އިންޑިއާއަށް ސަނާކިޔާ ފައިބުޑަށް ވެއްޓުމުންވެސް، އެގައުމުގެ ސަރުކާރުން ދިވެހިރާއްޖެއަށް ދިން އެހީ ކުޑަކޮށްފިއެވެ.

އެގޮތުން އިންޑިއާ ސަރުކާރުގެ ކުރިއަށް އޮތް މާލީ އަހަރު ބޭރުގެ ގައުމުތަކަށް ދޭ ހިލޭ އެހީގެ ދަށުން ރާއްޖެއަށް ދޭން ހުށަހެޅި ފައިސާގެ އަދަދު ވަނީ ކުޑަކޮށްފައެވެ.

އިންޑިއާގެ ފިނޭންސް މިނިސްޓަރު ސީތާރަމަން މި އަހަރުގެ ފެބްރުއަރީ މަހު އެ ގައުމުގެ މަޖިލީހަށް ހުށަހެޅުއްވި އިންޓަރިމް ބަޖެޓުގައި ރާއްޖެއަށް ހިލޭ އެހީގެ ގޮތުގައި ދޭން ހިމެނީ 600 ކްރޯޑް ރުޕީސް (72 މިލިއަން ޑޮލަރު) އެވެ. ނަމަވެސް އެބަޖެޓު އިއްޔެ ފާސްކުރީ ރާއްޖެއަށް ދޭ އެހީ 48 މިލިއަން ޑޮލަރަށް ކުޑަކޮށްގެންނެވެ.

މިކަން އިންޑިއާގެ ނޫހެއް ކަމަށްވާ "އިންޑިއާ ޓުޑޭ" އިން ރިޕޯޓުކޮށްފައިވެއެވެ. އިންޑިއާ ޕާލަމެންޓަށް ފުރަތަމަ ބަޖެޓް ހުށަހެޅި އިރު އޮތްގޮތުން ރާއްޖެއަކީ އިންޑިއާއިން ދެވަނައަށް އެންމެ ގިނަ ހިލޭ އެހީ ދޭނެ ގައުމެވެ. ނަމަވެސް ބަޖެޓަށް ގެނައި އިސްލާހާއެކު ރާއްޖެ ވަނީ ތިންވަނައަށް ވެއްޓިފަ އެވެ. އިންޑިއާއިން ކުރިއަށް އޮތް އަހަރު އެންމެ ގިނަ ހިލޭ އެހީ ދޭނީ ބޫޓާނަށާއި ނޭޕާލަށެވެ.

އިންޑިއާގެ އެހީ މަދުކުރަން ނިންމާފައި މިވަނީ މި ސަރުކާރުން އެ ގައުމަށް ސަނާ ކިއުން އިތުރުކޮށް އިންޑިއާ ފައިބުޑަށް ސަލާމުގެ ޏާށިގަޑުވެސް ހިފައިގެން ގޮސް އާދޭސްކޮށް، އެގައުމާ މެދު ރާއްޖެއިން ބާއްވާ ހާރިޖީ ގުޅުން ރަނގަޅުކުރަން ގިނަ މަސައްކަތްތަކެއް ކުރަމުން ދާ ކަމަށް ދިވެހި ސަރުކާރުން ހާމަކޮށްފައިވާ ދަނޑިވަޅެއްގައެވެ.