ނުވަތަ ޓީވީ ސްޓޭޝަަކަށް ނިސްބަތްކޮށް ކުންފުނިތަކުގެ ވެރިންނާ ވަޒީރުންގެ ލެވެލްއިން ފެށިގެން ގޮސް ސިޔާސީ ހުރިހާ މަގާމުތަކެއްގައި ތިއްބަވާ ބޭފުޅުން މެދުވެރިކޮށް އެކަންކަމަށް ރައްދު ސަރުކާރުން ދޭކަން ފާހަގަކޮށްލެވެއެވެ. އެގޮތުން އެ ޚަބަރުތައް ލިޔާ ނޫސްވެރިންގެ ޒާތީ ދިރިއުޅުމާ ބެހި އެ ނޫސްވެރިންނަށް ފިޔަވަޅު އެޅުމަށް ބްރޮޑްކޮމްއާ އެމްއެމްސީއަށް އެންގުން ފަދަ ދަށު ދަރަޖއިގެ ކަންކަން ސަރުކާރުގެ އެކި ލެވެލްގެ ބޭފުޅުންގެ ފަރާތުން ވަނީ ފެނިގެން ގޮސްފައެވެ.