ރައްޔިތުންގެ މަޖިލީހުގެ މެމްބަރަކު މަޖިލީހުގެ ގަވާއިދުގައި ކަނޑައަޅާފައިވާ ސުލޫކީ މިންގަނޑާ ހިލާފުވެއްޖެ ނަމަ މެމްބަރުން ސަސްޕެންޑް ކުރުމުގެ އުސޫލު ހިމަނައިގެން މަޖިލީހުގެ ގަވާއިދު ފާސްކޮށްފިއެވެ.

މަޖިލިސް ގަވައިދުގެ 18 ވަނަ ބާބުގެ ދަށުން ސުލޫކީ މިންގަނޑަކީ ކޮބައިކަން ވަނީ އަލަށް އަމަލުކުރަން ފެށި ގަވައިދުގައި ތަފްސީލް ކޮށްފައެވެ.

އޭގެތެރޭގައި ޤާނޫނާއި ގަވައިދާއި ހިލާފު ކަމެއް ނުކުރުމާއި މަޖިލީހުގެ ގަދަރު ދެމެހެއްޓުމާއި ނާޖާއިޒް މަންފާއެއް ނުވަތަ ފައިދާއެއް ނުހޯދުމާއި މަޖިލީހުގެ ސިއްރުތައް ހިފެހެއްޓުން ވެސް ހިމެނެއެވެ.

ވަކި އަދަދަކަށް މަޖިލީހުގެ ޖަލްސާ އާއި ކޮމެޓީތަކުގެ ބައްދަލުވުމުގައި ބައިވެރިވުން މަހުރޫމް ކުރުމާއި މަޖިލީހުގެ ރަސްމީ ދަތުރުތަކާއި އެކި ކަންކަމުގައި މަޖިލީހުން ފޮނުވާ ވަފުދުތަކުގައި ބައިވެރިވުން ވަކި މުއްދަތަކަށް މަހްރޫމްކުރުމާއި މެމްބަރަކު މަޖިލީހުގެ މުދަލާއި ތަކެއްޗަށް ގެއްލުން ދީފި ނަމަ، އެ ދިން ގެއްލުމުގެ ބަދަލު އެ މެމްބަރުގެ މުސާރައިން އުނިކުރުން ވެސް ވަނީ އަޅާނެ ފިޔަވަޅުތަކުގެ ގޮތުގައި ކަނޑައަޅާފައެވެ.

ގަވައިދުގައި ބުނެފައި ވަނީ މެމްބަރަކު ސުލޫކީ މިންގަނޑާއި ހިލާފުވެގެން ފިޔަވަޅެއް އެޅިނަމަވެސް އެއީ އަދަބެއް ދިނުމުގެ ބަދަލުގައި މަޖިލީހުގެ ގަދަރު ހިފެހެއްޓުމަށާއި މަޖިލީހުގެ ޖަލްސާތަކުގެ ހުރުމަތް ހިފެހެއްޓުމަށާއި މަޖިލީހާއި މެދު ރައްޔިތުންގެ އިތުބާރު ހިފެހެއްޓުމަށް އަޅާ ފިޔަވަޅެއް ކަމަށެވެ.

މަޖިލިސް ޖަލްސާގައި ގަވައިދު ފާސްކުރީ މަޖިލިސް ޖަލްސާއަށް ހާޒިރުވި 64 މެމްބަރުންގެ ތާއީދާއި އެކުއެވެ.