ރައީސުލްޖުމްހުރިއްޔާގެ ރަސްމީ ގެކޮޅު މުލީއާގެއަށް ރައީސް ޑރ. މުހައްމަދު މުއިއްޒު ބަދަލުވެވަޑައިގަންނަވާތީ މުލިއާގެ މަރާމާތުކުރަން ދައުލަތުގެ ބަޖެޓުން 3.6 މިލިއަން ރުފިޔާ ހަރަދުކުރި ކަމަށް ރައީސް އޮފީހުން ބުނެފި އެވެ.
މި މައުލޫމާތު ދިނީ ރައީސްގެ ރަސްމީ ގެކޮޅަށް ދިޔަ ހަރަދުގެ ތަފުސީލު ދިނުމަށް އޮންލައިން ނޫހެއް ކަމަށްވާ "އަދަދު" ނޫހުން މައުލޫމާތު ހޯދާ ލިބިގަތުމުގެ ހައްގުގެ ގާނޫނުގެ ދަށުން ހުށަހެޅުމުންނެވެ.
ރައީސް އޮފީހުގެ ޖަވާބުގައި ބުނީ ނޮވެމްބަރު 17، 2023 އިން ފެށިގެން މުލީއާގޭގެ މަރާމާތުގެ އެކި ކަންކަމަށް ދައުލަތުގެ ބަޖެޓުން ޖުމްލަ 3،607،711ރ. ހަރަދުކޮށްފައިވާކަމަށެވެ.
ނައިބު ރައީސްގެ ރަސްމީ ގެކޮޅު ހިލާލީގެއެކޭ އެއްގޮތަށް މުލީއާގޭގެ މަރާމާތުގެ މަސައްކަތްވެސް ކުރަނީ އެސްޓީއޯ އިންކަން ފާހަގަކޮށްލެވެއެވެ.
މި ވެރިކަމުގައި ހިލާލީގޭގެ މަރާމާތައްވެސް ޖުމްލަ 5،486،248ރ. ވަނީ ހަރަދުކޮށްފަ އެވެ.
ހަރަދުވީ ފައިސާގެ އަދަދާއެކީ ރައީސް އޮފީހުން ވަނީ ވަކި ވަކި ބިލުތަކަށް އެރި އަދަދުތައް ވެސް ހިއްސާކޮށްފަ އެވެ.
ނަމަވެސް އެ ބިލުތަކުގައި ހަރަދުކުރި ކަންކަމުގައި ތަފުސީލު ހިމަނާފައިވާ ނުވާތީ މުލީއާގެއަށް ރައީސް ބަދަލުވެވަޑައިގަންނަވަން ކުރީ ކޮން ކަހަލަ މަރާމާތެއް ކަމެއް ސާފުވެފައިނުވެއެވެ.
