ފ.ފީއައްޔަށް ރައީސުލްޖުމްހޫރިއްޔާ ޑރ މުހައްމަދު މުއިއްޒު އައްޔަންކޮށްފައިވާ ޔޫތު އެސޯސިއޭޓް މަސައްކަތް ކުރާނެ އޮފީހެއް ނެތް އެހެންނަމަވެސް މަސައްކަތެއް ނުކޮށް މުސާރަ ނަގާތާ ހަތަރު މަސް ދުވަސް ވެއްޖެކަން ހާމަވެއްޖެއެވެ.

"ތޭރައޮންލައިން" އަށް މައުލޫމާތު ލިބުނުގޮތުގައި ފީއަލީ ޔޫތު އެސޯސިއޭޓްގެ މަޤާމަށް އައްޔަންކޮށްފައި ވަނީ އެ ރަށު ބްލޫނިއާގޭ މުޙައްމަދު އާމިރެވެ.

އޭނާ އެ މަޤާމަށް އައްޔަން ކޮށްފައި ވަނީ މިއަހަރުގެ މާޗު މަހުގެ 17 ވަނަ ދުވަހުއެވެ.

އެއީ 20 ވަނަ މަޖިލިސް އިންތިޚާބާ ދިމާކޮށްކަން ފާހަގަކޮށްލެވެއެވެ.

މިނިސްޓަރ އެޓް ދަ ޕްރެޒިޑެންޓްސް އޮފީސް ފޮރ ޕްރެޒިޑެންޝަލް އެފެއާޒް ޢަލީ ޢާރިފް ސޮއި ކުރައްވައި ފޮނުވާފައިވާ ޗިޓުގައިވާ ގޮތުން އެ ވަޒީފާގެ މުސާރަ އަކީ 13،000 ރުފިޔާއެވެ.

އެއީ މަޤާމުގެ މަހު މުސާރައިގެ ގޮތުގައި ލިބޭ 8000 ރުފިޔާގެ އިތުރުން، ލިވިން އެލަވަންސްގެ ގޮތުގައި ލިބޭ 5000 ރުފިޔާކަން އެ ޗިޓުން ހާމަވެއެވެ.

ފީއަލީގައި ޒުވާނުންގެ މަރުކަޒެއް ނުހުންނަ އިރު އެ މަގާމަށް އާމިރު އައްޔަންކޮށް ރައްޔިތުންގެ ފައިސާއިން ބޮޑު މުސާރަ ދެމުންދާތީ ގިނަ ބަޔަކު އަންނަނީ ނުރުހުންފާޅުކުރަމުންނެވެ.