ރައީސް އަބްދުﷲ ޔާމީން ވެރިކަމާއި ޙަވާލުވެވަޑައިގަތުމަށްފަހު ތަޢާރަފްކުރެއްވި ހުސްނުވާ އާސަންދައިން ގިނަ ބޮޑެތި ބަލިތަކަށްވެސް އައިޑީ ކާޑުގެ ބޭނުންކޮށްގެން ހިލޭ ފަރުވާ ކުރެވޭނެ ނިޒާމެއް ހަމަޖެހިގެން ދިޔައެވެ. މި ނިޒާމުގެ ދަށުން ހިދުމަތް ދޭން ފެށުމާއިއެކު އެއްވެސް ރައްޔިތެއްގެ އަތުގައި ފައިސާ ނެތިގެން ފަރުވާ ނުކުރެވިފައި ހުންނަ ހުރުން މާޒީއާއެކު ފަހަނައަޅާދިޔައެވެ.

ނަމަވެސް ރައީސް ޑރ މުހައްމަދު މުއިއްޒުގެ ސަރުކާރު އައުމަށް ފަހުއެންމެ ގިނައިން އިވޭ އަޑަކީ ބޭސް ނުލިބޭ، އާސަންދަ ނުލިބޭ، އެންސްޕާ އެހީ ނުލިބޭ މިއެވެ. ކަންވެގެން އުޅޭ ގޮތް އެކަކަށްވެސް ނޭނގޭ އިރު އެނގޭހާ ވެސް ކަމަކީ އެންސްޕާ / އާސަންދައިގެ ޚިދުމަތް ބޮޑެތި ކަންކަމުގައި ހޯދުން މިހާރު ވަނީ ބޮޑު ތަކުލީފަކަށް ވެފައި ކަމެވެ. ދައުލަތުގައި ފައިސާ ނެތް ނެތް ގޮވަމުން އެންސްޕާ މެދުވެރިކޮށް ބޮޑު ޓީވީ ސްޓޭޝަން އުފެއްދިކަމުގެ ތުހުމަތުވެސް ގައުމުގައި ކުރެވުެމުންދާއިރު ނިކަމެތި ރައްޔިތުންގެ ބޭސް ފަރުވާ ހުރި ފައިސާ ކޮޅު ވެރިންގެ ބޭނުންތަކަށް ޚަލާސްކުރުމަކީ ބަލައިގަނެވޭނެ ކަމެއް ނޫންތާއެވެ.

މީގެ އިތުރުން ދިވެހި ރައްޔިތުންގެ ހެލްތު ސްކީމަކީ މިއަދު ވަކި ބަޔަކަށް މަންފާވެ ވަކި ބަޔަކަށް ލިބޭ ޚިދުމަތެއްގެ ގޮތުގައި ވެސް ގިނަ ބަޔަކު ސިފަކުރެއެވެ. އެހެނީ އެއްބަޔަކަށް ބޮޑު ކަމެއް ޖެހިގެން އެންސްޕާއާ ނުވަތަ އާސަންދައަށް ހުށަހަޅައިފިނަމަ ދިގު ދެމިގެންދާ ދިއުމަކުން ޚިދުމަތް ލިބުމުގައި ދުވަސްތައް ދެމިގެން ދާއިރު އަނެއް ބަޔަކު އިނގިލީގައި އިންނަ ނިޔަ ރޮދިކޮޅު ދައްކާލަން ހުށަހެޅި ނަމަވެސް އެ ދުވަހުން ދުވަހަށް ވެސް ޚިދުމަތް ހަމަޖެހިގެން ދާދިއުމުގެ ސިޔާސަތު އޮތުމުންނެވެ.

ވެރިން މިކަން ދޮގުުކުރި ނަމަވެސް މިއީ މިކަން މިއަދު ގައުމުގައި އޮތް ގޮތެވެ. ނިކަމެތި ރައްޔިތު މީހާ ބޭސް ސިޓީއާ ބޭސް ފަރުވާއަށް ސަލާން ޖަހަމުން މުޅި ސޯޝަލް މީޑިޔާގައި ޕޯސްޓުތައް ފުރެމުންދާއިރު ވެރިންގެ ގާތް މީހުންނާ ވެރިންނަށާ ވެރިންގެ ޕާޓީ ކުދިންނަށް ޚިދުމަތް ދިނުމަށް ވަކި ޑެސްކެއް އާސަންދަ / އެންސްޕާއިން ހަމަ ޖެއްސުމަކީ ބޮޑު ކެކުރި ބޮޑުކޮށް ކުޑަ ކެކުރި ކުޑަ ކުރާކަމުގެ އެންމެ ފުރިހަމަ މިސާލެވެ.

އާސަންދަ / އެންސްޕާ ހޯދަން ހުށަހެޅުމުން ދިގު ދެމިގެންދާ ދިއުމަށް ނިމުން އޮންނަނީ މެމްބަރު މެދުވެރިކޮށް ނުވަތަ ވެރިޔަކު މެދުވެރިކޮށް އެ ދެ ކުންފުނީގެ ވެރިންނާ ހަމައަށް ގެންދިއުމުން ކަމީ އެންމެން ދަންނަ ބޮޑު ސިއްރެކެވެ.

އެންސްޕާ / އާސަންދައަކީ އިކޮނޮމީ ބްލީޑުކޮށްގެން ދޭ ޚިދުމަތެއް ނަމަވެސް އެކަމުގައި ރައްޔިތުންގެ މެދުގައި ތަފާތު ކުރުން އޮވެގެން ނުވާނެއެވެ. ތިމާއަށް ކެމްޕެއިން ކޮށްދިން މީހާއަށް މޮޅު ގޮތް ތިމާއަށް ވޯޓު ނުދޭ ނުވަތަ އިދިކޮޅަށް ކެމްޕެއިން ކުރި މީހާއަށް ދެރަ ގޮތް އޮތުން އެއީ އަސާސީ ޚިދުމަތް ފޯރުކޮށްދިނުމުގައި އިހުމާލުވުމެވެ.

އެންސްޕާ / އާސަންދައަކީ ރައްޔިތުންގެ ސިއްހީ ސްކީމަށް ވާއިރު އެ ސްކީމަކީ ވަކި ބަޔަކު އަމިއްލަ މަންފާ ހޯދަން ބޭނުންކުރާ އަލާއުއްދީންގެ ވޮއް ގަޑަކަށް ވެގެން ނުވާނެއެވެ. ނުވަތަ އެއީ ވަކި ބަޔަކު ދެ ވަނަ ދައުރެއް ހޯދުމަށް މިހާރުއްސުރެ ދެކެމުންދާ ހުވަފެން ތެދުކުރުމަށް ބޭނުންކުރާ ކެމްޕެއިން ފަންޑަކަށްވެސް ހަދައިގެން ނުވާނެއެވެ.