ލިބެން ނުޖެހޭ ބަޔަކަށް 18 މިލިއަން ރުފިޔާ ނޭޝަނަލް ސޯޝަލް ޕްރޮޓެކްޝަން އެޖެންސީ އެންސްޕާއިން ކުރީ ސަރުކާރުގައި ދޫކުރިކަން ހާމަކޮށްފިއެވެ.

ނެޝަނަލް ސޯޝަލް ޕްރޮޓެކްޝަން އެޖެންސީން ދޫކުރާ އެކި އެލަވަންސްތަކުގެ ގޮތުގައި އިތުރު 18 މިލިއަން ރުފިޔާ ދޫކޮށްފައިވާކަން ހާމަވެފައިވަނީ އެ އެޖެންސީގެ 2022 ވަނަ އަހަރުގެ އޮޑިޓް ރިޕޯޓުންނެވެ.

އެ ރިޕޯޓުން ހާމަވެފައިވާ ގޮތުގައި 2021 ވަނަ އަހަރުގެ ނިޔަލަށް އެންސްޕާއަށް 18،466،814 ރުފިޔާ އަނބުރާ ލިބެންޖެހެ އެވެ. އެއީ، އެކަނިވެރި މައިން ނުވަތަ ބަފައިންނަށް ދެވޭ މާލީ އެހީއާއި ނުކުޅެދުންތެރިކަން ހުންނަ ފަރާތްތަކަށް ބޭނުންވާ ތެރަޕިއުޓިކް އެހީ އަދި ނުޅެދުންތެރިކަން ހުންނަ ފަރާތްތަކަށް ދެވޭ މާލީ އެހީގެ ގޮތުގައި އިތުރަށް ދެވިފައިވާ ފައިސާއެވެ.

އިތުރަށް ދޫކޮށްފައިވާ އެހީ ފައިސާގެ ތަފްސީލަށް ބަލާލާއިރު، އެކަނި ދަރިން ބަލަހައްޓައި މައިންނާއި ބަފައިންނަށް ދޭ އެލަވަންސް - 10,621,020، ނުކުޅެދުންތެރިކަން ހުންނަ ފަރާތްތަކަށް ދޭ އެލަވަންސް - 7,611,500، ނުކުޅެދުންތެރިކަން ހުންނަ ފަރާތްތަކަށް ބޭނުންވާ ތެރަޕީތަކަށް ދޭ އެލަވަންސް - 234,294 ހިމެނެއެވެ. މިއީ ދައުލަތުން މާލީ އެހީ ދޭ މީހުންގެ މައުލޫމާތު ބަދަލުވުމަށްފަހު ނުވަތަ ނިޔާވުމަށްފަހު ވެސް އެ މީހުންނަށް އެހީގެ ގޮތުގައި ދޫކޮށްފައިވާ ފައިސާ އެވެ.

އެންސްޕާއިން އޮޑިޓް އޮފީހަށް މައުލޫމާތު ދީފައިވާ ގޮތުގައި، އެގޮތަށް އިތުރަށް ޖަމާކުރެވިފައިވާ ފައިސާ އަނބުރާ ހޯދުމަށްޓަކައި އެ އެޖެންސީގައި ރިކަވަރީ ޔުނިޓެއް ގާއިމްކުރެވިފައިވީނަމަވެސް، އެ ޔުނިޓުގައި މަސައްކަތްކުރަނީ އެންމެ މުވައްޒަފެއް ކަމަށްވުމުން ރިކަވަރީގެ މަސައްކަތްތައް ކުރިއަށްގެންދަން ބޭނުންވާ ގޮތަށް އަދި އަވަސްމިނުގައި އެ މަސައްކަތް ކުރިއަށް ނުގެންދެވެއެވެ.

މި މައްސަލަ ހައްލު ކުރުމަށް އޮޑިޓް ރިޕޯޓުގައި ލަފާ ދީފައި އެލަވަންސް ލިބޭ މީހުންގެ ހާލަތު ބަދަލުވުމުން އެކަން އެންސްޕާއަށް އެނގޭނެ ނިޒާމެއް ގާއިމްކޮށް މޮނިޓާރ ކުރުމަށެވެ. އަދި ކޯޓުތަކުން ކައިވެންޏާއި ވަރީގެ އިތުރުން ނިޔާވާ މީހުންގެ މައުލޫމާތު ފަސޭހައިން ބެލޭނެ އިންޓަގްރޭޓެޑް ވިއުގައެއް ކަމާބެހޭ އިދާރާތަކާ ގުޅިގެން އެކުލަވާލުމަށް ވެސް ލަފާދިނެވެ.