މިނިސްޓްރީ އޮފް ޔޫތު އެމްޕަވާރމަންޓް، އިންފޮމޭޝަން އެންޑް އާޓްސްގައި ސިޔާސީ މުވައްޒަފުންގެ ގޮތުގައި 73 ފަރާތެއްވާކަން ހާމަވެއްޖެއެވެ.

މައުލޫމާތު ހޯދައި ލިބިގަތުމުގެ ގާނޫނޫގެ ދަށުން "ތޭރަ އޮންލައިން" ގެ ފަރާތުން އެ ވުޒާރާގައި ތިބި ސިޔާސީ މުވައްޒަފުންގެ އަދަދާއި މުސާރާއިގެ ތަފްސީލް ހޯދުމަށް އެދުނީ މެއި މަހުގެ 20 ވަނަ ދުވަހުއެވެ.

އެހެންކަމުން ނޮވެމްބަރު 17 ވަނަ ދުވަހުން ފެށިގެން މެއި މަހުގެ 20 ވަނަ ދުވަހާއި ހަމަޔަށް އެ ވުޒާރާއަށް އައްޔަންކޮށްފައިވާ ސިޔާސީ މުވައްޒަފުންގެ އަދަދާއި މުސާރާއިގެ ތަފްސީލް އެ ވުޒާރާއިން ވަނީ ޖުލައި މަހުގެ 25 ވަނަ ދުވަހު ހިއްސާކޮށްފައެވެ.

ޔޫތު މިނިސްޓްރީގެ ސިޔާސީ މުވައްޒަފުންގެ އަދަދާއި މުސާރަ:

1 މިނިސްޓަރު 66،000 ރފ

1 މިނިސްޓަރ ޕީއޭ 20،000 ރފ

3 ސްޓޭޓް މިނިސްޓަރުން 43،500 ރފ

17 ޑެޕިޔުޓީ މިނިސްޓަރުން 31،500 ރފ

36 ސީނީއަރ ޕޮލިޓިކަލް ޑިރެކްޓަރުން 25،500 ރފ

14 ޕޮލިޓިކަލް ޑިރެކްޓަރުން 20،500 ރފ

1 އ. ޕޮލިޓިކަލް ޑިރެކްޓަރުން 15،500 ރފ

މި މައުލޫމާތަށް ބަލާއިރު އެ މިނިސްޓްރީގެ ސިޔާސީ މުވައްޒަފުންގެ މުސާރަ ދިނުމަށް މަހެއްގެ މައްޗަށް 1،437،000 ހޭދަވެ އެވެ.

މަތި ލުއި ސަރުކާރެއް ދަމަހައްޓަން ވެރިކަމަށް އައި ސަރުކާރުން ދަނީ އެއްވެސް ހައްދެެއްނެތި މަގާމްތަކަށް މީހުން އައްޔަންކުރަމުންނެވެ. ރައީސް މުއިއްޒު ވަނީ ސިޔާސީ މަގާމްތަކުގެ އަދަދު 700 އަށްވުރެ ގިނަ ނުކުރާނެ ކަމަށް ވިދާޅުވެފައެވެ.

ނަމަވެސް މިހާރުވެސް އެ އަދަދު ވަނީ ފަހަނަ އަޅާގޮސްފައިކަމަށް ރައީސް އޮފީހުގެ އިސް ތަރުޖަމާނު ހީނާ ވަލީދުގެ ވާހަކަތަކުން ވަނީ ދޭހަވެފައެވެ. އެގޮތުން ހީނާ ވަނީ ސިޔާސީ މަގާމްތަކުގެ އަދަދު 3000 އަށްވުރެ މަތި ކަމަށް ވިދާޅުވެފައެވެ.