ރައީސް އިބްރާހިމު މުހައްމަދު ސޯލިހުއަކީ ރަސޫލާ (ޞޢޥ) ދުޢާ ދެއްވި ފަދަ ވެރިއެއް ކަމަށް އެއް ބަޔަކު ބުނެއުޅުނު އަޑު އަހަރުމެން އެހީމުއެވެ. ނަމަވެސް ފެންނަމުން ދިޔައީ މުޅި ގައުމުގައި ނުތަވަސް ކަމާ ހިތްހަމަ ޖެހުމުގެ މަންޒަރުތަކެވެ.

ހަމައެހެން، ރައީސް މުހައްމަދު މުއިއްޒުއަކީ މި ދިވެހި ތާރީޚު ނުދެކޭ ހާ ގަޓު، މޮޅު، ހިލުމު ހުރި ރައީސެއް ކަމަށާ މި ރައީސަށް ވާނެ ކަމަށް ބުނެ ސަރުކާރުގެ ޓްވީޓުކުރާ ކުދިންކޮޅު ލިޔަމުން ދެއެވެ. މަގާމާ މުސާރަ ހަލާލުވާ ވަރު ކުރަނީކަން ނޭނގެއެވެ.

ކޮންމެ އަކަސް އެ ބުނާ ސަޅި ވެރިމީހާ، މޮޅު ވެރިމީހާގެ ވެރިކަމަށް 9 މަސް ނުފުރެނީސް ރައްޔިތުން ހޯހޯ ގޮވަން ފަށައިފިއެވެ. ވެރިކަން ކުރަން ނޭނގޭ ކަމަށާ މިއީ އަދި، ކުރީ ސަރުކާރަށް ވުރެ މާ ހާލަތު ގޯސް ބައެއް ކަމަށް ބުނަން ފަށައިފިއެވެ.

މިކަންކަމުގެ އޮނބި އަޅަން ސަރުކާރުން ކިތަންމެ މަސައްކަތްކުރި ނަމަވެސް މިކަންކަން ދަނީ ސަރުކާރު ތެރެއިންވެސް ފަޅަ ފަޅައިގެންނެވެ.

ސަރުކާރުގެ ތެރޭގައި ރެނދުލާ ވެރިންނާ މެދު މުވައްޒަފުންވެސް ހިތްހަމަ ނުޖެހުން ފާޅުކުރަނީއެވެ. ތަންތަނަށް ނުކަތާވަރަށް މުވައްޒަފުން އައްޔަންކޮށް އަސާސީ ހައްގުތައް ވެސް އެ ތަންތަނުގައި ކަށަވަރު ނުކޮށްދޭތީ ނުރުހުމާ ހިތްހަމަ ނުޖެހުމުގެ ޝުޢޫރުތައް ދަނީ ގުގުމަމުންނެވެ.

ވެރިކަން ކުރައްވާނީ އެންމެ ސުލްހަވެރިކަމާ އަމާނާތްތެރިކަމާ އެކު ކަމަށް ވިދާޅުވެ ރައީސް މުއިއްޒު ގެންދަވަނީ މުވައްޒަފުންނާ މެދުވެސް ހަމަ ހަމަ އުސޫލެއް ނެތި ބޭއިންސާފުވަމުން ކަމަށް ބުނާ އަޑު ގަދަވާން ފަށައިފިއެވެ.

މި ސަރުކާރުގެ ދިފާއުގައި އެންމެ ގިނައިން އެކްސް ޕޯސްޓާ ފޭސްބުކް ޕޯސްޓު ކުރައްވާ ޝިއުނާ މެޑަމް އެ ވުޒާރާއެއްގެ ނައިބެއް ގޮތުގައި ހުންނަވާ ވުޒާރާގައި މިކަންކަން ވަނީ އަދި އަމުދުން ބޮއްސުންލާފައެވެ. ސަރުކާރަށް 8 މަހޭ އަދި ކަމެއް ނުވެގެން ބަޔަކު ރޯވަރު ނުވެޔޭ ވިދާޅުވެ ނައިބު ވަޒީރު ކަނބުލޭގެ ޕޯސްޓުކުރައްވަމުން ގެންދަވާއިރު، ދަށުން މަސައްކަތްކުރާ މުވައްޒަފުން އެ ތިބެނީ ގަޟާ ޙާޖާ ވެސް ކޮށްލެވޭނެ ވަރު ވަޒީފާގެ މާޙައުލުގައި ނެތިފައެވެ.

މަސައްކަތްކުރަން ޖެހެނީ އަމިއްލަ އާލާތްތަކާ ކަރަންޓު ކޭބަލާ ބޭނުންކޮށްގެން އަމިއްލަ ފޯނުން ހޮޓް ސްޕޮޓު ދޫކޮށްގެންނެވެ. ނަމަވެސް ނައިބު ވަޒީރު ވިދާޅުވަނީ "ކަމޯން އިޓްސް އޮންލީ 8 މަންތްސް އެންޑް ވީ ހޭވް ޓު ގިވަ ޓައިމް ޓު ދަ ޕްރެޒިޑެންޓު" ކަމަށެވެ.

ސަޅި، މޮޅު، އާރުލާ ވެރިކަމުގައި ދައުލަތުގެ މުވައްޒަފުންގެ ޙާލަކީ މިއީކަމުގައި ވާނަމަ ރައްޔިތުންނަށް އަދި މިސަރުކާރުން ޖައްސާނެ ޙާލާމެދު ރައްޔިތުން ވިސްނާށެވެ.

ބުނަނީ މިވަރު ސަޅި ސަރުކާރެއް ނާންނާނެ ކަމަށެވެ. ނަމަވެސް ފެންނަނީ މުވައްޒަފުންވެސް ޙައްގުތައް ކަށަވަރު ނުވެގެން ވެރިން ބޮލަށް އަރާ މަންޒަރެވެ. މިއީ ޓުއަރިޒަމް މިނިސްޓަރު ވިދާޅުވާ ފަދަ "އިކޮނޮމީ އެނގޭ" މޮޅު ވެރިން ތިބުމުން ވާ ގޮތް ކަމަށްވެސް ވެދާނެއެވެ. ދެކެ ދެކެ ވެސް މިވަރުކަމެއް އެކަމަކުވާ ނުދެކެމެވެ.