ކުރީ ސަރުކާރެއްގެ އެޑިއުކޭޝަން މިނިސްޓަރަކު ރަސްމީ މެއިލްތަކެއް ޑިލީޓުކޮށްލި މައްސަލައެއް ފެންމަތިވެއްޖެއެވެ.

ދުލުހުންގެ އިދާރާއިން މީޑިޔާތަކަށް ފޮނުވި މެސެޖެއްގައި ބުނެފައިވަނީ ކުރީގެ އެޑިއުކޭޝަން މިނިސްޓަރަކު ބޭނުން ކުރެއްވި ރަސްމީ އީމެއިލް އެކައުންޓުގައިވާ ހުރިހާ މެއިލްތައް މިދިޔަ އަހަރުގެ ތެރޭގައި ޑިލީޓްކޮށްފައިވާ މައްސަލަ ތަހުގީގުކޮށްދިނުމަށް އެދި މިދިޔަ ބުރާސްފަތި ދުވަހު ފުލުހުންގެ ޚިދުމަތަށް ހުށަހަޅާފައި ވާކަމަށެވެ. އެހެންކަމުން އެ މައްސަލަ ފުލުހުން ތަހުގީގުކުރަމުން ގެންދާކަމަށް ބުނެފައިވެއެވެ. މައްސަލަ ހުށަހެޅީ އެޑިއުކޭޝަން މިނިސްޓްރީއިން ކަމަށް ފުލުހުން ހާމަކޮށްފައިވެއެވެ. ނަމަވެސް މައްސަލަ ހުށަހެޅި ފަރާތުން މައްސަލަ ހުށަހަޅާފައިވަނީ ގާނޫނީ ކޮން އަސާސެއްގެ މައްޗަށްކަން ހާމަކޮށްފައިނެތެވެ.

މި މެސަޖަށް ފަހު މީޑިޔާތަކުގައި މިކަން ރިޕޯޓުކޮށްފައިވަނީ ނިމިދިޔަ ސަރުކާރުގެ އެޑިއުކޭޝަން މިނިސްޓަރު ޑރ. އައިޝަތު އަލީ ކުރެއްވި ކަމެއްގެ ގޮތުގައެވެ. އަދި މިކަން ފުލުހުން މިހާރު ވަނީ ކަށަވަރުވެސް ކޮށްދެއްވާފައެެވެ.

ޑރ. އައިޝަތު އަލީ އެކަމަނާގެ ފޭސްބުކް ޕޭޖުގައި ކުރެއްވި ޕޯސްޓެއްގައި ވިދާޅުވީ، އެކަމަނާގެ ވަޒީރުކަމުގައި ބޭނުންކުރެއްވި މެއިލް، 2023 ވަނަ އަހަރުގެ ނޮވެމްބަރު މަހުގެ 17 ވަނަ ދުވަހު ޑީއެކްޓިވޭޓް ކޮށްފައިވާ ކަމަށެވެ. ނަމަވެސް މިއަދު މެންދުރު ފަހު 3:15ގައި އެ އީމެއިލްއަށް ވަންނަން ކޮންމެވެސް ފަރާތަކުން މަސައްކަތް ކޮށްފައިވާ ކަމަށް އޭނާ ވިދާޅުވިއެވެ. އަދި 2023 ވަނަ އަހަރުގެ ނޮވެމްބަރު މަހުގެ 17 ވަނަ ދުވަހުގެ ފަހުން އެ މެއިލްއިން އެއްވެސް ފަރާތަކަށް މެއިލްއެއް ލިބިފައިވާ ނަމަ އެއީ އެކަމަނާގެ މެއިލްއެއް ނޫން ކަމަށްވެސް ވިދާޅުވެފައިވެއެވެ.

ފުލުހުންނަށް މައްސަލަ ހުށަހަޅާފައިވަީ ޖުލައި މަހުގެ 25 ވީ ބުރާސްފަތި ދުވަހުއެވެ.