ސިނަމާލެ ބުރިޖާ އަދި ހަލި މަގު ބޭނުންކުރާ ފަރާތްތަކުގެ އަތުން ޓޮލު ފީ އެއް ނަގަން ސަރުކާރުން ނިންމުމާ އެކު ފާޑުކިޔުމާ ނުުރުހުން ސަރުކާރަށާ ރައީސް މުހައްމަދު މުއިއްޒަށް އަމާޒުވާން ފެށުމުން އަމިއްލަފުޅު ދިފާއުގައި ރައީސް މުއިއްޒު ނިކުންނަވައިފިއެވެ.

ބުރިޖުން ފީ ނަގަން ނިންމުމުން ގިނަ ބަޔަކު ވަނީ ރައީސް މުއިއްޒަކީ ދޮގުވެރިއެއްގެ ގޮތުގައި ސިފަކޮށްފައެވެ. އެއީ އެމަނިކުފާނު އެކަން ނުކުރައްވާނެ ކަމަށް ރިޔާސީ އިންތިހާބުގެ ތެރޭގައި ވިދާޅުވެފައިވުމުންނެވެ.

އެހެންކަމުން ރައްޔިތުންގެ ރުޅިގަޑު ފަޅައިގެން ދިއުމުން ރައްޔިތުން މަސަލަސް ކުރައްވަން މަޖްބޫރުވެވަޑައިގެން ރައީސް މުއިއްޒުވަނީ އެމަނިކުފާނުގެ ފޭސްބުކްގައި ޕޯސްޓެއް ކުރައްވާފައެވެ.

ޕޯސްޓުގައި ވިދާޅުވެފައިވަނީ ބްރިޖުން ޓޯލް ނެގުމަކީ އެމަނިކުފާނުގެ ސިޔާސަތެއްނޫން ކަމަށެވެ.

ނަމަވެސް ރޭގައި އިޢުލާން ކުރެވުނު "މާލެފަހި" ޕްލޭންގައި ޓޯލް ނެގުމާމެދު ދިރާސާއެއްކުރުމަށް ހިމަނާފައިވަނީ ފަންނީ ލެވެލްގައި އެކަމުގެ ލަފާ އެމަނިކުފާނަށް އެރުވުމުގެ ނިޔަތުގައިކަމަށް ރައީސް މުއިއްޒު ވިދާޅުވެފައިވެއެވެ.

އެގޮތުން ލިބޭ ފަންނީ ލަފާގައި ޓޯލް ނަގަން ހުށަހެޅުން އަޔަސް، މާލެ ސިޓީގެ މަގުތައް އެއްކޮށް ރަނގަޅު ފެންވަރަކަށް ހަދާ ނިމުމުގެ ކުރިން އަދި އެކަށީގެންވާ މިންވަރަކަށް ޕާކިންގ ގެ މައްސަލަ ޙައްލުވުމުގެ ކުރިން، އަދި ޤައުމާއި ރައްޔިތުންގެ ޢިޤްތިޞާދީ ޙާލަތު އެކަށީގެންވާ ފެންވަރަކަށް މަތިވުމުގެ ކުރިން ޓޯލް ނަގަން ނުފަށާނެ ކަމުގެ ޔަޤީންކަން ރައީސް މުއިއްޒު އަރުވާފައިވެއެވެ.

އެހެންކަމުން އެމަނިކުފާނުގެ މި ޕޯސްޓުންވެސް ހާމަވާ ގޮތުގައި ބުރިޖުން ފީ ނަގާނެއެވެ. ނަމަވެސް އަދި ދުވަހެއް ފައިނަލް ނުވަނީއެވެ.