ރާއްޖޭގައި ހުރުމުގެ ހުއްދަނެތް އެއްވެސް ބިދޭސީއަކު ރާއްޖޭގެ އެއްވެސް ތަނެއްގައި ބެހެއްޓުމަކީ ކުށެއް ކަމަށް ކޮންޓްރޯލަރ ޖެނެރަލް އޮފް އިމިގްރޭޝަން، މުހައްމަދު ޝަމްއާން ވަހީދު ވިދާޅުވެއްޖެއެވެ.

ގަވާއިދާއި ހިލާފަށް އުޅޭ ބިދޭސީން ހޯދުމަށް މިހާރު ކުރިއަށްްދާ އޮޕަރޭޝަނާއި ގުޅިގެން ކުރެއްވި ޓްވީޓެއްގައި ވިދާޅުވީ ރާއްޖޭގެ އިމިގްރޭޝަން ގާނޫނުގެ 30 ވަނަ މާއްދާގެ ދަށުށް ރާއްޖޭގައި ހުރުމުގެ ހުއްދަނެތް އެއްވެސް ބިދޭސީއަކު ރާއްޖޭގެ އެއްވެސް ތަނެއްގައި ބެހެއްޓުމަކީ ކުށެއް ކަމަށެވެ. އަދި އެ ގާނޫނުން ހާސިލު ކުރަން ބޭނުންވާ މަގްސަދުތައް ހާސިލުވިއަ ނުދިނުމުގެ ގޮތުން އަމަލެއް ކުރުމަކީވެސް ކުށެއް ކަމަށާއި އެފަދަ ފަރާތްތަކާއިމެދު އެ ގާނޫނުގެ 33 ވަނަ މާއްދާގެ ދަށުން، ފިޔަވަޅު އެޅޭނެ ކަމަށްވެސް ވިދާޅުވިއެވެ.

ޝަމްއާން ފާހަގަ ކުރި 33 ވަނަ މާއްދާގެ ދަށުން ކުށެއް ކުރީ ދިވެހި ރައްޔިތަކުނަމަ އެމީހެއްގެ އަދަބަކީ 50،000 ރުފިޔާއަށްވުރެ ބޮޑުނޫން އަދަދަކުން ޖޫރިމަނާ ކުރުމެވެ. އަދި އެމީހެއްގެ ޕާސްޕޯޓު ވަކި މުއްދަތަކަށް ހިފެހެއްޓުމުގެ އިހްތިޔާރު ކޮންޓްރޯލަރ ޖެނެރަލް އޮފް އިމިގްރޭޝަން އަށް ލިބިގެންވެއެވެ. ކުށެއް ކުރީ ބިދޭސީއަކު ނަމަ، އެމީހެއްގެ އަދަބަކީ 15،000 ރުފިޔާއާއި 50،000 ރުފިޔާގެ އަދަދަކުން ޖޫރިމަނާ އެކެެވެ. އަދި އެމީހަކަށް ވަކި މުއްދަތަކަށް ރާއްޖެއަށް ނާދެވޭގޮތަށް ފޮނުވާލުމުގެ އިހްތިޔާރު ކޮންޓްރޯލަރ ޖެނެރަލް އޮފް އިމިގްރޭޝަން އަށް ލިބިގެންވެއެވެ.

ގަވާއިދާ ހިލާފަށް އުޅޭ ބިދޭސީންގެ މައްސަލަތައް ހައްލުކުރުމަށް ކަމާއި ގުޅުން ހުރި ފަރާތްތައް ގުޅިގެން ކާމިޔާބު އޮޕަރޭޝަނެއް ހިންގަމުންދާކަން ފާހަގަކޮށްލެވެެއެވެ.

އެގޮތުން، މިއަހަރުގެ ޖުލައި 15 ވަނަ ދުވަހުގެ ނިޔަލަށް ގަވާއިދާ ހިލާފަށް ރާއްޖޭގައި އުޅެމުންދިއަ 2،069 ބިދޭސީން ވަނީ ފުރުވާލެވިފައެވެ.

ކޮންމެ ހަފްތާއަކު ހިންގޭ ރެއިޑް އޮޕަރޭޝަންތަކުގައި މާލެ ސަރަޙައްދުގެ އެތައް ތަނެއް ބަލައި، ގަވާއިދާ ޚިލާފަށް އުޅޭ ބިދޭސީން ދަނީ އިމިގްރޭޝަން ބެލުމުގެ ދަށަށް ގެނެވެމުންނެވެ.

ގަވާއިދާ ހިލާފަށް އުޅޭ ބިދޭސީންގެ މައްސަލަތައް ހައްލުކުރުމަށް ކުރަމުންދާ މަސައްކަތުގައި ދާދި ފަހުން ތަޢާރަފްކޮށްފައިވާ "އިމިގްރޭޝަން ވޮޗް" މެދުވެރިކޮށް ރައްޔިތުންގެ ދަނީ ގިނަ އަދަދަކަށް ރިޕޯޓުކުރަމުންދާ ކަމަށް އެ އިދާރާއިން މައުލޫމާތު ދެއްވައެވެ.