ވަކި ކަމެއް ހާސިލް ކުރުމަށް މިފަދައިން އަމަލުތައް ބައްޓަން ކުރާ މީހަކު އަޅުގަނޑުގެ ހަޔާތުގައި އަދި ނުދެކެން. ދައްކަން މިއުޅެނީ ކޮން ވާހަކައެއް ކަން ރައްޔިތުންނަށް ކޮންމެސް ވަރަކަށް މިހާރު ސާފުވާނެއެވެ. ވެރިކަމުގެ ގޮނޑި ހޯދުމަށް ނުވަތަ ފިނި ކޮޓަރި އަށް ވަންނަން ކޮންމެ ފަދަ ގޮތަކަށް ރައްޔިތުންނަށް އޮޅުވާލަން މަސައްކަތް ކުރާނެ ކަމަކަށް އެއްވެސް ރައްޔިތަކު ހީވެސް ނުކުރާނެ ކަން ޔަގީނެވެ. މި ދައްކަނީ އަދުގެ ސަރުކާރުގެ ވާހަކައެވެ.

މިހެންމިދަންނަވާ ސަބަބުތައް ވެސް މަދެއް ނޫނެވެ. އަދުގެ ސަރުކާރުން ވެރިކަމަށް އައުމައްޓަކައި ރައްޔިތުންގެ ގާތު ހެދި ދޮގުގެ މިންވަރުވެސް މަދެއް ނޫނެވެ. މިކަން ކޮންމެ ރައްޔިތަކަށްވެސް އެނގޭނެއެވެ.

އަދުގެ ރައީސުލް ޖުމްހޫރިއްޔާ ޑރ މުއިއްޒު ވެރިކަމަށް ވަޑައިގަތީ ރައްޔިތުން ގާތު އެތައެް ވައުދުތަކެއް ވެފައެވެ. އެގޮތުުން ވި އެންމެ ބޮޑު އެއް ވައުދަކީ އަޅުގަނޑުމެންގެ ރައީސް ރައީސް ޔާމީން މިނިވަން ކޮށްދޭނެ ކަމަށް ވި ވައުދެވެ. މިއަދު ވެރިކަމަށް އަރާ ވަޑައިގެން 2 މަހާ 8 ދުވަސް ފާއިތުވެގެން ދިޔަ އިރުވެސް ރައީސް ޔާމީން މިނިވަނެއް ނުވިއެވެ. ސުވާލަކީ ރައީސް ޔާމީން މިނިވަން ކުރައްވަން ކެރި ވަޑައި ނުގަންނަވަނީ ތޯއެވެ. ޑރ މުއިއްޒު މަސައްކަތް ކުރައްވަނީ މި ދިވެހި ރާއްޖެ އެމަނިކުފާނުގެ މުށުތެރެއަށްލާ ރައްޔިތުންގެ މޫނު މައްޗަށް ދަޅަ ދައްކައިގެން އުޅެންށެވެ. ނަމަވެސް އެކަން އެހެނެއް ނުވާނެއެވެ. ހުދު އެމަނިކުފާނުވެސް ގަބޫލް ކުރަން ޖެހޭ ހަގީގަތަކީ ރައްޔިތުން އެމަނިކުފާނަށް ވޯޓު ދެއްވީ ރައީސް ޔާމީން ގެ ވެރިކަމެއް ފެންނާނެ ކަމުގެ އުންމީދުގައި ކަމެވެ. ކިތަންމެ ވަރަކަށް އޭގެ މަތީ ފަރުދާ އަޅާ ފޮރުވަން އުޅުނަސް އެއީ ފެންނަށް އޮތް ބޮޑު ހަގީގަތެވެ.

ދެން އޮތް ވާހަކައަކީ އިންޑިއާ ސިފައިންގެ ވާހަކައެވެ. ވެރިކަމަށް އައުމުގެ ކުރިން މި ބޭފުޅުން ދެއްކެވި ވާހަކަތަކުން ރައްޔިތުން ތިބީ ބިރުން ގޮސް ހަލާކުވެފައެވެ. ދެއްކެވި ވާހަކަތަކުން ރައްޔިތުންނަށް ސިފަވީ ރާއްޖެ މިއޮތީ އަޅުވެތި ކަމަކަށް ދިއުމުގެ ތުންފަތް މަތީގައި ހެނެވެ. ކެންޕޭނު ދުވަސް ވަރު ކިޔާ އެއް ލަވައެއްހެން ކޮންމެ ދުވަހަކު ތިން ހަތަރު ފަހަރު ޕޯޑިއަމް މައްޗަށް އަރާ ހުރެ ބުނަމުން ދިޔައީ ވެރިކަމަށް އައުމަށް ފަހު އިންޑިއާ ސިފައިން މި ދިވެހި ރާއްޖެއިން ބޭރުކުރާނަމޭ، މި ދިވެހި ރާއްޖޭގައި އެއްެސް ގައުމެއްގެ ސިފައިން ތިބިޔަކަ ނުދޭނަމޭ، އިސްކުރާނީ ދިވެހިންގެ މަސްލަހަތޭ، ހާރިޖީ ސިޔާސަތަކީ ޕްރޯ މޯލްޑިވެސް ސިޔާސަތެކޭ، މި ވާހަކަތަކީ ހުދެ ޑރ މުއިއްޒު ރައްޔިތުންގާތު ދެއްކެވި ވާހަކަތަކެވެ.

ވެރިކަމަށް އަންނަމުން އިންޑިއާ ސިފައިންނާ ގުޅޭ ގޮތުން ރައްޔިތުންގާތު ދެއްކި ވާހަކަ ތަކު ތެރޭގައި އެބޭފުޅުން ރައްޔިތުން ގާތު ބުނަމުން ދިޔައީ ރާއްޖޭގައި 2000 އަށް ވުރެ ގިނަ އިންޑިއާ ސިފައިން ގާއިމުވެ އެބަ ތިއްބެވެ. ވެރިކަމަށް އައުމަށްފަހު ދެން ބުނި އަދަދާ ކެންޕޭން ދުވަސްވަރު ކީ އަދަދާ ހާސް ތަފާތެވެ. ކުއްލިއަކަށް އެއަދަދު 188 ކަށް ވެއްޓިގެން ދިޔައެވެ. ދެންބުނީ ރާއްޖޭގައި ތިބީ 187 އިންޑިއާ ސިފައިންނެވެ. ހުދު މި ސަރުކާރަށް ވެސް ރާއްޖޭގައި ތިބި އިންޑިއާ ސިފައިންގެ އަދަދު ޔަގީން ކަމާއެކު ނޭންގެއެވެ. ދެން އުފެދޭ ސުވާލަކީ ހަގީގަތުގައި ވެސް ނޭންގެނީ ތޯ އެވެ. ނޫނީ ރައްޔިތުންނަށް ކަންކަން އޮޅުވާލުމަށް މަސައްކަތް ކުރަނީ ތޯ އެވެ. އިންޑިއާ ސިފައިންނޭ ކިޔާފަ ދެއްކި ވާހަކަ އަކީވެސް ރައްޔިތުންނަށް އޮޅުވާލި ބޮޑު އޮޅުވާލުމެކެވެ.

މި ސަރުކާރުން ރައްޔިތުންނަށް އޮޅުވާލި ވާހަކަތަކަކީ ދައްކާ ދައްކާ ނުނިމޭނެ ވާހަކަތަކެވެ. އަދި މި ދައްކާލެވުނީ ބޮޑެތި ކަންތައްތަކުގެ ވާހަކައެވެ. ދެން މިހާރު އުފެދޭ ސުވާލަކީ މިގޮތަށް ކިތަށް ކަމެއްގަ ބާއޭ ރައްޔިތުންގާތު އޮޅުވާލާފަ ހުންނާނީ؟ ހަރަދުތައް ކުޑަ ކުރައްވާނަމޭ، ފަސްޓް ކުލާހުގައި ދަތުރު ނުކުރައްވާނަމޭ ކީ ބޭފުޅުން ހަރަދަކަށް ބެލުމެއްނެތި ދަތުރުރަކުގައި މިލިއަނުން ހަރަދު ކުރައްވަމުން އެގެންދަވަނީއެވެ. ފަސްޓް ކުލާހުގައިވެސް ދަތުރު ކުރަމުން އެ ގެންދަވަނީއެވެ. ރައްޔިތުންނަށް މީގެ ކުރިން މި ސަރުކާރުގެ އަމަލުތައް ހުންނާނީ މިފަދައިން ކަން އެނގުނު ނަމަ ހަމަ ޔަގީނުންވެސް އެއްވެސް ރައްޔިތަކު ވޯޓެެއް ނުދިނީސްއެވެ.

މި ސަރުކާރުން މުޅިންވެސް އުޅުއްވަނީ ރައްޔިތުންނަށް އޮޅުވާލުމުގައެވެ.