ރާއްޖޭގެ ވެރިކަމުގެ ނިޒާމު އޮތް ގޮތުން މަރުކަޒީ ބޭންކުގެ ގަވަރުނަރަކީ އެއްވެސް ބާރެއް އޮތް މީހެއް ނޫން ކަމަށް މާލިއްޔަތު ކޮމިޓީގެ މުގައްރިރު، އަދި މާމިގިލީ ދާއިރާގެ މެމްބަރު ގާސިމް އިބްރާހީމް ވިދާޅުވެއްޖެއެވެ.

ގާސިމް އެހެން ވިދާޅުވީ، މިއަދު ބޭއްވި މާލިއްޔަތު ކޮމިޓީގެ ބައްދަލުވުމުގައއެވެ.

ގަވަރުނަރަކަށް އައްޔަނުކުރަން ނަން ފޮނުވާފައިވާ ކުރީގެ ފިނޭންސް މިނިސްޓަރު އަހުމަދު މުނައްވަރާއި އިންޓަވިއުކުރުމަށްފަހު އެ ބައްދަލުވުމުގައި ދެއްކި ވާހަކައިގެ ތެރެއިން ގާސިމް ވިދާޅުވީ، އެމްއެމްއޭގެ ބޯޑާއި ރައިސުލްޖުމްހޫރިއްޔާގެ ލަފާފުޅާ އެއްގޮތަށް ނޫނީ ގަވަރުނަރަށް ފިޔަވަޅެއް ނޭޅުއްވޭނެ ކަމަށާއި، އެކަންކަން އެގޮތަށް ވަނީ ފިސްކަލް ޕޮލިސީ ހަރުދަނާ ނުވުމުން ކަމަށެވެ. އަދި ހަރަދުތައް ދެކޮޅު ނުޖެއްސޭތީ ކަމަށެވެ.

އެމްއެމްއޭގެ ގަވަރުނަރުގެ މަގާމުގައި ހުންނެވި އަލީ ހާޝިމް ވަކިކުރީ، އޭނާ އަކީ މަގާމު އަދާކުރުމުގެ ގާބިލުކަން ނެތް މީހެއް ކަމަށް މަޖިލީހަށް ގަބޫލުކުރެވުމުން ނެވެ.  އޭނާ ވަކިކުރުމުގެ ބަހުސް މަޖިލީހުގައި ކުރިއަށްދިޔައިރު، ބައެއް މެމްބަރުން ވަނީ ރާއްޖޭގެ އިގްތިސާދީ ހާލަތު ދަށްވުމުގެ ޒިންމާ ނަންގަވަން ޖެހޭނީ ހާޝިމް ކަމަށް ވެސް ވިދާޅުވެފަ އެވެ. އެ މައްސަލަ ދިރާސާކުރި މާލިއްޔަތު ކޮމިޓީން އެގޮތަށް ނިންމީ، ރާއްޖޭގެ އިގްތިސާދީ ހާލަތު ރަނގަޅު ކުރުމަށް ގަވަރުނަރުގެ ޒިންމާތަކާއި މަސްއޫލިއްޔަތުތައް އަދާނުކުރައްވާ ކަމަށް ބުނެ އެވެ.