ދުނެޔަވީ ހަޔާތް ބާއްޖަވެރިވެ، އޭގެ ފޮނިކަމާއި މީރުކަން ފުރިހަމަ ވާނީ، ތިމާއަށާއި އެހެން މީހުންނަށް ފައިދާ ހުރި ހަލާލު މަސައްކަތެއްކޮށް، އާމްދަނީ ހޯދައިގެން ކަމަށް ހުކުރު ހުތުބާގައި ވިދާޅުވެއްޖެއެވެ.

މަސައްކަތް ކުރުމާއި ރިޒުގަށް އަލިއަޅުއްވާލައި މިއަދުގެ ހުތުބާގައި ވިދާޅުވެފައިވަނީ މިހާރު ދިރިއުޅުމުގެ ވައްޓަފާޅި މުޅީން ބަދަލުވެފައި ކަމަށެވެ. މީސްތަކުންގެ މުހުތާދުތައް ގިނަވެފައިވާ ކަމަށެވެ. އިއްޔެ ކޮންމެހެން ބޭނުން ނޫން ކަންތައްތައް މިއަދު މި ވަނީ ޒަރޫރީކަންކަމަށް ބަދަލުވެފައި ކަމަށެވެ.

މީގެ އިތުރުން، “ރިޒްޤުގެ ބަރަކާތް ހޯދާށެވެ!“ މައުލޫއަށް މިއަދު އިއްވި ހުކުރު ޚުތުބާގައި ބަޔާން ކޮށްފައިވާ ގޮތުން، ރޭގަނޑު ފަސް ވަންދެން ކުޅިވަރާއި މަޖަލުގައި ހޭލާ ހުރުމަށްފަހު، ފަތިސް ވަގުތު ވުމުން ނިދާ މީހާއަށް ގެއްލިގެންދާ ދެ ޣަނީމާ އަކީ ފަތިސް ނަމާދާއި ދުވާލު ފެށޭ ވަގުތުގެ ބަރަކާތެވެ. އަދި މިކަމުގެ ސަބަބުން އެފަދަ މީހުން އިލާހީ ރިޒްޤުން މަޙްރޫމުވާ ކަމަށް ވެސް ބުނެފައިވެއެވެ.

ޚުތުބާގައި އިތުރަށް ފާހަގަކޮށްފައިވާ ގޮތުގައި، މާތް الله ކޮންމެ އެއްޗެއް ވެސް ހައްދަވާއިރު، އެ އެއްޗެއްގެ ރިޒްޤު ކަނޑައަޅުއްވައެވެ. ނަމަވެސް ލިބޭ މިންވަރަށް ބޭނުންތައް ބަހައިލައިގެން ހޭދަކުރުމުގައި އިޤްތިޞާދުކުރުމަކީ އިންސާނާގެ މަސްއޫލިއްޔަތެކެވެ.

އިސްލާމް ދީނުގައި މަސައްކަތަކީ، އަޅުކަމެއް ކަމަށް ހުތުބާގައި ވިދާޅުވެފައިވެއެވެ. މާތް ﷲ ގެ ހަޒްރަތުގައިވެސް އަދި ދުނިޔޭގެ ނަޒަރުގައި ވެސް މަސައްކަތްކުރާ މީހާއާއި މަސައްކަތްނުކުރާ މީހާ ހަމަހަމަވެގެންނެއް ނުވާ ކަމަށް ވިދާޅުވެފައިވެއެވެ. މަސައްކަތްކުރާ މީހާއަށް ﷲގެ ރުހިވޮޑިގަތުން ލިބޭނެ ކަމަށާއި މީހުންގެ ލޯތްބާއި އިހްތިރާމު ލިބޭނެ ކަމަށެވެ. ހުތުބާގައި ވިދާޅުވެފައިވަނީ މަސައްކަތްނުކުރާ މީހާއީ ﷲ ރުއްސަވާ މީހެއް ނޫން ކަމަށެވެ. އަދި އޭނާ ވާނީ އޭނާގެ އަމިއްލަ ނަފްސަށާއި،އަނބިދަރީންނަށް ޖެހިފައިވާ ބުރައަކަށް ކަމަށެވެ.