ސަރުކާރުން މަސައްކަތް ކުރަމުންދަނީ ނެޝަނަލް ސޯޝަލް ޕްރޮޓެކްޝަން އެޖެންސީ (އެންސްޕާ) އާއި ހައުސިން ޑިވެލޮޕްމަންޓު ކޯޕަރޭޝަން (އެޗްޑީސީ)ގެ ހިޔާނާތް އޮއްބާލަން ކަމަށް އިދިކޮޅު އެމްޑީޕީން ބުނެފިއެވެ.

އެމްޑީޕީން މިފަދައިން ހާމަކޮށްފައިވަނީ، އެ ޕާޓީގެ ގައުމީ މަޖިލީހުގެ މެންބަރު، ރޯޑް ޑިވެލޮޕްމެންޓް ކޯޕަރޭޝަން (އާރްޑީސީ)ގެ ކުރީގެ މެނޭޖިން ޑިރެކްޓަރު މޫސާ އަލިމަނިކު (މޫކޭ) ދިރިއުޅޭ ގެއަށް ބުރާސްފަތި ދުވަހުގެ ރޭ މެންދަމު ފުލުހުން ވަނުމާ ގުޅިގެން ނެރުނު ބަޔާނެއްގައެވެ.

އެމްޑީޕީގެ ބަޔާނުގައި ބުނެފައިވަނީ، އާއިލާއާއެކު ނިދާފައި އޮއްވާ މޫކޭގެ ގެއަށް ފުލުހުން ވަނުމަކީ ބިރު ދެއްކުމުގެ އަމަލެއް ކަމަށާއި އަދި ކުރި ފުރައްސާރައެއް ކަމަށެވެ.

އެގޮތުން އެއީ ރައީސް ޑރ. މުހައްމަދު މުއިއްޒުގެ ވެރިކަމުގައި އިންސާނީ ހައްގުތަކާއި ޑިމޮކްރެޓިކް އުސޫލުތައް ދަމަހައްޓަމުން ނުދާކަން ދައްކުވައިދޭ ކަމެއް ކަމަށް ވެސް އެމްޑީޕީއިން ބުނެފައިވެއެވެ

އެމްޑީޕީ އަދި އިދިކޮޅު އެހެން ޕާޓީތަކުގެ މެންބަރުންނާއި އިސްވެރިންގެ އަގުވައްޓާލުމަށް އެއްވެސް ހެއްކެއް ނެތި މި ސަރުކާރުން ބަދަލު ހިފުމުގެ އެތައް އަމަލެއް ހިންގަމުންދާ ކަމަށް ވެސް އެ ބަޔާނުގައި ބުނެފައިވެއެވެ.

އެގޮތުން، ޕާޓީގެ ލީޑަޝިޕާއި މެންބަރުން ފުލުހަށް ހާޒިރުކުރުމާއި، ބައެއް މީހުންގެ މައްޗަށް ދައުވާ ކުރުމަށާއި ތަހުގީގު ކުރުމަށް ސަރުކާރުން ކުރާ މަސައްކަތްތައް ބަޔާނުގައި ތަފުސީލުކޮށްފައިވެއެވެ.

އޭގެ ތެރޭގައި ކުރީގެ ރައީސް އިބްރާހިމް މުހައްމަދު ސޯލިހު އާއި އެމްޑީޕީގެ ޗެއާޕާސަން ފައްޔާޒު އިސްމާއިލުގެ މައްޗަށް ޖިނާއީ ތަހުގީގެއް ހިންގުމަށް މަޖިލީހުން ޕްރޮސެކިއުޓާ ޖެނެރަލުގެ އަރިހުން އެދިފައިވުން ހިމެނެއެވެ.

ކޮރަޕްޝަނުގެ ތުހުމަތު ކުރެވޭ މީހުންގެ މައްޗަށް ތަހުގީގު ހިންގަން ޖެހޭ ކަމަށް އެ ޕާޓީން އަބަދުވެސް ދެކޭކަމެއް ނަމަވެސް، މިގާނޫނު ބަދަލުކޮށް އެންޓި ކޮރަޕްޝަން ކޮމިޝަން (އޭސީސީ)ގެ ވެރިން އައްޔަންކުރުމުގެ ބާރު ރައީސުލްޖުމްހުރިއްޔާއަށް ދިނުމާއެކު އެ ކޮމިޝަނަށް އޮތް އިތުބާރާމެދު ސުވާލު އެމްޑީޕީގެ ބަޔާނުގައި ސުވާލުއުފައްދާފައިވެއެވެ.

މިހާރު އެންމެ އިސްކަމެއް ދީގެން ބަލަން ޖެހޭނީ އެންސްޕާ އަދި އެޗްޑީސީގެ މައްސަލަތައް ކަމަށާއި ނަމަވެސް ފެނިގެން ދަނީ ފުލުހުންނާއި އޭސީސީއިން ވެސް މި ސަރުކާރުގެ ކޮރަޕްޝަނުގެ މައްސަލަތައް އޮއްބާލުމަށް އެއްބާރުލުން ދެމުންދާތަން ކަމަށް ވެސް އެމްޑީޕީން ބުނެފައިވެއެވެ.

އެމްޑީޕީއަށް ނިސްބަތްވާ މެންބަރުންގެ ގެތައް ބަލައިފާސްކޮށް، އަދި ބައެއް މައްސަލަތައް އަވަސްކުރަން މަސައްކަތް ފެށީ އެޗްޑީސީ އާއި އެންސްޕާގެ މައްސަލަ ފެންމަތިވެ، ރައީސް ޑރ. މުހައްމަދު މުއިއްޒު އަށް އަދި ސަރުކާރަށް ވަރަށް ބޮޑަށް ފާޑުކިޔުން އަމާޒުވާން ފެށުމުންނެވެ.

ރައީސް މުއިއްޒު ޕްރޮމޯޓުކުރަން އުފައްދާފައިވާ އެމްއެމްޓީވީ ހިންގާ ކުންފުނިން އެންސްޕާއަށް ބޮޑު އަގެއްގައި އޮފީސް އިމާރާތެއް ކުއްޔަށް ދިނުމުން ފާޑުކިޔުން އަމާޒުވިއިރު، ރައީސް ވިދާޅުވީ އެ މައްސަލަ އެ މަނިކުފާނާ ހަމައަށް އައިސްފައި ނެތް ކަމަށެވެ.