ރާއްޖޭގެ 59 ވަނަ މިނިވަން ދުވަހުގެ މުނާސަބަތުގައި ބޭއްވި ޖަލްސާގައި ދައުލަތަށް ދިގު މުއްދަތަކަށް ހިދުމަތް ކުރެއްވި ބޭފުޅަކަށް ރައީސް ޑރ. މުހައްމަދު މުއިއްޒު ޝަރަފުގެ ބެޖާއި އައްޑަނަ ހަވާލުކުރެއްވުމުގެ ތެރޭގައި ހިނގާދިޔަ ކަމަކާ އެކު ގިނަ ބަޔަކު ރައީސަށް ތައުރީފް ކުރަމުން އެބަ ގެންދަވައެވެ. އާދެ، ތައުރީފް ހަމަ ހައްގެވެ. އެކަމަކާ އަޅުގަނޑު ދެބަހެއް ނުވާނަމެވެ.

ބޭފުޅަކަށް ޝަރަފުގެ ބެޖް ހަވާލުކުރެއްވުމަށް ފަހު ފޮޓޯއަށް ހުއްޓިވަޑައިގެން ހުންނަވަނިކޮށް، އެ ބޭފުޅާގެ އަތުން ބެޖު ދޫވި ވަގުތު ރައީސް މުއިއްޒު ވަނީ ހުޝިޔާރުކަމާއެކު ބެޖް ވެއްޓުނަ ނުދެއްވައި އޭގައި ހިފާފައެވެ. އެ ހުޝިޔާރުކަމުގައި އެމަނިކުފާނު މި ގައުމު ހިންގަވައިފި ނަމަ ކާމިޔާބު ދައުރެއް އޮންނާނީ މާދުރަކު ނޫނެވެ. ނަމަވެސް ދެރައީ ވެރިކަން ކުރުމުގައި ހުޝިޔާރު ނުވާތީއެވެ.

ގައުމީ ނިޝާން ވެއްޓުނަ އެމަނިކުފާނު ނުދިން ނަމަވެސް މި ގައުމުގެ އަގު ބޭރުގެ ފަރާތްތަކުގެ ކުރިމަތީ މިވަނީ އިންތިހާ ދަށު ދަރަޖައަކަށް ވެއްޓިފައެވެ. އެގޮތުން ދިވެހިރާއްޖޭގެ ވެރިކަމަށް ޕީއެޗްޑީ ހޯލްޑާރ އެއް އައި މިއީ ތާރީހުގައި ވެސް ފުރަތަމަ ފަހަރެވެ. ބޭރުގެ އެކި އެކި ފަރާތްތަކުގެ ތައުރީފް އަމާޒުވެގެން ވެސް ދިޔައެވެ. ވާނީވެސް އެހެންތާ، ގައުމު ހިންގަވަން ހުންނާނީ ތަންދޮރު ދަންނަ މޮޅު ވެރިޔެއް ކަމުންނެވެ.

ނަމަވެސް ކުރާނެކަމެެއް ނެތެވެ. ކަންވެ ނިމުނީ އެ ބީދާއިންނެއް ނޫނެވެ. ވެރިކަމުގައި ޕީއެޗްޑީ ހޯލްޑަރެެއް ހުންނެވި ނަމަވެސް އެމަނިކުފާނުގެ ރޯލް މޮޑެލް އަކީ ތަންދޮރު ނުދަންނަ އެއްވެސް އަހުލާގެއް ނެތް "އަބްދުއްރަހީމް އަބްދުﷲ" (އަދުރޭ) އެވެ. ގައުމު ހިންގަވަމުން އެ ގެންދަވަނީ އަދުރޭގެ އިރުޝާދުގެ މަތިންނެވެ. މިކަމާ ރައީސް މުއިއްޒު ކިތަންމެ ދެކޮޅު ހެއްދެވި ނަމަވެސް މިއީ ހަގީގަތެވެ.

ކެމްޕެއިން ދުވަސްވަރު ވެރިކަމަށް އައުމަށްފަހު އެވެނި މިވެނި ކަމެއް ކުރައްވާނެ ކަމަށް ވިދާޅުވި ނަމަވެސް ވެރިކަމަށް އައުމަށްފަހު ކީހާ ޅެން ވީ ފަރިއްސަށެވެ. ވެރިކަމަށް މާ ގިނަ ދުވަސްވެސް ނުވަނީހެން ވެރިޔާ އަކީ ވައުދު ނުފުއްދޭ ފަރާތެއް ކަން މިވަނީ ސާބިތުވެފައެވެ.

ދެން އޮތް އަނެއްކަމަކީ ސަހްޔޫނީންގެ ޕާސްޕޯޓު މަނާކުރުމެވެ. ސަތޭކަ އިންސައްތަ މުސްލިމް ގައުމެކޭ ކިޔާފައި ވާހަކަތައް މަހާސިންތާތަކުގައި މަނިކުފާނު ދެއްކެވިއެވެ. ދިވެހީން ވާނީ އަބަދުވެސް ފަލަސްތީނާ އެކުގައި ކަމަށް ވެސް ވިދާޅުވިއެވެ. މިއީ ދުނިޔޭގެ އެކި ގައުމުތަކުގެ ކުރިމަތީ ދެއްކެވި ބޮޑެތި ވާހަކަތަކެވެ. ފަލަސްތީނާއެކު ވާނަމަ މިއަދު ރާއްޖެއިން ސަހްޔޫނީންގެ ޕާސްޕޯޓް މަނާކުރެވެން ވާނެއެވެ. ބޭރުގެ ގައުމުތަކުގައި ވެސް މިއަދު މިވާހަކަ އެބަ ދައްކައެވެ. ސުވާލު އެބަ އުފައްދާ "ކީއްވެތޯ ރައީސްގެ އެންމެ ގަރާރަކުން މަނާ ކުރެވެން އޮތް ޕާސްޕޯޓް މައްސަލަ މަޖިލީހަށް ވެއްދީ". ލަދުވެތި ދެއްތޯ؟

ޤައުމީ ނިޝާން ވެއްޓުނަ ނުދިން ނަމަވެސް ވައްޓަމުން ގެންދަވަނީ ޤައުމުގެ އަގެވެ.