ހުވަފެން ދުށުމަކީ ގޯހެއް ނޫނެވެ. އެއި ގިނަ ފަހަރު އެކަމެއް ކާމިޔާބުކުރުމަސް އެޅޭ އެންމެ ފުރަތަމަ ބިންގާ ކަމަށްވުމުންނެވެ. ނަމަވެސް ބައެއް ފަހަރު ދެކޭ ހުވަފެންތައް ބިލާހަކަށް ވެގެން ހިނގައިދާނެ ކަމުގެ ބިރު އޮންނަނީ އެމީހެއްގެ ގާބިލިއްޔަތުކަމާ އެކަމާ ގުޅިފައި އޮންނަ މިންވަރުންނެވެ.

ހުވަފެން ދެކޭނީ ހިއްސާ ކުރާނީ ޚިޔާލު ކިޔައިދީ ހިތާ ހިތް ގުޅާނީ، ވައުދާ ހުވާކޮށް އަތާއަތް ގުޅާނީ ތަރައްގީގެ ނަޒަރުން ބަލަމުން ހިނގާނީ. މިއީ މިއަދު ރިޕޯޓު ފަށަމުން ބައެއް ތަންތަނުން ނަކަލު ކޮށްލި ބަސްކޮޅެކެވެ. އަމިއްލަ ބަސްތަކެއްވެސް ލައިގެންނެވެ.

ކޮންމެ އަކަސް މިހާ ހިސާބުން ތިޔަ އެންމެ ބޭފުޅުން ހިތަށް އަރާނެ ސުވާލަކީ މަރީ ދައްކަން މިއުޅެނީ ކޮން ވާހަކައެއް ބާވައެވެ. އެހެންވިއްޔާ ނިކަން ރަގަޅަށް އަޑު އައްސަވާށެވެ. މި އުޅެނީ ރާއްޖެއަށް އައި އައު ސަރުކާރުން މި ގައުމަށް ގެންނަން އުޅޭ ތަރައްގީގެ ބޮޑު ބިޔަ މަޝްރޫއެއްގެ ވާހަކައާ އެ ކަމާ މެދު ރައްޔިތުން ދައްކަމުން ގެންދާ ވާހަކައިގެ ތަފްސީލަށް ބަލާލަންށެވެ.

އެގޮތުން ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވެރިކަމާ ހަވާލުވުމަށްފަހު ދިވެހިންނަށް ދިމާވެފައިވާ ބޯހިޔާވަހިކަމުގެ މައްސަލައަށް ހައްލެއް ގެނެސްދިނުމަށް މި ސަރުކާރުން ފަށާފައިވާ އެންމެ ބޮޑު މަޝްރޫއުއަކީ، ރައީސް އަބްދުﷲ ޔާމީން ގެންގުޅުއްވި ފުށިދިއްގަރުފަޅުގެ ތަސައްވުރާ އެކު ތަރައްގީ ކުރާ ރަސްމާލެއެވެ.

މި ސިޓީ މާލެއާ ގުޅުވާލުމަށް ގެންގުޅޭނީ ޒަމާނީ ހައި ސްޕީޑު ފެރީ ނިޒާމެއް ކަމަށާއި އެއީ ރާޅާއި އޮއިގައި ނުޖެހި ދަތުރުކުރާ ޓެކްނޮލޮޖީ ހިމެނޭ ފެރީތަކަކަށް ވާނެ ކަމަށް ރައީސް މުހައްމަދު މުއިއްޒު ވަނީ މީގެ ކުރިން ވިދާޅުވެފައެވެ. އަދި ރަސްމާލެ ތަރައްގީ ކުރާ ތަނާ ޖެހިގެން އޮންނަ ފަޅުގައި މަތިންދާބޯޓް ޖެއްސޭނޭ ގޮތަށް އެއާ ސްޓްރިޕެއް ގާއިމްކޮށް، އެތަނާއި ރަސްމާލެ ބްރިޖަކުން ގުޅާލާނެ ކަމަށް ވެސް ރައީސް މުއިއްޒު ވިދާޅުވެފައިވެއެވެ. އުފާވެރި ޚަބަރުތަކެކެވެ. ހަގީގަތަކަށް ވެއްޖެ ނަމަ ކިތަންމެ ހާވެސް ރަގަޅުކަމަށް އެތައް ބަޔަކު ބުނަމުން ދިޔައެވެ.

ކަން މިހެން އޮއްވާ ދެން އިވިގެން ދިޔައީ މުޅި ތަފާތު ވާހަކައެކެވެ. އެކަމަކާ ގުޅިގެން މިހާރު ހޮޅު އަށިތަކުގައާ ކެފޭ ރެސްޓޯރެންޓުތަކުގެ މޭޒުތައް ދޮށުގައިވެސް އަދި ބައެއް ގޭގެ ސިޓިން ރޫމުތަކުގައިވެސް ވަނީ ބަހުސް ފަށާ ހިޔާލުފާޅުކުރަން ވެސް ފަށާފައެވެ.

ރައީސް މުއިއްޒު ރައީސްކަމަށް ހޮވިވަޑައިގަތުމުން ހުސްވި މާލެ ސިޓީގެ މޭޔަރުކަމުގެ ގޮނޑީއަށް އިންތިހާބުވެވަޑައިގެންނެވި އާދަމް އާޒިމުގެ ހުވާ ކުރުމުގެ ރަސްމިއްޔާތުގައި ޑރ. މުއިއްޒުވަނީ މާލެ އާއި ރަސްމާލެ ކަނޑު އަޑީގެ ޓަނަލަކުން ގުޅާލާނެކަމަށް އިއުލާންކޮށްފައެވެ. އެ ޓަނަލް ވެގެން ދާނީ، އެ ޓަނަލުގައި ދުއްވާ ޓްރެއިން [ރޭލު] ގައި ދާއިރާގައި ކަނޑު އަޑީގެ ރީތި މަންޒަރުތައް ވެސް ފެންނަ ޓަނަލްއަކަށްކަމަށްވެސް ވިދާޅުވިއެވެ.

މިއާއެކު ސުވާލުތަކާ ފާޑުކިޔުންތައް އަމާޒުވާން ފެށީ ތިޔަހެނެއް ނޫނެވެ. އެގޮތުން ރާއްޖޭގެ އެންމެ ގަދަ އެއް ކަނޑުކަމުގައިވާ ވާދޫ ކަނޑު ހުރަސްކޮށް އެ އޮޔާ އެ ރާޅުތަކުގެ ބާނިއާ ދެކޮޅަސް އެފަދަ ޓަނަލްއެއް އަޅިދާނެތޯއާ އެ ވިދާޅުވާ ގޮތަށް ފަރުމާ ކުރާ ޓަނަލެއް ނަަމަ ހުންނަން ޖެހޭނީ ބިއްލޫރިންކަމަށް ވާއިރު އެއާ ޕްރެޝަރ ހައި ހިސާބެއްގައި ބިއްލޫރިން ޓަނަލް އެޅޭނެތޯ ފަދަ ގިނަ ސުވާލުތަކެއް ރައްޔިތުން ފެންމަތިކުރުވަން ވަނީ ފަށާފައެވެ.

400 މީޓަރުު ފުނުގައި މި ޓަނަލް އަޅަން ރާވާފައިވައިރު އެ ސަރަހައްދުގެ ކަނޑުންވެސް އުޅަނަދުތައް ދަތުރު ކުރާނެއެވެ. މައްޗަށް ބޮއިތަކެއް ދޫކޮށް ކޮންމެ ދެ ބޮއެއްގެ ދެމެދުގައި 820 ފޫޓު ބަހައްޓަން ވަނީ ނިންމާފައެވެ.

ކޮންމެ އަކަސް ޗައިނާއަށް ކުރި ދަތުރުފުޅުގައި ރައީސް މުއިއްޒު މިކަމުގެ އަމަލީ ސިފަ ގެނައުމަށް މަޝްވަރާތައް ކުރެއްވިއެވެ. ކަރުދާހުގައި މިވަގުތު ތަސައްވުރެއްްގެ ގޮތުގައި އޮތް "ބިޔަ" ޕްރޮޖެކްޓު ހަގީގަތަކަށް ވެއްޖެނަމަ އެއީ ދިވެހި ތާރީޚުގައި ލިޔެވިގެންދާނެ ފަޚްރުވެރި ދުވަހަކަށް ވާނެއެވެ.

ނަމަވެސް ގިނަ ބަޔަކު އުފައްދާ ސުވާލަކީ އެ ޓަނަލް ބިލާހަކަށް ނުވެދާނެބާއެވެ؟ ދަރަނީގެ ބޮޑު ބިޔަ އަނދަވަޅެއްގައި އޮތްއިރު ގައުމަށް އަނެއްކާވެސް އެހެން ގައުމަކުން ދަރަނި ނަގައިގެން މި ފަދަ ޓަނަލްއެއް އެޅުމާ މެދުވެސް ގިނަ ބަޔަކު ސުވާލު އުފައްދައެވެ. މިއީ އިގްތިސޯދަށް ބޮޑު ބުރައަކަށް ނުވެނޫނީ ނުވާނެ ކަމަށްވެސް ގިނަ ބަޔަކު ދެކެއެވެ.